ރާއްޖޭގެ އެކި ކައުންސިލްތަކަށް ޕްރޮޖެކްޓުތައް ހިންގުމަށް ކާބަން ކްރެޑިޓް އުފައްދާނެ ގޮތް އެމްޑީޕީގެ އިންވެސްޓްމެންޓް ފޯރަމްގައި އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ކިޔައިދެއްވައިފިއެވެ.
އެމްޑީޕީން ބޭއްވި އިންވެސްޓްމެންޓް ފޯރަމްގެ ޕެނަލް ޑިސްކަޝަން ނިންމަވާލައްވަމުން، ރައީސް ނަޝީދު ވަނީ އެ މަޝްރޫއަކުން ޖައްވުން ކާބަން ސާފުކުރެވޭ މިންވަރަށް ބިނާކޮށް، ބޭރުގެ ޖަމާއަތްތަކުން އެ މަޝްރޫއަށް މާލީ އެހީ ހޯދުމަށް ބޭނުންކުރާ ކާބަން ކްރެޑިޓަކީ ކޮބައިކަން ތަފްސީލުކޮށް ކިޔައިދެއްވައިފައެވެ.
އެމަނިކުފާނު ވިދާޅުވީ، ޖައްވުގައި ހުރި ގެނދަބުޅި ޖައްވުން ނަގާ ކޮންމެ ޓަނަކަށް ކްރެޑިޓެއް އުފެދޭ ކަމަށެވެ. އަދި އެއް ޓަނު ކާބަންގެ އަގަކީ 85 ޑޮލަރު ކަމަށް އައިއެމްއެފްއިން ބުނާކަން ފާހަގަކުރެއްވިއެވެ.
”އަޅުގަނޑު އަންދާޒާކުރާ ގޮތަކީ ފުވައްމުލަކުގެ ކޮންމެ ދިހަ ހެކްޓަރު މެންގްރޫވްއަކަށް 5000 ކްރެޑިޓް އެބަ އުފެދެއޭ. ދެން ފުވައްމުލަކުގައި މިހުރީ 4090 ހެކްޓަރު. ދެން މޭޔަރު ވިދާޅުވީ ތިން ބައި ކުޅަ އެއްބައި، އެއީ މެންގްރޫވްއޭ. އެހެންވީމާ ފުވައްމުލަކުގައި އެބަ އުފެއްދޭ އަހަރަކަށް 82500 ކްރެޑިޓް. ޓަނު. އެއީ އަޅުގަނޑު މި ބަލާލި ކޮމްޕްލަޔަންސް މާކެޓަށް ވެއްޖިއްޔާ، 60 ޑޮލަރަށް ވިއްކި ދާނެ ކަމަށް އޭރަށް ފުވައްމުލަކަށް އަހަރެއްގެ މައްޗަށް 4.95 މިލިއަން ޑޮލަރު އެބަ ލިބޭ އެއީ ގާތްގަނޑަކަށް 89 މިލިއަން ރުފިޔާ،“
ރައީސް ނަޝީދު، ވަނީ އެކި ސިޓީތަކުން ކާބަން ކްރެޑިޓުން ފައިސާ ޖެނެރޭޓުކުރެވޭނެ މިންވަރު ކިޔައިދެއްވާފައެވެ. އެ ގޮތްތައް ބޭނުންކޮށްގެން ރާއްޖޭގެ ރަށްރަށުގައި އެކި ޕްރޮޖެކްޓުތައް ހިންގުމަށް އިންވެސްޓްމެންޓުތައް ހޯދޭނެ ކަމަށް އެމަނިކުފާނު ވިދާޅުވިއެވެ.
ރައީސް ނަޝީދުގެ ވާހަކަފުޅުގައި ވެސް ޖުމްލަ ގޮތެއްގައި ފާހަގަކުރެއްވީ ކާބަން ކްރެޑިޓަކީ ޖައްވަށް ދޫކުރާ ވިހަ ގޭސް ނުވަތަ ގްރީންހައުސް ގޭސްތަ މަދުކުރުމަށް ބައިނަލްއަގުވާމީ ގޮތުން ބޭނުންކުރާ ވިޔަފާރީގެ ހުއްދައެއް ކަމަށެވެ. އަދި މިއީ ތިމާވެށި ހިމާޔަތްކުރުމަށްޓަކައި، ގައުމުތަކާއި ބޮޑެތި ކުންފުނިތަކުން ޖައްވަށް ދޫކުރާ ކާބަންގެ މިންވަރު ކޮންޓްރޯލްކުރަން ގެންގުޅޭ ނިޒާމެއް ކަމަށްވެސް އެމަނިކުފާނުގެ ވާހަކަފުޅުގައި ސިފަކުރެއްވިއެވެ.
އިންވެސްޓްމެންޓް ފޯރަމްގެ ޕެނަލް ޑިސްކަޝަންގައި ކާބަންއާއި ގުޅޭގޮތުން ވާހަކަ ދައްކަވަމުން މީރާގެ ޑިރެކްޓަރުންގެ ބޯޑުގެ ކުރީގެ ޗެއާ އަހުމަދު ސަރުވަޝް ވިދާޅުވީ، ދުނިޔެ ހޫނުވަނީ ޖައްވުގާ ކާބަން ގިނަވެގެން ކަމަށެވެ. އެހެންކަމުން، ކާބަން ޖައްވުން މަދުކުރުމަށްޓަކައި އޮތް އެއް ހައްލަކީ ކާބަން ކްރެޑިޓް ކަމަށް އޭނާ ވެސް ވިދާޅުވިއެވެ.
އޭނާ ފާހަގަކުރެއްވީ، ޑީސަލް ޖެނެރޭޓަރަކުން ސޯލާ އެނާޖީއަށް ބަދަލުކުރުމުން އެ ސޯލާ އެނާޖީއަކުން ގެނދަބުޅި އަންދާ މިންވަރު މަދުވާނެ ކަމަށާއި އެކަމާއި ގުޅިގެން ކާބަން މަދުކުރެވޭ ކަމަށެވެ. އަދި މަދުކުރެވޭ މިންވަރަކީ ވިއްކާލެވޭނެ މިންވަރެއް ކަމަށާއި، އަދި އެ ގަންނާނެ މީހުންވެސް ތިބި ކަމަށާއި އޭގެ ތެރޭގައި ބޮޑެތި ކުންފުނިތަކާއި ބޮޑެތި ގައުމުތައް ހިމެނޭ ކަމަށް ސަރުވަޝް ވިދާޅުވިއެވެ.
އެއް ޓަނުގެ ކާބަންޑައިއޮކްސައިޑު ޖައްވުން މަދުކުރޭވޭނަމަ އެއީ ވިއްކާލެވޭނެ އެސެޓެއް ކަމަށް ސަރުވަޝް ވިދާޅުވިއެވެ. އޭނާ ވިދާޅުވީ މޫދުވިނައާއި އަދި މެންގްރޫވް ފަދަ ތަންތަނަކީ ކާބަން މަދުކުރެވޭނެ ތަންތަން ކަމަށާއި، އެފަދަ ތަންތަނުގައި ކޮންމެވެސް ކަމެއް ކޮށްގެން އެސެޓެއްގެ ގޮތުގައި ވިއްކޭނެކަން އޭނާ ފާހަގަކުރެއްވިއެވެ.
