ބޮޑެތި ފޮރިން އިންވެސްޓްމަންޓުތަކަކީ ގައުމުގެ ތަރައްގީއަށް ބޭނުންވާ ކަމެއް ނަމަވެސް، އެކަންކަމާ ގުޅޭ އެއްބަސްވުންތަކުގެ ތަފުސީލު ރައްޔިތުންނަށް ސާފުކޮށް ހާމަކުރަންޖެހޭކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ފައިސަލް މިހެން ވިދާޅުވީ, ޔޫއޭއީގެ މަޝްހޫރު ކުންފުންޏެއް ކަމަށްވާ އީގަލް ހިލްސްއާއި ގުޅިގެން ރަސްމާލޭގައި 20 ބިލިއަން ޑޮލަރުގެ މެރީނާއެއް ތަރައްގީކުރުމަށް 500 ހެކްޓަރުގެ ބިން 99 އަހަރަށް ދިނުމަށް ސަރުކާރުން ނިންމާފައިވާތީ އެކަމާ ގުޅިގެން ސޯޝަލް މީޑީއާގައި ކުރެއްވި ޕޯށްޓެއްގައެވެ.
މިފަދަ ބޮޑެތި މަޝްރޫއުތައް ހިންގާއިރު އެފަދަ އިންވެސްޓްމަންޓުތަކަށް ވެވޭ އެއްބަސްވުންތަކަކީ ގައުމަށާއި ރައްޔިތުންނަށް ފައިދާހުރި އެއްބަސްވުންތަކެއްކަން ޔަގީންކުރަންޖެހޭކަމަށް އެމަނިކުފާނު ވިދާޅުވިއެވެ.
”ބޮޑެތި ފޮރިން އިންވެސްޓްމަންޓުތަކަކީ ގައުމުގެ ތަރައްގީއަށް ބޭނުންވާ ކަމެއްކަމަށް ނަމަވެސް، އެއްބަސްވުމުގެ ތަފުސީލު ރައްޔިތުންނަށް ސާފުކޮށް ހާމަކުރަންޖެހޭ،“ ފައިސަލް ނަސީމް
ރަސްމާލޭގެ ބިމަކީ ރައްޔިތުންގެ ފައިސާއިން ހިއްކަން ފެށި ބިމެއްކަމަށް ވާއިރު އެ ބިމުން ބޮޑު ބައެއް ފޮރިން އިންވެސްޓްމަންޓަކަށް ދޭން ސަރުކާރުން ނިންމާފައިވާއިރު، އެ އެއްބަސްވުމުގެ ތަފުސީލު ރައްޔިތުންނަށް ސާފުކޮށް ހާމަކުރެވިފައިނުވާތީ އެކަމުގެ ކަންބޮޑުވުން އެމަނިކުފާނު ވަނީ ހިއްސާކުރައްވާފައެވެ.
މިވަގުތު ރާއްޖޭގެ އިގްތިސާދީ ހާލަތަށް އަލިއަޅުއްވާލައްވާ، ފައިސަލް ވިދާޅުވީ، ރާއްޖޭގެ އިގްތިސާދީ ހާލަތު އޮތީ ނާޒުކު ހާލަތެއްގައި ކަމަށާއި ދައުލަތުގެ ދަރަނި އިންތިހާއަށް ބޮޑުވެފައިވާ ދަނޑިވަޅެއްގައި ރަސްމާލެއިން ބިމެއް ބޭރުގެ އަމިއްލަ ކުންފުންޏަކަށް ދިގު މުއްދަތަކަށް ދޫކޮށްލާއިރު، އެކަމުގައި ސަރުކާރުން ވިސްނަންޖެހޭކަމަށެވެ. އެގޮތުން, އެ ބިމުގެ ހަމަ އަގު ލިބޭތޯއާއި، ދައުލަތައް ލިބޭ މަންފާތައް ލިބޭ ގޮތުގެ ޓައިމްލައިންތައް ސާފުކޮށް ރައްޔިތުންނަށް އެނގެންޖެހޭކަމަށް އެމަނިކުފާނު ވިދާޅުވިއެވެ.
އޭގެ އިތުރުން، އެކަންކަމުގެ ހުރިހާ ޒިންމާތަކާއި މާލީ ބުރައަކީ އަންނަން އޮތް އެތައް ޖީލުތަކަކަށް ދިވެހި ރައްޔިތުން އުފުލަންޖެހޭނެ ކަމެއްކަން ފާހަގަކުރައްވާ އެ އެއްބަސްވުމާ ބެހޭ ހުރިހާ މައުލޫމާތެއް ހާމަކޮށް، ރައްޔިތުންގެ ސުވާލުތަކަށް ސަރުކާރުން ޖަވާބުދާރީވާންޖެހޭކަމަށް އެމަނިކުފާނު ވިދާޅުވިއެވެ.
ފައިސަލް މިހެން ވިދާޅުވެފައިވާއިރު ރާއްޖޭގެ ތަރައްގީގެ އެންމެ ބިޔަ މަޝްރޫއުތަކުގެ ތެރޭގައި ހިމެނޭ ރަސްމާލެ މަޝްރޫއަކީ ފަހުގެ ތާރީހުގައި އެންމެ ބޮޑު ބަހުސްތަކާއި ސިޔާސީ އަދި ގާނޫނީ ސުވާލުތައް އުފެދިފައިވާ އެއް މައުޟޫއެވެ.
އަބޫދާބީގެ އީގަލް ހިލްސްއިން ރާއްޖޭގައި 20 ބިލިއަން ޑޮލަރުގެ މި މަޝްރޫއު ހިންގުމަށް ކޮމާޝަލް ޓާމްސް އެގްރީމަންޓެއްގައި ސަރުކާރާއެކު ސޮއިކުރީ ސެޕްޓެމްބަރު މަހުގެ 21 ގައެވެ. އެއީ ރާއްޖެއަށް ބޭރުގެ ފަރާތަކުން ކުރާ އެންމެ ބޮޑު އިންވެސްޓްމެންޓެވެ.
