ކުޑަކުދިންގެ ކަރާމާތަށް އުނިކަން އަންނަ ގޮތަށް އެ ކުދިންގެ ޒާތީ މައުލޫމާތު ހާމަކުރުމަކީ ގާނޫނީ ގޮތުން މަނާ ކަމެއްކަން ހަނދާންކޮށްދީ، ޖިންސީ ގޯނާ އާއި އަނިޔާ ލިބޭ ކުދިން ހިމެނޭހެން އެއްވެސް ކުޑަކުއްޖެއްގެ މައުލޫމާތު އާންމުނުކުރުމަށް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން އިލްތިމާސްކޮށްފިއެވެ.
ފެމިލީ މިނިސްޓްރީން މިފަދަ ބަޔާނެއް ނެރެފައި މިވަނީ، އިތުބާރުކުރެވޭ މަގާމެއްގައި ހުރެ ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ކުރީގެ ފޮރިން މިނިސްޓަރު އަބްދުﷲ ޝާހިދު ހައްޔަރުކޮށްފައިވާ ދަނޑިވަޅެއްގައެވެ. އެ މައްސަލައިގައި އަނިޔާ ލިބުނު ކަމަށް ބުނާ ކުއްޖާގެ ޒާތީ މައުލޫމާތާއި ކަރާމާތަށް އުނިކަން އަންނަ ފަދަ ވާހަކަތައް ސޯޝަލް މީޑިއާގެ އެކި މަންސަތަކުގައި ދައުރުވަމުންދާތީ، އެކަމާ ގުޅިގެން ކަންބޮޑުވުން ފާޅުކޮށް މިނިސްޓްރީން ވަނީ ހާއްސަ ނޫސް ބަޔާނެއް އާންމުކޮށްފަ އެވެ.
އެމްޑީޕީގެ ކުރީގެ ރައީސް އަދި ކުރިއަށް އޮތް ރިޔާސީ އިންތިހާބުގައި އެ ޕާޓީގެ ޓިކެޓަށް ވާދަކުރައްވަން ނިންމަވާފައިވާ ޝާހިދު، ކޯޓު އަމުރެއްގެ ދަށުން ހައްޔަރުކޮށް މި މަހުގެ 3 ވަނަ ދުވަހު ވަނީ ޝަރީއަތް ނިމެންދެން 30 ދުވަހުގެ މުއްދަތަކަށް ބަންދުކޮށްފަ އެވެ. ނަމަވެސް، ހައްޔަރުކުރުމުގެ ކުރިން އެ ތުހުމަތުތައް ދޮގުކުރައްވައި ޝާހިދު ވިދާޅުވެފައިވަނީ، މިއީ ސިޔާސީ މަގުސަދެއްގައި އޭނާގެ އަބުރު ކަތިލުމުގެ ގޮތުން ފަޅުވައިގެން އުޅޭ ދޮގު ތުހުމަތުތަކެއް ކަމަށެވެ.
މިނިސްޓްރީން ނެރުނު ބަޔާނުގައި ފާހަގަކޮށްފައިވާ ގޮތުގައި، ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގައި ކަނޑައަޅާފައިވާ ހަމަތަކާއި އުސޫލުތަކާ ހިލާފަށް، ކުޑަކުދިންގެ ކަރާމާތަށް އުނިކަން އަންނަ ގޮތަށް އެ ކުދިންގެ ޒާތީ މައުލޫމާތު މީޑިއާތަކުގައްޔާއި މީސްމީޑިއާގައި ހާމަކުރަމުންދާކަން ވަނީ ފާހަގަކުރެވިފަ އެވެ. އެހެންކަމުން އެފަދަ އެއްވެސް އަމަލެއް އެއްވެސް ފަރާތަކުން ނުހިންގުމަށް މިނިސްޓްރީން ވަނީ ހަރުކަށި އިބާރާތުން އަންގާފަ އެވެ.
ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީ އާއި ކަމާގުޅޭ ގާނޫނުތަކަށް އަލިއަޅުވާލައި މިނިސްޓްރީން ބަޔާންކުރި ގޮތުގައި:
- ހާއްސަ ރައްކާތެރިކަން: ކުޑަކުދިންނަކީ އާއިލާގެ ފަރާތުންނާއި، މުޖުތަމައުގެ ފަރާތުން އަދި ދައުލަތުގެ ފަރާތުން ހާއްސަ އެހީތެރިކަމާއި ރައްކާތެރިކަން ލިބެންޖެހޭ ބައެއްކަން ގާނޫނުއަސާސީގައި ސަރީހަކޮށް ބަޔާންކޮށްފައިވެ އެވެ.
- ކަރާމާތް ރައްކާތެރިކުރުން: ކުޑަކުދިންގެ ކަރާމާތަށް އެއްވެސް މިންވަރެއްގެ އުނިކަމެއް އަންނާނެ ގޮތަށް، އެ ކުދިންގެ ޒާތީ އެއްވެސް މައުލޫމާތެއް އެއްވެސް ފަރާތަކުން ހާމަކުރުމަކީ ގާނޫނީ ގޮތުން ކަނޑައެޅިގެން މަނާ ކަމެކެވެ.
- ޝާއިއުކުރުން މަނާވުން: ކުށުގެ ތުހުމަތުކުރެވޭ ކުދިންނާއި، ކުށުގެ ޝިކާރައަކަށްވާ ކުދިންގެ އިތުރުން ހާއްސަ އަޅާލުމާއި ރައްކާތެރިކަން ބޭނުންވާ އެއްވެސް ކުއްޖެއްގެ ޒާތީ މައުލޫމާތު މީޑިއާގެ އެއްވެސް ވަސީލަތެއްގައި ޝާއިއުކުރުމަކީ ކުށެކެވެ.
ގާނޫނުން މަނާކުރާ ޒާތީ މައުލޫމާތުތަކުގެ ތެރޭގައި ކުއްޖާގެ ނަމާއި، ދިރިއުޅޭ އެޑްރެހާއި، ތައުލީމު ހާސިލުކުރަމުންދާ މަދަރުސާ ނުވަތަ މަރުކަޒުގެ މައުލޫމާތު ހިމެނެ އެވެ. މީގެ އިތުރުން ސީދާ ގޮތުން ނުވަތަ ނުސީދާ ގޮތުން ނަމަވެސް އެއީ ކޮން ކުއްޖެއްކަން ދެނެގަނެވިދާނެ އެއްވެސް މައުލޫމާތެއް، އަދި އެ ކުދިންގެ ފޮޓޯ އާއި ވީޑިއޯ ފަދަ ތަކެތި އާންމުކުރުމަކީ ވެސް މަނާ ކަމެއްކަން މިނިސްޓްރީން ހަނދާންކޮށްދިނެވެ. މިފަދަ ހަރުދަނާ އުސޫލުތަކެއް ގާނޫނުގައި ކަނޑައަޅާފައިވަނީ ކުޑަކުދިންގެ އެންމެ މަތީ މަސްލަހަތު ހިމާޔަތްކޮށް، މުޖުތަމައުގެ ތެރޭގައި އެ ކުދިންނަށް ނަފްސާނީ އަދި އިޖުތިމާއީ ރައްކާތެރިކަން ކަށަވަރުކޮށްދިނުމަށެވެ.
ފެމިލީ މިނިސްޓްރީން ބުނެފައިވަނީ، ކުއްޖަކަށް ދިމާވާ އެފަދަ ހިތާމަވެރި ހާދިސާއަކާ ގުޅިގެން، ވަކި ކަމަކާމެދު އާންމުން ދެކޭގޮތަށް ނުފޫޒު ފޯރުވުމުގެ މަގުސަދުގައި ނުވަތަ އެ ނޫން ވެސް އެހެން އެއްވެސް ބޭނުމަކަށްޓަކައި، ކުއްޖާގެ ކަރާމާތަށް އުނިކަން އަންނަ ގޮތަށް ޒާތީ މައުލޫމާތު މީޑިއާގެ އެކި މަންސަތަކުގައި އާންމުކުރުމަކީ ކުޑަކުއްޖާގެ ހައްގަކަށް އަރައިގަތުމުގެ ބޮޑު އަމަލެއް ކަމަށެވެ. އެހެންކަމުން، މިފަދަ ނާޒުކު މައްސަލަތަކުގައި ވާހަކަދައްކައި ހަބަރު ފެތުރުމުގައި މުޅި މުޖުތަމައު ވެސް ގާނޫނީ އަދި އަހުލާގީ ޒިންމާ އަދާކުރުމަށް މިނިސްޓްރީން ވަނީ ގޮވާލާފަ އެވެ.
