މާލޭގައި ޓެކްސީގެ ޚިދުމަތް ދެމުންއަންނަ އަންހެން ޑްރައިވަރު އައިމިނަތު ވަޙީދާގެ ކާރަށް ގެއްލުންދިން މައްސަލާގައި މީހެއްގެ މައްޗަށް ދައުވާކޮށްފިއެވެ.
އޭނާގެ މައްޗަށް ކުރަނީ ދިވެހިރާއްޖޭގެ ގާނޫނުލްއުގޫބާތުގެ 220 ވަނަ މާއްދާގެ (ހ) ގެ (1) ވަނަ ނަންބަރާ ހަވާލާދީ، އެ މާއްދާގެ (ރ) ގެ 3 ވަނަ ނަންބަރުގެ ދަށުން މުދަލަށް ގެއްލުން ދިނުމުގެ ކުށުގެ ދައުވާ އެވެ.
ޕީޖީ އޮފީހުން އޭނާގެ މައްޗަށް އެ ދައުވާކުރަން ފޮނުވާފައި ވަނީ މިދިޔަ އޮކްޓޫބަރު މަހުގެ 27 ވަނަ ދުވަހުގެ 02:06 ހާއިރު، އައިންތު ޓެކްސީ ކުރުމަށް ގެންގުޅޭ ކާރު އިއްޒުއްދީން މަގު، ޑްރަގް ކޯޓް ކުރިމަތީގައި ޕާކް ކޮށްފައި އޮއްވާ، އެ ޓެކްސީގެ ކުރީ ބިއްލޫރިގަނޑު (ވިންޑްސްކްރީން) އަށް ގާއުކައި އެ ބިއްލޫރިގަނޑު ތަޅާލައި، އެ ކާރަށް ގެއްލުންދީފައިވާތީ އެވެ.
މިދިޔަ އޮކްޓޫބަރު މަހުގެ 26 ގައި ޕާކުކޮށްފައި އޮއްވާ އައިމިނަތުގެ ކާރަށް ގެއްލުންދީފައިވާއިރު އެއީ އޭނާގެ ކާރަށް ގެއްލުންދިން ފަސް ވަނަ ފަހަރު ކަމަށް އައިންތު ބުނެ އެވެ.
