ލޯކަލް ގަވަމެންޓް އޮތޯރިޓީގެ ބޯޑަށް އަތޮޅު ކައުންސިލުގެ ރައީސުން ތަމްސީލު ކުރުމަށް ކުރީގެ ފެނަކަ ކޯޕަރޭޝަނުގެ އެމްޑީ، ކ އަތޮޅު ކައުންސިލުގެ ރައީސް އަހުމަދު ނިމާލު އިންތިހާބަކާ ނުލައި ހޮވުނުއިރު ފޯމު ހުށަހެޅީ ލަހުންކަމަށް ބުނެ ފޯމު ރިޖެކްޓު ކުރި ނޫނު އަތޮޅު ރައީސް މުހައްމަދު ބަޝީރު ކޯޓަށް ދާން ނިންމައިފި އެވެ.
ެއަތޮޅު ކައުންސިލްގެ ތެރެއިން ނިމާލާއި އެކު އެ މަގާމަށް ވާދަ ކުރުމަށް ހުށަހެޅީ ބަޝީރު އެވެ. ނިމާލްއަކީ ކ އަތޮޅު ދާއިރާގެ ރައީސެވެ. އޭނާ އެ ދާއިރާއަށް ވާދަކުރީ އިދިކޮޅު ޕީޕީއެމްގެ ޓިކެޓުގަ އެވެ.
އިލެކްޝަންސް ކޮމިޝަންގެ ރައީސް އަހުމަދު ޝަރީފް މިއަދު ވިދާޅުވީ، އެލްޖީއޭގެ މެމްބަރުކަމަށް ހުށަހަޅާފައިވާ ފޯމުތަކުގެ ތެރެއިން 24 މޭ 2021 ވަނަ ދުވަހުގެ 14:00 ގެ ފަހުން ހުށަހަޅާފައިވާ ފޯމުތައް ބަަލައި ނުގަތުމަށް ކޮމިޝަނުން ނިންމާފައިވާ ކަމަށެވެ. އެއާއި އެކު އާއްމު ކުރި ލިސްޓުން ދައްކާ ގޮތުން ބަޝީރު ފޯމު ހުށަހަޅާފައި ވަނީ އެ ދުވަހުގެ 14:04 ގަ އެވެ.
”ސަންގު“ އަށް މައުލޫމާތު ދެއްވަމުން ބަޝީރު ވިދާޅުވީ، ގަޑި ޖެހުމުގެ ކުރިން އޭނާ ފޯމު ހުށަހަޅާފައިވާނެ ކަމަށެވެ. އަދި އީމެއިލްގެ އެއްވެސް ކަމަކާއި ގުޅޭގޮތުން އީސީއިން ވާހަކައެއް ނުދައްކާކަމަށް ބަޝީރު ވިދާޅުވި އެވެ. އެހެންކަމުން އޭނާގެ ފޯމު ބާތިލު ކުރަންޖެހޭ ސަބަބެއް އޮތްކަން ގަބޫލެއް ނުކުރާކަމަށް ބަޝީރު ވިދާޅުވި އެވެ.
ބަޝީރު ވިދާޅުވީ ރާއްޖޭގައި ކޮވިޑުގެ ހާލަތު ގޯސްވުމުގެ ސަބަބުން ފޯމުތައް ހުށަހަޅަންޖެހުނީ އޮންލައިންކޮށް ކަމަށެވެ. އަދި އިލެކްޝަންސް ކޮމިޝަންގެ ސާވާރ ގައި އެއްވެސް މައްސަލައެއް އުޅޭނަމަ އެކަން ކުރިން ފާހަގަކުރަންވާނެކަމަށް ބަޝީރު ވިދާޅުވި އެވެ. އެހެންވެ، މައްސަލަ މާދަމާ ކޯޓަށް ހުށަހެޅުމަށް ތައްޔާރުވަމުން އަންނަ ކަމަށް އޭނާ ވަނީ ވިދާޅުވެފަ އެވެ.
”އީސީ ސާވާރގައި ޑީލޭ ވެސް އުޅޭނެ. ޑިލޭސް އުޅެންޏާ އީސީން ވެސް ފާހަގަ ކުރަންވާނެ. އެހެން މީހެއްގެ އެޕްލިކޭޝަން އިން ވެސް އެގޮތަށް ޑީލޭވެ ޑެލިވާރ ވެފަ އެބައިން“ ބާއްޓޭ
ބަޝީރާއި ނިމާލުގެ އިތުރުން އެހެން މީހަކު އަތޮޅު ކައުންސިލު ތަމްސީލު ކުރަން ފޯމު ނުލާތީ ނިމާލު އޮޓޯއިން އެލްޖީއޭގެ ބޯޑަށް ހޮވިފައިވާކަން އީސީން ވަނީ އިއުލާނުކޮށްފަ އެވެ.
އަތޮޅު ރައީސުންގެ އިތުރުން ރަށު ކައުންސިލުގެ މެމްބަރަކާއި، ސިޓީ ކައުންސިލުގެ މެމްބަރެއް ވެސް އެލްޖީއޭއަށް އިންތިހާބު ކުރާނެ އެވެ. ސިޓީ ކައުންސިލުގެ މެމްބަރުންގެ ގޮތުގައި ފުވައްމުލައް ސިޓީގެ މޭޔަރު އިސްމާއިލް ރަފީގާއި މާލެ ސިޓީ މޭޔަރު ޑރ މުހައްމަދު މުއިއްޒު އަދި އައްޑޫ ސިޓީ ހުޅުދޫ ދާއިރާގެ ކައުންސިލް މެމްބަރު ހުސައިން ފައިޒުއްރަހުމާނު ފޯމު ހުށަހެޅި އެވެ. ނަމަވެސް، އޭގެ ތެރެއިން ފައިޒު ފޯމު ހުށަހެޅީ މުއްދަތު ހަމަވީފަހުން ކަމަށްވާތީ އޭނާގެ ފޯމު ވަނީ ބާތިލުކޮށްފަ އެވެ.
ލާމަރުކަޒީ ގާނޫނުގެ ދަށުން އެލްޖީއޭގެ ބޯޑުގައި ސިޓީ ކައުންސިލްގެ މެމްބަރަކާއި، އަތޮޅު ކައުންސިލް ރައީސަކާއި ރަށު ކައުންސިލުގެ މެމްބަރެއް ހުންނާނެ އެވެ. އަދި އެލްޖީއޭގެ ބޯޑަށް މެމްބަރުން ހޮވާނީ، ކައުންސިލަރުންގެ މެދުގައި ނެގޭ ވޯޓަކުންނެވެ.
