ދިވެހިރާއްޖޭގެ މިނިވަންކަން ހޯދުމަށްޓަކައި، އެންމެހާ ރައްޔިތުން އަތް ގުޅާލާއިގެން، ”ޖިހާދެއް“ ކުރަންޖެހިފައިވާކަމަށް ޕީއެންސީގެ ޕީޖީ ލީޑަރު، މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ވިދާޅުވެއްޖެއެވެ.
ދިވެހިރާއްޖެވަނީ، އިންޑިއާގެ ނުފޫޒުގެ ދަށުވެފައިކަމަށް ފާހަގަކޮށް، އިދިކޮޅު ކޯލިޝަނުން ހިންގަމުންދާ ”އިންޑިއާ އައުޓް“ ހަރަކާތް، ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ނެރުނު ގަރާރަކާއި އެކު، މަޑުޖައްސާލެވިފައިވާވަނިކޮށް، އާދަމް ޝަރީފްވަނީ، ދިވެހިރާއްޖޭގެ ސިޔާދަތީ ބާރުތައް ވިއްކާލާފައިކަމަށް ވިދާޅުވެފައެވެ. އަދި ރާއްޖެއަކީ އަޅުވެތިވެފައިވާގައުމެއްކަމަށް އިޝާރާތްކުރައްވާ އާދަމް ޝަރީފް ވިދާޅުވީ، މިނިވަންކަން ހޯދުމަށް، ދިވެހި ރައްޔިތުން އަތު ގުޅާލައިގެން ”ޖިހާދެއް“ ކުރަން ޖެހިފައިވާކަމަށެވެ.
Qaumuge siyaadhathee baaruthah vikkaali bayaku qaumuge minivandhuvas kula gadhakoh faahaga nukuraane! Qaumiyyatheh nudhiruvaane! Dhakkaanee hus bahanaa!
Qaumuge minivankan hoadhumattakai rayyithun athaa-athugulhaalai varugadha jihaadheh kuranjehey! https://t.co/f6uODcW4PR pic.twitter.com/7Uo4KiLzZl— Adam Shareef Umar (@Adamshareefz) July 25, 2022
ދިވެހިރާއްޖޭގެ މިނިވަންކަން ގެއްލިފައިވާކަމަށާއި، އެ މިނިވަންކަން ހޯދުމައްޓަކައި ދިވެހިރާއްޖޭގެ ރައްޔިތުން ގުޅިގެން ”ޖިހާދެއް“ ކުރަންޖެހިފައިވާކަމަށް ފާހަގަކުރައްވާ އިތުރަށް ވާހަކަދައްކަވަމުން އާދަމް ޝަރީފް އިޝާރާތްކުރެއްވީ، ރައީސް ސާލިހުގެ ސަރުކާރުން، ރާއްޖޭގެ މިނިވަންދުވަސް ފާހަގަނުކުރުމަށް ނިންމާފައިވާ ނިންމުމަށެވެ. އާދަމް ޝަރީފް ވިދާޅުވީ، ރައީސް ސާލިހުގެ ސަރުކާރުންވަނީ، ދިވެހި ރާއްޖޭގެ ސިޔާދަތީ ބާރުތައް ވިއްކާލާފައިކަމަށެވެ. އަދި މިނިވަންދުވަސް ފާހަގަނުކުރުމަށް ނިންމާފައިވަނީ އެ ސަބަބާއި ގުޅިގެންކަމަށްވެސް އެނާ ފާހަގަކުރައްވިއެވެ.
ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުގެ ސަރުކާރުންވަނީ، ދިވެހިރާއްޖޭގެ މިނިވަންކަން ވިއްކާލާފައިކަމަށާއި، ”ވިއްކާލި ބަޔަކު“ ގައުމެއްގެ މިނިވަންދުވަސް ކުލަގަދަކޮށް ފާހަގަނުކުރާނެކަމަށް އިޝާރާތްކުރައްވާ އާދަމް ޝަރީފް ވިދާޅުވީ، އެފަދަ އަމަލުތަކެއް ހިންގާފައިވާ ބަޔަކު، ގައުމު ދިރުވުމަށްވެސް މަސައްކަތްތަކެއް ނުކުރާނެކަމަށެވެ. އަދި ހުރިހާކަމަކަށް ދައްކަމުންދާނީ ބަހަނާތަކެއް ކަމަށްވެސް އާދަމް ޝަރީފް ފާހަގަކުރެއްވިއެވެ.
ދިވެހިރާއްޖޭގެ މިނިވަންދުވަސް ފާހަގަނުކުރުމަށް ނިންމާފައިވަނީ، ގައުމު ބަޔަކު މީހުންގެ އަތްދަށުވެފައިވުމުންކަމަށް ދޭހަވާމޭރުމަކުން އާދަމް ޝަރީފް ވިދާޅުވެފައިވާއިރު، ރައީސް ސާލިހުގެ ސަރުކާރުންވަނީ، ހަރަދު ކުޑަކުރުމުގެ ގޮތުން، ދިވެހިރާއްޖޭގެ މިނިވަންދުވަސް ފާހަގަނުކުރުމަށް ނިންމާފައިއެވެ. އެކަމަށް މާލެ ސިޓީ ކައުންސިލުގެ އިސް ބޭފުޅުންގެ ފަރާތުންވެސް ފާޑުކިޔުންތައް އަމާޒުވެފައިވެއެވެ.
