ޕާޓީގެ ރައީސް، ރައީސް މުހައްމަދު ނަޝީދު ވިދާޅުވީ ނަމަވެސް ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުނުރިއަސް ވޯޓު މަދުނުވާނެކަމަށް އެމްޑީޕީގެ އިސް ލީޑަރު ރައީސުލްޖުމްހުރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
އެމްޑީޕީގެ ކޮންގްރެސްއަށް ރައީސް ނަޝީދު ހުށަހަޅުއްވާފައިވާ ބަރުލަމާނީ ގަރާރާއި ގުޅިގެން ޕާޓީގެ ހަރުގޭގައި ދެއްކެވި ވާހަކައެއްގައި ރައީސް ނަޝީދު ވަނީ ބަރުލަމާނީ ނިޒާމަށް ރާއްޖޭގެ ވެރިކަމުގެ ނިޒާމު ބަދަލުނުކުރެވިއްޖެނަމަ ސަރުކާރަށް (ރައީސް ސާލިހަށް) 42 އިންސައްތަ ވޯޓު ގެއްލޭނެކަމަށް ވިދާޅުވެފައެވެ.
ރައީސް ނަޝީދު ވިދާޅުވީ 2018 ވަނަ އަހަރު ވޯޓް ދިނުމުގެ ހައްގު ލިބިފައިވާ މީހުންގެ %42 މީހުން ވޯޓް ދިނީ ޕީޕީއެމްއަށް ކަމަށާއި އެއީ އަދިވެސް އެމްޑީޕީގެ ސަރުކާރަކާއިއެކު މަސައްކަތް ކުރާނެ ބައެއް ނޫން ކަމަށެވެ. ވޯޓް ލުމުގެ ހައްގު ލިބިފައިވާ 233000 މީހުންގެ ތެރެއިން ޕީޕީއެމްއަށް ލިބުނު 98000 އުނިކުރީމާ ބާކީ ތިބީ 135000 މީހުން ކަމަށާއި މިބާކީ ތިބި މީހުންގެ ތެރެއިން %12 އަކީ ޖުމްހޫރީ ޕާޓީން ނަގާނެ އަދަދެއް ކަމަށް ނަޝީދު ވިދާޅުވިއެވެ.
“އެއީ 2008 ވަނަ އަހަރުން ފެށިގެން މިހާތަނަށް ބޭއްވި ހުރިހާ އިންތިހާބެއްގެ ނަތީޖާ ދިރާސާ ކުރުމުން އަންނަ އަދަދެއް. 16000 ވޯޓް ޖުމްހޫރީ ޕާޓީއަށް ލިބޭނެ.” ނަޝީދު ވިދާޅުވިއެވެ.
ދެން ބާކީ އޮންނާނެ 119000 ވޯޓް ކަމަށާއި އެމްއާރްއެމް އާއި އަދާލަތު ޕާޓީ އެއްކޮށްލުމުން އެއީ 7000 ވޯޓް ލިބޭނެ ކަމަށް ނަޝީދު ވިދާޅުވިއެވެ. އެހެންކަމުން އެމްޑީޕީއަށް ނެގެން އޮތީ 112000 ވޯޓް ކަމަށާއި ނަމަވެސް ނިޒާމީ ބަދަލު ނުގެނެވިއްޖެނަމަ އެމްޑީޕީ މެންބަރުންގެ ތެރެއިން %42 މެންބަރުން ސަރުކާރަށް (ރައީސް ސޯލިހަށް) ތާއިދު ނުކުރާނެ ކަމަށް ނަޝީދު ވިދާޅުވިއެވެ.
“އެހެންކަމުން ބާކީ އޮތީ 67000 ވޯޓް. އެއީ ޖުމްލަ ވޯޓްލާ މީހުންގެ %27”
ނަޝީދު ވިދާޅުވިއެވެ.
އެމްޑީޕީގެ ކޮންގްރެސްގެ ތެރެއިން މިކަމާއި ގުޅިގެން ރައީސް ސާލިހާއި ނޫސްވެރިން ވަނީ ރައީސް ނަޝީދު އެ ވިދާޅުވާފަދައިން ވޯޓު މަދުވާނެގެންދާނެކަމަށް ގަބޫލުކުރައްވަންތޯ ސުވާލުކޮށްފައެވެ. ޖަވާބުގައި ރައީސް ސާލިހު ވިދާޅުވީ އެ މިންވަރަށް ވޯޓު މަދުވެގެންދާނެކަމަށް ނުފެންނަކަމަށާއި އެހެން ނަމަވެސް ކޮންމެ ކެނޑިޑޭޓަކު އެމްޑީޕީގެ ފަރާތުން އިންތިހާބުގައި ވާދަކުރި ނަމަވެސް ވޯޓު ނުދޭނެ މީހުން ތިބޭނެކަމަށް ވިދާޅުވިއެވެ.
”ކޮންމެ މީހަކާއިމެދުގައިވެސް ހިތްހަމަ ނުޖެހޭ ބަޔަކު ތިބޭނެ. ޕާޓީ އެތެރޭގައިވެސް. އެގޮތުން އަޅުގަނޑު ނިކުތަސް އަދި އެހެން ބޭފުޅަކު ނިކުތަސް ވޯޓު ނުދޭނެ ބަޔަކު ތިބެދާނެ އެކަމަކު އެކަމަކު އެ ވިދާޅުވާ އަދަދަކީ ޕާޓީގެ ކެޑިޑޭޓާއި އިދިކޮޅަށް ޕާޓީގެ ތެރެއިން ނިކުންނާނެ އަދަދެއް ނޫން“
ރައީސް ސާލިހު ވިދާޅުވިއެވެ.
