ރާއްޖޭގެ ސިޔާސީ މަޝްރަހު މީގެ ކުރިން އޮތް ގޮތާއި މިހާރު އޮތް ގޮތް ވަރަށް ބޮޑަށް ބަދަލުވެފައިވާ ކަމަށާއި ސިޔާސީ މަސައްކަތަށް އައިސްފައިވާ ބަދަލާއެއްގޮތަށް މަސައްކަތުގެ ވައްޓަފާޅި ބަދަލުކުރަންޖެހޭ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
އިމްރާން ވިދާޅުވީ ރާއްޖޭގެ ސިޔާސީ މަސްރަހު މިއަދު އޮތީ 2000 އިން 2005 ވަނަ އަހަރާއި ހަމައަށް ނުވަތަ 2005 އިން 2008 ވަނަ އަހަރާ ހަމައަށް އޮތް ގޮތަކަށް ނޫން ކަމުގައެވެ. އެހެންކަމުން މިދިޔަ މުއްދަތުގައި ސިޔާސީ މަސްރަހަށް އައިސްފައިވާ ބަދަލުތަކާއި އެއްގޮތަށް އަދުގެ ސިޔާސީ މަސައްކަތުގެ ވައްޓަފާޅި ބަދަލު ކުރަންޖެހޭ ކަމަށެވެ.
Raajjeyge siyasee masrahu miadhu othee 2000 – 2005 vana ahara hama ah nuvatha 2005 – 2008 vana ahara hama ahves oiy gothakah noon.ehen kamun midhiya muhdhathugai siyasee masrahah aisfaivaa badhaluthaka ehgothah adhuge siyasee masahkathuge vattafaalhi badhalukuran jehey.
— Imran Abdulla (@ShimranAb) August 26, 2022
އިމްރާން އެގޮތަށް ވިދާޅުވެފައިވާއިރު އަދާލަތު ޕާޓީ އިން އެޕާޓީ ވަރުގަދަ ކުރުމަށް މަސައްކަތް ކުރުމަށް އެކި މަސައްކަތްތައް ކުރަމުންދާކަން ފާހަގަކޮށްލެވެއެވެ. އެގޮތުން އެޕާޓީ އިން ގެންދަނީ އެކި ރަށްރަށަށް ދަތުރުކޮށް ޕާޓީގެ އެކި މަސައްކަތްތައް ކުރަމުންނެވެ.
އަދާލަތު ޕާޓީ އަކީ މިއަދުގެ ސަރުކާރުގެ ކޯލިޝަން ޕާޓްނަރެއް ނަމަވެސް ކުރިއަށް އޮތް ރިޔާސީ އިންތިހާބުގައި އަދާލަތުން އިއްތިހާދުވާނެ ފަރާތެއް އަދި ހާމަކޮށްފައެއް ނުވެއެވެ.
ބެލެވޭ ގޮތުގައި އިމްރާންގެ ޓްވީޓް އަމާޒުވަނީ 2023 ވަނަ އަހަރުގެ ރިޔާސީ އިންތިހާބަށް ތައްޔާރު ވުމަށް ކަމުގައި ބެލެވެއެވެ. ސަބަބަކީ މީގެ ކުރިން އިމްރާން ކުރެއްވި ޓްވީޓެއްގައި 2023 ގެ މަންޒަރުގައި މަޑުމަޑުން ކުލަޖެހެން ފެށި އެކި ޕާޓީ ތަކުން ސިޔާސީ ގޮތުން ވިއްކާނެ އެއްޗިހި ރައްޔިތުންނަށް އެނގޭ ވާހަކައެވެ.
މީގެ އިތުރުން އިމްރާންވަނީ އެންމެ ގިނަ ރައްޔިތުން ބަލައިގަންނަ އެއްޗެއް ވިއްކެނީ ކޮން ޕާޓީ އަކުން ކޮން ކެންޑިޑޭޓަކަށް ތޯ ވިދާޅުވެ ސުވާލު ކުރައްވާފައެވެ.
