އެމްޑީޕީގެ ސަރުކާރުން އެ ޕާޓީގެ ރައީސް މުހައްމަދު ނަޝީދަށް ހޯދައި ނުދެވުނު އިންސާފު އެހެން މީހަކަށް ހޯދައު ނުދެވޭނެކަމަށް ކެންދޫ ދާއިރާގެ މެންބަރު އަލީ ހުސައިން ވިދާޅުވެއްޖެއެވެ.
2020، މޭއި 06 ގައި ރައީސް ނަޝީދަށް އަމާޒުކޮށް އައިއީޑީއެއް ގޮއްވާލައި ދިން ޓެރަރިޒަމްގެ ހަމަލާއަށް ދެ އަހަރު ފުރުނުއިރު އަދިވެސް އިންސާފެއް ނުލިބެ އެވެ. ހަމަލާގެ ފަހަތުގައި ވަނީ ކޮންބައެއްކަމާއި، މިއީ ކާކުގެ ފަންޑު ކުރި ހަމަލާއެއްކަން ތަހުގީގަށް ހޯދިފައި ނުވުމަކީ ގިނަ ބައެއްގެ ކަންބޮޑުވުމެކެވެ.
މައްސަލައިގައި ދިހަ މީހެއްގެ މައްޗަށް ޝަރީއަތް ކުރިޔަށްދާއިރު، އޮތް އެންމެ ބޮޑު ސުވާލަކީ އެ މީހުންގެ މައްޗަށް ކުށް ސާބިތު ކުރެވޭ މިންވަރަށް ހެކި ހުރިތޯ އެވެ. އަދި ހައްޔަރު ކުރި މީހުންގެ މައްޗަށް މީގެ ކުރިން ވެސް މިފަދަ ތުހުމަތުތައް ކުރެވުނުއިރު، އެ މައްސަލަތަކުގައި އެ މީހުން ދޫވެފައި ތިބީ ކިހިނެއްތޯ އާއި ޖަލުން މައާފު ބައެއް މީހުންނަށް ލިބުނު ގޮތާއި ގުޅޭގޮތުން މައުލޫމާތު ސާފުކޮށް ދިނުމަށް ރައީސް ނަޝީދު ވެސް ވަނީ ހުށަހަޅުއްވާފަ އެވެ.
ހަމަލާއަށް އިންސާފު ހޯދައިނުދީ ހިފެހެއްޓުން އެއީ ސަރުކާރުން ބޭނުންވާ ގޮތްކަމަށް، މަޖިލީހުގެ ނައިބު ރައީސް އީވާ ވިދާޅުވެފައި ވާތީ އެކަމަށް ތާއީދު ކުރައްވައި އަލީ ހުސެއިން ވިދާޅުވީ މި ސަރުކާރަކީ އިންސާފުގެ ވާހަކަ ދެއްކޭ ވަރުގެ ސަރުކާރެއް ނޫންކަމަށެވެ. އަދި ރައީސް ނަޝީދަށް ނުދެވުނު އިންސާފު އެހެން މީހަކަށް ސަރުކާރުން ހޯދައިދީފާނެކަމަށް ދެކުމަކީ ކުށްހީއެއް ގޮތުގައި އޭނާ ވިދާޅުވި އެވެ.
ެއެމްޑީޕީގެ ސަރުކާރުން ރައީސް ނަޝީދަށް ހޯދައި ނުދެވުނު އިންސާފެއް އެހެން މީހަކަށް ހޯދައެއް ނުދެވޭނެ. މި ސަރުކާރުން އިންސާފުގެ ވާހަކަ ދެން ރަނގަޅުވާނީ ނުދެއްކިއްޔާ https://t.co/EUg2lL8i0h
— Ali Hussain (@AleeVoice) May 7, 2023
ސީރިއަސް ބޮޑެތި، ތުހުމަތުތަކެއް ކުރެވޭ މި މައްސަލައިގައި ހިނގި އޮޕަރޭޝަންތަކަށް ފަހު ހައްޔަރު ކުރި މީހުން އަދިވެސް ތިބީ ބަންދުގަ އެވެ. އަދި އެ މީހުންގެ ޝަރީއަތްތައް ކުރިޔަށް ދާއިރު މިހާތަނަށް މައްސަލައިގެ ހުކުމެއް އައީ ހަމަލާ ދިނުމުގައި އިސްކޮށް އުޅުނު އަދި ކުށަށް އިއުތިރާފުވި އަދުހަމް އަހުމަދު ރަޝީދުގެ މައްޗަށެވެ. އިއުތިރާފުގެ އެއްބަސްވުމެއް އެކުލަވާލާފައި އޮތުމުގެ ސަބަބުން އޭނާގެ މައްޗަށް އައީ 13 އަހަރުގެ ހުކުމެކެވެ.