ރައީސް އިބްރާޙިމް މުހައްމަދު ސާލިހް އެމްޑީޕީ ބައިބައިކޮށް އިތުބާރު ގެއްލުވާލާފައިވާ ކަމަށް ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.
ހަސަން ލަތީފް ވިދާޅުވީ އެމްޑީޕީގެ އަސާސީ ގަވާއިދުގައިވަނީ ޕާޓީގެ އެންމެ އިސް ފަރާތުގެ ވާޖިބަކީ ޕާޓީގެ އެއްބައިވަންތަކަށް ގާއިމްކޮށް ޕާޓީގެ މަގްސަދުތައް ހާސިލްކުރުން ކަމަށެވެ.
ޕާޓީގެ އެއްބައިވަންތަކަން ގާއިމްކޮށް މަގްސަދުތައް ހާސިލްނުކޮށް އެއާ ހިލާފް ވަމުންދާ ކަމަށާއި އެހެންކަމުން ޕާޓީން ވަކި ކުރަންޏާ ވަކި ކުރަންވީ ރައީސް ސާލިހް ކަަމަށް ހަސަން ލަތީފް ވިދާޅުވިއެވެ.
އެމްޑީޕީގެ އަސާސީގަވާއިދުގައިވަނީ ޕާޓީގެ އެންމެ އިސްފަރާތުގެ ވާޖިބަކީ ޕާޓީގެ އެއްބައިވަންތަކަން ގާއިމުކޮށް ޕާޓީގެ މަޤްޞަދުތައް ހާސިލުކުރުންކަމުގައި. މިއާ ޚިލާފަށް ރ.ސ ވަނީ ޕާޓީގެ މަސްލަހަތު ދޫކޮށް ޕާޓީ ބައިބައިކުރައްވައި ޕާޓީގެ އިތުބާރުގެއްލުވާލާފައި. ވަކިކުރަންޏާ ވަކިކުރަންވީ ރސ pic.twitter.com/mG6wzq1bqW
— Hassan Latheef🎈 (@HassanLatheef) May 16, 2023
މެދުހެންވޭރު ދާއިރާގެ މެމްބަރު އަލީ އާޒިމް އެމްޑީޕީން ވަކިކުރި ހަބަރު ޓްވީޓްގައި ހިއްސާކުރައްވައި ހަސަންލަތީފް ވަނީ އެކަމާ ކަންބޮޑުވުން ފާޅު ކުރައްވާފައެވެ.
ހަސަން ލަތީފްގެ އިތުރުން މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީވެސް ވަނީ އާޒިމް ވަކިކުރި މައްސަލައިގައި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ.
އިމްތިޔާޒް ވިދާޅުވީ ޕާޓީ ހަލާކުކޮށް އިތުބާރު ގެއްލުވާލުވުމުގެ ފިޔަވަޅު ހައްގުވަނީ ރައީސް ސާލިހަށް ކަމަށެވެ.
ރައްޔިތުންގެ މަޖިލީހުގައި ވޯޓް ދިނުމަށް އެމްޑީޕީން އެޅި ވިޕްލައިންތަކާއި ތަކުރާރުކޮށް ހިލާފްވި މެމްބަރުން، ޕާޓީން ވަކިކުރާނެ ކަމުގެ ފަހު އިންޒާރު ފިޔަވަޅު އަޅާ ކޮމިޓީން ދިނުމާއި ގުޅިގެން އެކަމަށް ރައްދު ދެއްވައި އިމްތިޔާޒް ވިދާޅުވީ މިއީ އެމްޑީޕީއަށް ކޮރަޕްޝަންގެ ވާހަކަ ދެއްކުން ބަންދުވި 5 އަހަރު ކަމަށެވެ.
advertisment