މަޖިލީހުގައި “މަރުތަޅު” އެޅިފައި އޮންނަންޖެހޭ އެއްވެސް ހާލަތެއް ނެތްކަމަށް އެމްޑީޕީގެ ޕާލިމަންޓް ގުރޫޕުގެ ލީޑަރު މުހައްމަދު އަސްލަމް ވިދާޅުވެއްޖެއެވެ.
މަޖިލީހުގެ ރައިސް އާއި ނައިބު ރައީސްގެ އިތުބާރު ނެތްކަމުގެ މައްސަލަ އެއްފަހަރާ ހުށައެޅުމުން އިދިކޮޅުން ފަރާތްތަކުން ގަބޫލުކުރައްވަނީ ދެން މަޖިލީސް ކުރިއަށް ނުގެންދެވޭނެކަމަށެވެ. އަދި ކޮންމެވެސް އެއް މައްސަލައެއް އަލުން އަނބުރާ ގެންގޮސްގެން ނޫނީ ކުރިއަށް ނުގެންދެވޭނެކަމަށް ބުނިއެވެ. ނައިބު ރައީސްގެ އިތުބާރު ނެތްކަމުގެ މައްސަލަ ކުރިއަށް ނުގެންދެވެނީ މަޖިލީހުގެ ރައީސްގެ އިތުބާރު ނެތްކަމުގެ މައްސަލަވެސް ހުށައަޅާފައިވާތީ، މަޖިލީހުގެ ރައީސް ރިޔާސަތު ބެލެހެއްޓެވުމަށް އުޒުރުވެރިވާތީކަމަށް އިދިކޮޅާއި، އަލަށް އުފައްދާ ދަ ޑިމޮކްރެޓްސް އަދި ޖުމްހޫރީ ޕާޓީގެ މެންބަރުންވެސް ހިމެނޭ ނޫސްވެރިންގެ ބައްދަލުވުންތަކުގައި ފާހަގަކުރިއެވެ.
މި ވާހަކަތަކަށް ތާއިދުކުރައްވާ ވާހަކަދައްކަވަމުން ރައީސް ނަޝީދު ވިދާޅުވީ މީގެ ކުރިން މަޖިލީހުގެ ރައީސް އާއި ނައިބު ރައީސްގެ މައްސަލަ އެއްފަހަރާ ހުށައެޅުނު ފަހަރުތަކުގައި، ކޮންމެވެސް އެއް މައްސަލައެއް އަނބުރާ ގެންދެވީކަމަށެވެ. އަދި އެހެން ދައުރުތަކުގައި ކަން ހިނގާދިޔަގޮތް ފާހަގަކުރެއްވިއެވެ.
ރައީސުލްޖުމްހުރިއްޔާ އިބްރާހީމް މުހައްމަދު ސަލިހުގެ އަރިހުން ރައީސް ނަޝިދު އެދިވަޑައިގަތީ މަޖިލީސް ހުއްޓަވާ ނުލެއްވުމަށާއި، މަޖިލީސް ބަންދުވާ ޒާތުގެ އެއްވެސް ކަމެއް ނުކުރެއްވުމަށެވެ. ރައީސް ސާލިހަކީ އެމްޑީޕީގެ އިސް ލީޑާރުކަން ފާހަގަކޮށް ރައީސް ނަޝީދު ވިދާޅުވީ، ޕާޓީގެ އިސް ލީޑަރު މަސައްކަތް ކުރައްވަނީ ޕާޓިގެ ރައީސްގެ އިތުބާރު ނެތްކަމުގެ މައްސަލައެއް ކުރިއަށް ގެންދިއުމަށްކަމަށެވެ. އެމަނިކުފާނު ރައިސް ސާލިހު އަރިހުން އެދިވަޑައިގަތީ މިކަން ކުރުމަށް އޮންނަ އިޖުރާއަތްތަކުގެ ތެރެއިން ކުރެއްވުމަށެވެ.
ދެންގެވުމަށްފަހު، އަޅުގަނޑުގެ އިތުބާރު ނެތްކަމުގެ މައްސަލަ ހުށައަޅާށޭ، އަޅުގަނޑަށް ފެންނަ ގޮތުގައި ރައީސް މަޖިލީސް ނުހުއްޓަވާ މިކަން ކުރައްވަން އެނގިވަޑައިގަންނަވާނަމަ ހަމަ ރީތިކޮށް ގެންގޮސް އަޅުގަނޑުގެ އިތުޞާރު ނެތްކަމުގެ މައްސަލަ ކުރިއަށް ގެންދެވޭނެ.
މަޖިލީސް ހުއްޓުމަކަށް ނުގެނެސް ކުރިއަށް ގެންދެވުމަށް ރައީސް ސާލިހު އެދޭނަމަ، ނައިބު ރައީސްގެ އިތުބާރު ނެތްކަމުގެ މައްސަލަ އަނބުރާ ނެންގެވުމަށްފަހު، އެމަނިކުފާނުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް ރައީސް ނަޝީދު އެދިވަޑައިގަތެވެ.
ރައީސް ސާލިހު ވަނީ މަޖިލީހުގެ ކޮންޓްރޯލް ނަންގަވާފައިކަމަށާއި، މަޖިލީސް ކުރިއަށްދަނީ އެ ކޮންޓްރޯލްގެ ދަށުންކަމަށް ރައީސް ނަޝީދު ވިދާޅުވިއެވެ.
މި ވާހަކަތަކަށް ރައްދުދެއްވާ އަސްލަމް ވިދާޅުވީ އެއްވެސް މައްސަލައެއް އަނބުރާ ނުނަންގަވާނެކަމަށެވެ. އަދި މިކަމަށް އޮތް ހައްލަކީ ކޮބައިތޯ ބެލުމުގެ މަސައްކަތްތައް ކުރިއަށް ގެންދަވާނެކަމަށް އަސްލަމް ވިދާޅުވިއެވެ.
މަޖިލީހުގެ ގަވާއިދުތަކުގެ ދަށުން މަޖިލީހުގެ ރައީސް އާއި ހަވާލުކުރެވިފައިވާ ޒިންމާތައް ނޯޓިސް ހަމަވުމާއި ހަމައަށް ރައީސް ނަޝިދު އަދާ ކުރައްވަންޖެހޭނެކަމަށާއި، އެކަމުގައި އެއްވެސް ހުއްޖަތެއް ނުދެއްކޭނެކަމަށް އަސްލަމް ވިދާޅުވިއެވެ.
advertisment