ބައެއް ރަށްތަކަށް އުދައިގެ އަސަރުކުރުމަކީ އެކަށީގެންވާކަމެއް: މެޓް

ބައެއް ރަށްތަކަށް އުދައިގެ އަސަރުކުރުމަކީ އެކަށީގެންވާކަމެއްކަމަށް މޫސުމާއި ބެހޭ ގައުމީ އިދާރާއިން (މެޓް) އިން ބުނެފިއެވެ.

މެޓްއިން ބުނީ އުދަ އެރުން އެކަށީގެންވަނީ ދިޔަވަރު ބޮޑުވާ ވަގުތުތަކުގައިކަމަށެވެ.

މި މަހުގެ 5 ވަނަ ދުވަހު މާލެއަށް އާދަޔާ ހިލާފަށް އުދަ އަރާފައިވާއިރު، އޭގެ ސަބަބުން ކޮންމެސް ވަރެއްގެ ގެއްލުންތަކަކާއިވެސް ކުރިމަތިވިއެވެ.

ކުރިއަށް އޮތް ދުވަތަކުގައި މޫސުން ރަނގަޅުވާނެކަމަށް ބުނެފައިވީ ނަމަވެސް، ދިޔަވަރު ބޮޑުވާ ވަގުތުތަކުގައި ބައެއް ރަށްތަކަށް އުދައިގެ އަސަރުކޮށްފާނެކަމަށް މެޓް އޮފީހުން ބުންޏެވެ.

އެ އޮފީހުން ބުނެފައިވާ ގޮތުގައި، މިއަދު ވައި ޖެހޭނީ ހުޅަނގާއި ހުޅަނގު އިތުރުން ގަނޑިއަކު، 5 މޭލާއި، 15 މޭލާއި ދެމެދުގެ ބާރުމިނެއްގައެވެ. ކަނޑު އާދައިގެ ވަރަކަށް މަޑުވާނެކަމަށް ލަފާކޮށްފައިވާއިރު، ރާޅު އުސްމިން އުފުލޭނެކަމަށް ބުނެފައިވަނީ 2 ފޫޓާއި، 5 ފޫޓާއި ދެމެދުގެ މިންވަރަކަށެވެ.