އެހެން ޕާޓީތަކުން މުއިއްޒުއާއި ގުޅުމަކީ ގައުމަށް އެންމެ ފައިދާ ބޮޑު ގޮތް: ޝުޖާއު

ޕީއެންސީ/ ޕީޕީއެމްގެ ކެންޑިޑޭޓު ޑރ މުހައްމަދު މުއިއްޒުގެ ފަހަތަށް އެމްޑީޕީ ނޫން ޕާޓީތަކުން އެރުމަކީ ގައުމަށް އެންމެ ފައިދާ ބޮޑު ގޮތް ކަމަށް ޕީއެންސީގެ ނައިބުރައީސް އިބްރާހިމް ޝުޖާއު ވިދާޅުވެއްޖެއެވެ.

ރިޔާސީ އިންތިހާބުގެ ދެވަނަ ބުރު ކާމިޔާބުކުރުމުގެ ގޮތުން ކޯލިޝަން ހެދުމުގެ މަޝްވަރާތައް ކުރެވެމުންދާއިރު ޝުޖާއުވަނީ އެމްޑީޕީ ނޫން އެހެން ޕާޓީތައް ޑރ މުއިއްޒުގެ ފަހަތަށް އެރުމަކީ އެންމެ އެދެވިގެންވާ ގޮތްކަމަށް ވިދާޅުވެފައެވެ. އެގޮތުން އެމްޑީޕީ ނޫން އެހެނިހެން ސިޔާސީ ޕާޓީތަކުން ޕީއެންސީއާއިއެކު ވަޑައިގެންދެއްވުމަކީ ގައުމަށް އެންމެ ފައިދާ ބޮޑު ގޮތްކަމަށް އޭނާ ދެކިވަޑައިގަންނަވާކަން ހިއްސާކުރެެއްވިއެވެ.

ޝުޖާއު ވަނީ ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދުގެ ފުރާނައަށް އަމާޒުކޮށްްް ދިން ބޮމުގެ ހަމަލާ އާއިމެދުވެސް ވާހަކަދައްކަވާފައެވެ. އޭނާ ވިދާޅުވީ، ރައީސް ނަޝީދުގެ ގައިގައި ބައިވަރު ލަކުނު ހުރިކަމަށް އެމަނިކުފާނުވަނީ އެމްޑީޕީގެ ރިޔާސީ ޕްރައިމަރީގައި ވިދާޅުވެފައިކަމަށާއި އެ މަނިކުފާނު ދެއްކެވި އެ ވާހަކަތަކަކީ ތެދެއްކަމަށް ޝުޖާއު ފާހަގަކުރެއްވިއެވެ.

ރައީސް ނަޝީދު ރިޔާސީ ޕްރައިމަރީގައި ވިދާޅުވީ ”އެމަނިކުފާނުގެ ހަށިކޮޅުގައި ބައިވަރު ލަކުނު އެބަ ހުރި ކަމަށް“.ތެދުފުޅެއް.ބައިވަރު ލަކުނު އެބަހުރި.
ޝައްކެއްވެސް ނެތް ރައީސް ނަޝީދާއި އެމަނިކުފާނުގެ ސަޕޯޓަރުންނަށް މި5 އަހަރަކީ އުފާވެރި އަމާން 5އަހަރަކަށް ނުވި.

ވިއްކާލި ކަނޑު…

— Ibrahim Shujau (@IbrahimShujaau) September 14, 2023

އޭނާ ވިދާޅުވީ، އެ މަނިކުފާނުގެ ގައިގައި ބައިވަރު ލަކުނު ހުރިކަމަށާއި އެހެންކަމުން ރައީސް އިބްރާހިމް މުހައްމަދު ސާލިހުގެ ވެރިކަމުގެ ފަސް އަހަރަކީ ރައީސް ނަޝީދާއި އެމެނިކުފާނުގެ ސަޕޯޓަރުންނަށްވެސް އުފާވެރި އަމާން ފަސް އަހަރަކަށް ވެފައިނުވާކަމާއިމެދު ޝައްކެއްވެސް ނެތްކަމަށެވެ. ޝުޖާއު ވިދާޅުވީ، ރައީސް ސާލިހުގެ ސަރުކާރުންވަނީ ރާއްޖޭގެ ކަނޑުން ބައެއް ވިއްކާލާފައިކަމަށާއި އެހެންކަމުން އެ ބައި އަނބުރާ ހޯދުމަށާއި ވައްކަމާއި ފަސާދައިގެ ސަބަބުން ގެއްލި ގޮސްފައިވާ މިނިވަންކަން ހޯދައި ދިވެހިންގެ ރާއްޖެއެއް ބިނާކުރުމުގެ ވިސްނުން އިސްކޮށް، ލަކުނު މަދު ރައްޔިތުން ދިރިއުޅޭ ފަސްގަނޑަކަށް ރާއްޖެ ހެދުމަށް އެމްޑީޕީ ނޫން އެހެން ހުރިހާ ސިޔާސީ ޕާޓީތަކުން ޑރ މުއިއްޒު އާއިއެކު ވަޑައިގެންނެވުމަކީ ދިވެހިރާއްޖެއަަށް އެންމެ ފައިދާ ބޮޑު ގޮތްކަމަށް ދެކިވަޑައިގަންނަވާކަމަށް ވިދާޅުވިއެވެ.

ކޯލިޝަން ހެދުމުގެ ވާހަކަތައް ދެކެވެމުންދާއިރު، ޕީއެންސީ ޕީޕީއެމްއިންވަނީ އެމްއެންޕީ އާއިއެކު ކޯލިޝަން އެއް ހެދުމަށް އެއްބަސްވެފައެވެ.