ރައްޔިތުންގެ މަޖިލީހުގެ ޖަލްސާތައް ކުރިޔަށް ގެންދަން ޖެހޭ ވަގުތު ހަމަވެފައިވާކަމަށް ވިދާޅުވެ، މިއަދުގެ ޖަލްސާ ނައިބު ރައީސް އީވާ އަބްދުﷲ ނިންމާލައިފި އެވެ.
މިއަދުގެ ޖަލްސާ އީވާ ހުންނަވައިގެން ފެށިއިރު، އެމްޑީޕީގެ މެމްބަރުން ދިޔައީ ރިޔާސަތު އެހެން ބޭފުޅަކާ ހަވާލު ކުރުމަށް ގޮވާލަމުންނެވެ. އަދި އޭގެ ފަހަތުން ރައީސް މުހައްމަދު ނަޝީދާއި އީވާ ނިސްބަތްވާ ޑިމޮކްރެޓްސްގެ މެމްބަރުން އަޑުއުފުލީ ބަޖެޓުގެ މަސައްކަތް ކުރިޔަށް ގެންދިއުމަށް ބުނެ އެވެ.
އެކި މެމްބަރުން ތަކުރާރުކޮށް ނިޒާމީ ނުކުތާތައް އެދެމުން ދިޔަ ނަމަވެސް، އީވާ އެ ފުރުސަތު ނުދެއްވި އެވެ. އަދި ނިޒާމީ ނުކުތާއަށް ފުރުސަތު ދެއްވައިފި ނަމަ ވާހަކަ ދައްކަވާ މެމްބަރަށް ވުރެ ޑިމޮކްރެޓްސްގެ މެމްބަރުން އަޑުގަދަ ކުރައްވަ އެވެ. މިއަދުގެ ޖަލްސާގައި އީވާ ވަނީ ޑިމޮކްރެޓްސްގެ މެމްބަރުންނަށް ނިޒާމީ ނުކުތާ ނެންގެވުމަށް ފުރުސަަތު ދެއްވާފަ އެވެ. އެބޭފުޅުން ވިދާޅުވަމުން ގެންދެވީ، މިއަދުގެ ޖަލްސާގެ އެޖެންޑާގައި އޮތް ރައީސް ނަޝީދުގެ އިތުބާރު ނެތްކަމުގެ މައްސަލައަކީ ގަވައިދަށް ފެތޭ ގަރާރަކަށް ނުވާތީ ބޭރުކޮށްލާފައިވާ މައްސަލައެއް ކަމަށެވެ. އެހެންކަމުން އެ މައްސަލަ ދެން އިތުރަށް ކުރިޔަށް ނުގެންދެވޭނެކަމަށް މެމްބަރުން ވިދާޅުވި އެވެ.
ވާހަކަ ދެއްކެވުމަށް ފުރުސަަތު ލިބުނު މެމްބަރުންގެ ތެރޭގައި ހިމެނޭ، ތުޅާދޫ ދާއިރާގެ އެމްޑީޕީ މެމްބަރު ހިސާން ހުސެއިން ވިދާޅުވީ އީވާއަށް މިއަދުގެ ޖަލްސާގެ ރިޔާސަތު ނުބެލެހެއްޓޭނެ ކަމަށެވެ. އަދި އެހެން މެމްބަރަކަށް އެ ފުރުސަަތު ދޭން ޖެހޭކަމަށް ވެސް ވިދާޅުވި އެވެ. އެކަމަކު އެއަށް ރައްދު ދެއްވައި އީވާ ވިދާޅުވެފައި ވަނީ ނައިބު ރައީސްގެ ހައިސިއްޔަތުން އޭނާ ރިޔާސަތުގައި ހުރުމަށް އުޒުރުވެރި ނުވާނަމަ ރިޔާސަތު ބަލަހައްޓާނީ މަޖިލީހުގެ ނައިބު ރައީސްކަން ސުޕްރީމް ކޯޓުން އެނގެން އެބައޮތް ކަމަށެވެ. އެހެންކަމުން އެނާއަށް ރިޔާސަތު ނުބެލެހެއްޓޭނެ އެއްވެސް ހާލަތެއް ނެތްކަމަށް އީވާ ވިދާޅުވި އެވެ.
މިއަދުގެ ޖަލްސާ ނިންމާލުމުގެ ކުރިޔަށް އީވާ އައްޑޫ ހުޅުދޫ ދާއިރާގެ ޑިމޮކްރެޓްސް މެމްބަރު އިލްޔާސް ލަބީބްގެ ނަން ވެސް އިއްވި އެވެ. މަޖިލީހުގައި މާރާމާރީ ހިނގާފައިވާކަމަށް ވިދާޅުވެ ޖަލްސާ މެދުކަނޑާލުމަށް ފަހު، 1:15 ހާއިރު ޖަލްސާ ފެއްޓެވުމަށް ފަހު ނިންމާލިކަން އިއުލާނު ކުރީ މިއަދުގެ ވަގުތު ހަމަވިކަމަށް ވިދާޅުވެ އެވެ. އީވާ ވިދާޅުވީ ދެން މަޖިލީހުގެ ޖަލްސާއެއް އޮންނާނީ މާދަމާކަމަށާއި، އެޖެންޑާގައި ހިމެނޭނީ އަންނަ އަހަރަށް ލަފާ ކުރާ ބަޖެޓުގެ މަސައްކަތުގެ އިތުރުން، ރައީސް ނަޝީދުގެ އިތުބާރު ނެތްކަމަށެވެ.
