އޭސީސީގެ ދިރާސާ: ”ފާއިތުވި ތިން އަހަރު ރާއްޖޭގައި ކޮރޮޕްޝަންގެ އަމަލުތައް ދިޔައީ މައްޗަށް“

ފާއިތުވެ ދިޔަ ތިން އަހަރު ދިވެހިރާއްޖޭގައި ކޮރޮޕްޝަންގެ އަމަލުތައް ދިޔައީ މައްޗަށް ކަމަށް އެންޓި ކޮރޮޕްޝަން ކޮމިޝަން (އޭސީސީ) ގެ ދިރާސާއިން ދައްކައިފިއެވެ.

މި ދިރާސާގައި 722 މީހެއްގެ ފޯނު އިންޓަވިއު ނަގައިފައިވެއެވެ. އަންހެނުންނާއި ފިރިހެނުންގެ ހިއްސާވެސް ދާދި އެއް ހަމައެއްގައި ހިމަނައިގެން ހެދި މި ދިރާސާގައި، ރާއްޖޭގެ އެކި ކަންކޮޅުތަކުގައި ދިރިއުޅޭ މީހުން ހިމެނެއެވެ.

މީގެ ތެރެއިން 56 އިންސައްތަ މީހުން ގަބޫލުކުރާ ގޮތުގައި ކޮރަޕްޝަންއަކީ ރާއްޖެއަށް ދިމާވެފައި އޮތް އެންމެ ބޮޑު މައްސަލައެވެ. މި މައްސަަ ހައްލުކުރުމަށް އޭސީސީއަށް ރައްޔިތުން އިތުބާރު ކުރާ މިންވަރު ދެނެގަތުމަށް ކުރި މަސައްކަތުން ހާމަވީ މި ދިރާސާގައި ބައިވެރިވީ 50 އިންސައްތައަށްވުރެ ގިނަ މީހުން އޭސީސީއަށް އިތުބާރު ކުރާކަމެވެ. ރާއްޖެއިން ކޮރަޕްޝަން ނައްތާލުމަށް އޭސީސީއަށް އެކަށީގެންވާ މަސައްކަތްތަކެއް ނުކުރެވޭކަމަށް 47 މީހުން ގަބޫލުކުރެއެވެ. އަދި ދިރާސާގައި ބައިވެރިވި 64 ޕަސެންޓް މީހުން ގަބޫލުކުރާ ގޮތުގައި ފާއިތުވެދިޔަ ތިން އަހަރު ކޮރަޕްޝަނުގެ އަމަލުތައް ވަނީ އިތުރުވެފައެވެ.

ރައްޔިތުންގެ ހައްގުތައް ކަށަވަރުކޮށްދީ، މައްސަލަތައް ހައްލުކުރުމަށް ދައުލަތަށް ބަރޯސާވެވޭތޯ ބެލި ބެލުމުން، ދިރާސާގައި ބައިވެރިވީ 33 އިންސައްތަ މީހުން ދައުލަތަށް ބަރޯސަވާކަން ވަނީ ހާމަވެފައެވެ.

ގާނޫނު ތަންފީޒު ކުރުމުގެ ދާއިރާ އާއި ޖުޑީޝަރީގެ މުވައްޒަފުންގެ މެދުގައި އެންމެ ގިނައިން ހިންގާ ކޮރަޕްޝަނުގެ ގޮތުގައި މި ދިރާސާގެ ބައިވެރިން ފާހަގަކޮށްފައިވަނީ ޖިނާއީ މައްސަލަތަކުގައި ހައި ޕްރޮފައިލް މީހާގެ މައްސަލައާއި ދެރަ ނިކަމެތި މީހާގެ މައްސަލަ ނިންމުމުގައި ތަފާތު ކުރުން ގެންގުޅުމާއި، އެ ފަރާތްތަކަށް ލިބިދީފައިވާ ގާނޫނީ ބާރުގެ ބޭނުންކޮށްގެން، ތުހުމަތު ކުރެވޭ މީހުންގެ ކުށުގައި ނުބެދި ސަލާމަތްކޮށްދިނުމަށް މަސައްކަތް ކުރުމާއި އަދި ޕްރޮސިކިއުޝަން މަރުހަލާ ނިންމިޔަ ނުދިނުމަށް ނުފޫޒު ފޯރުވުމެވެ.

ދައުލަތުގެ އަދި ދައުލަތް ހިއްސާވާ ކުންފުނިތަކުގައި ހިންގާ ކޮރަޕްޝަނުގެ ކުށްތަކުގެ ތެރޭގައި ނުފޫޒުން މުވައްޒަފުން ހޮވުމާއި ވަޒީފާއިން ވަކި ކުރުމާއި ޕްރޮމޯޝަން ދިނުމާއި، ރިޝްވަތާއި ހަދިޔާ ބަލައިގަނެ، ކޮންޓްރެކްޓުތައް ވަކި ބަޔަކަށް ފައިދާވާ ގޮތަށް ހަވާލުކުރުމާއި އަދި ދައުލަތުގެ މުދާ އަމިއްލަ މަންފާއަށް ބޭނުންކުރުންވެސް ފާހަގަކޮށްފައިވެއެވެ.

މުވައްޒަފުންގެ މެދުގައި އެންމެ ގިނައިން ހިންގާ ކޮރަޕްޝަނަށް މަގުފަހިވާ ކަންކަމުގެ ގޮތުގައި ގާތް ފަރުދީ ގުޅުން އޮންނަ ފަރާތްތަކަށް ޚިދުމަތް ދިނުން އަވަސް ކުރުމާއި ވަޒީފާއަށް މުވައްޒަފުން ނެގުމާއި ވަކިކުރުމާއި ޕްރޮމޯޝަން ދިނުމުގައި ނުފޫޒު ފޯރުވުން ހިމެނެއެވެ.