އަޒުލުކުރުމާއި ދެކޮޅަށް އިހުތިޖާޖަށް ނުކުތުމަށް ގޮވާލައިފި

ރައީސް ޑރ މުހައްމަދު މުއިއްޒު އަޒުލުކުރުމާއި ދެކޮޅަށް އިހުތިޖާޖުކުރުމަށް ކުރީގެ ހޯރަފުށީ ދާއިރާގެ މެންބަރު މުހައްމަދު އިސްމާއިލް ގޮވާލައްވައިފިއެވެ.

ރައީސް މުއިއްޒު އާއި އެމަނިިކުފާނުގެ ނައިބުރައީސް ހުސައިން މުހައްމަދު ލަތީފް މަގާމުން ދުރުކުރުމަށްޓަކައި އެމްޑީޕީއިން ބައެއް އިސްލާހުތައް ގެނައުމުގެ މަސައްކަތްތައް ކުރަމުންދާއިރު، މުހައްމަދު އިސްމާއިލްވަނީ އެކަމާއި ގުޅޭގޮތުން އެކްސްގައި ޕޯސްޓެއް ހިއްސާކުރައްވާފައެވެ.

އޭނާ ވިދާޅުވީ، ރައީސް މުއިއްޒުއަށް އެ މަގާމު ހަވާލުކުރެއްވީ ދިވެހި ރައްޔިތުންކަަމަށާއި އެއީ އެމްޑީޕީގެ ސުޕަރ މެޖޯރިޓީ އޮތް ރައްޔިތުންގެ މަޖިލީހުން ނިންމާފައިވާ ނިންމުމެއް ނޫންކަމަށް އޭނާ ވިދާޅުވިއެވެ. މުހައްމަދު އިސްމާއިލް ވިދާޅުވީ، ރައީސުލްޖުމުހޫރިއްޔާއަކު އަޒުލުކުރުމުގެ ގާނޫނަށް އިސްލާހު ޑިމޮކްރެސީގެ އަސާސްތަކާއި ރާއްޖޭގެ ގާނޫނުއަސާސީގެ ރޫހާއިވެސް ހިލާފަށްކަމަށެވެ.

މުހައްމަދު އިސްމާއިލް ވިދާޅުވީ، އެމްޑީޕީއިން ހުށައަޅާފައިވާ އިސްލާހުން ސުޕްރީމް ކޯޓުގެ ބާރުތައް ކެނޑިގެންދާކަމަށެވެ. އެހެންކަމުން އެކަމާއި ދެކޮޅަށް ދިވެހި ރައްޔިތުން ނުކުމެ މަޖިލީސް ދޮށުގައި ސުލްހަވެރިކަަމާއިއެކު މަގުސަދު ހާސިލުވާންދެން ދިގު ދެމިގެންދާ އިހުތިޖާޖެއް ކުރުމަށް އޭނާ ގޮވާލެއްވިއެވެ.