މިއީ އެންމެ ފުރިހަމައަށް ލާމަރުކަޒީ ނިޒާމު ތަންފީޒު ކުރާ ސަރުކާރު: ޝިޔާމް

މި ސަރުކާރުން ދަނީ ރާއްޖޭގައި ވަރަށް ފުރިހަމައަށް ލާމަރުކަޒީ ނިޒާމު ތަންފީޒުކުރަމުންކަމަށް މަހާއި ކަނޑުތަކާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

ޝިޔާމް މިހެން ވިދާޅުވީ މާލެ ސިޓީ މޭޔަރުކަމަށް ޕީއެންސީގެ ޓިކެޓުގައި ވާދަ ކުރައްވާ އައިޝަތު އާޒިމާ ޝަކުރޫގެ ކެމްޕެއިން ޖަލްސާގައި ވާހަކަދައްކަވަމުންނެވެ. ޝިޔާމް ވިދާޅުވީ ކުރީ ސަރުކާރުންވެސް ލާމަރުކަޒީ ނިޒާމުގެ ވާހަކަދެއްކިކަމަށެވެ. ނަމަވެސް ނަތީޖާއެއް ނެރެދެވިފައި ނުވާކަމަށާއި، ފެނިގެންދިޔައީ އެ ނިޒާމަށް ކޮންޓްރިބިއުޓް ކުރަން ޖެހުމުން ސަރުކާރުން ފަހަތަށް ޖެހެމުންދިޔަ މަންޒަރުކަމަށް ޝިޔާމް ވިދާޅުވިއެވެ. އަދި ލާމަރުކަޒީ ނިޒާމު ތަންފީޒުކުރުމަށް ސަރުކާރުން ހުރަސް އެޅިކަމަށްވެސް ޝިޔާމް ވިދާޅުވިއެވެ.

ނަމަވެސް މިހާރު އޮތީ ހާލަތު ބަދަލުވެފައިކަމަށް ފާހަގަކޮށް ޝިޔާމް މި ސަރުކާރު ސިފަ ކުރެއްވީ އެންމެ ފުރިހަމައަށް ލާމަރުކަޒީ ނިޒާމު ތަންފީޒު ކުރަމުންދާ ވެރިކަމެއްގެ ގޮތުގައެވެ. އޭނާ ވިދާޅުވީ ރާއްޖޭގައި އެންމެ ރަނގަޅަށް ހިންގަމުންދިޔަ ކައުންސިލްގެ މޭޔަރަކަށް ހުންނެވި މިހާރުގެ ރައީސުލްޖުމްހުރިޔާ ޑރ މުހައްމަދު މުއިއްޒު ރާއްޖޭގެ ހުރިހާ ރައްޔިތުން ބޭނުންވާ ހިދުމަތް އެންމެ ފުރިހަމަ ގޮތުގައި ފޯރުކޮށްދެއްވުމުގެ މަސައްކަތް ކުރައްވާނެކަމަށެވެ.

އެ ނިޒާމަށް ފައްކާ ބޭފުޅެއް، އެ ނިޒާމަށް ފަރިތަ ބޭފުޅެއް، އެ ނިޒާމަށް ހިނގާނެ ގޮތް ރަނގަޅަށް އެނގިވަޑައިގަންނަވާ، އެކަމުގައި އަމަލީ ގޮތުން މަސައްކަތް ކުރެއްވި ބޭފުޅެއް މިއަދު ރައީސުލްޖުމްހޫރިއްޔާއަކަށް ހުންނެވީ،

ޝިޔާމް ވިދާޅުވިއެވެ.