20 ވަނަ ރައްޔިތުންގެ މަޖިލީހަށް ވާދަ ނުކުރަން ތުޅާދޫ ދާއިރާގެ މެންބަރު ހިސާން ހުސައިން ނިންމަވައިފިއެވެ.
މިކަން ހާމަ ކުރައްވާ އެކްސްގައި ހިއްސާ ކުރެއްވި ޕޯސްޓެއްގައި ހިސާން ވަނީ ތުޅާދޫ ދާއިރާ ތަމްސީލުކުރަން ދާއިރާގެ ރައްޔިތުން އޭނާ ދެއްވި ފުރުސަތަށް ޝުކުރު އަދާ ކުރައްވާފައެވެ. އަދި އޭނާގެ މަސައްކަތުގެ އެހީތެރިވެދިން ފަރާތްތަކަށްވެސް ޝުކުރު އަދާ ކުރެއްވިއެވެ.
ކުރިއްޔަށް އޮތްތަނުގައިވެސް އެމްޑީޕީއާއިއެކު ހުންނާނެކަމުގެ ޔަގީންކަން އަރުވާ ހިސާން ވިދާޅުވީ، 2024 ވަނަ އަހަރުގެ ރައްޔިތުންގެ މަޖިލީހަށް އަޅުގަނޑު ކުރިމަތި ނުލާން ނިންމާފައިވާކަމަށެވެ.
އުފާވެރި އައު އަހަރެއްގެ ހެޔޮ އެދުންތަށް އެންމެހައި ބޭފުޅުންނަށް އަރިސްކުރަން. ތުޅާދޫ ދާއިރާ ތަމްސީލުކުރަން ދާއިރާގެ ރައްޔިތުން އަޅުގަނޑަށް ދެއްވި ފުރުސަތަށް ދާއިރާގެ އެންމެހައި ބޭފުޅުނަށް ހިތުގެ އެންމެ ފުންމިނުން ޝުކުރުއަދާކުރަން. އަދި އަޅުގަނޑުގެ މަސައްކަތުގެ އެހީތެރިވެދެއްވި…
— Hisaan 🎈؟ (@hisaanhussain) January 3, 2024
ނަމަވެސް އުންމީދަކީ ރައްޔިތުންނަށް ހިދުމަތްކުރުމުގައި ދެމިހުރުންކަމަށް ހިސާން ވިދާޅުވިއެވެ.
ޖުޑިޝަލް ސަރވިސް ކޮމިޝަން (ޖޭއެސްސީ) ގެ ރައީސްކަންވެސް ކުރައްވަމުން ގެންދަވާ ހިސާންއަކީ އެމްޑީޕީގެ އިސް ސަފުގައި ހަރަކާތްތެރިވަމުން އަންނަ މެންބަރެކެވެ.
ހިސާން ވަނީ ކުރީގެ ރައީސް މުހައްމަދު ނަޝީދުގެ ވަކީލުންގެ ޓީމުގައި އިސް ވަކީލެއްގެ ގޮތުގައިވެސް ހަރަކާތްތެރިވެފައެވެ. އަދި ރައީސް ނަޝީދުގެ ސަރުކާރުގައި ރައީސް އޮފީހުގެ ލީގަލް އެފެއާޒް ޑިޕާޓްމަންޓްގެ ހެޑްކަންވެސް ކުރެއްވިއެވެ.
މީގެ އިތުރުން، 2018 ވަނަ އަހަރުގެ ރިޔާސީ އިންތިހާބު ބާތިލް ކުރަން ކުރީގެ ރައީސް އަބްދުﷲ ޔާމީން ހުށަހެޅުއްވި މައްސަލައިގައި އިދިކޮޅު ތަމްސީލް ކުރެއްވީ ހިސާންއެވެ.
advertisment