ޕީއެންއެފްގެ ޖަލްސާ ހުއްޓުވުމަށް ސަރުކާރުން މަސައްކަތް ކުރަމުންދާ ކަމަށް ކުރީގެ ކޮމިއުކޭޝަންސް މިނިސްޓަރ މުހައްމަދު މަލީހް ޖަމާލް ތުހުމަތު ކުރައްވައިފިއެވެ.
މަލީހު އެކްސްގައި ހިއްސާ ކުރެއްވި ޕޯސްޓެއްގައި ވިދާޅުވީ ޕީއެންއެފްގެ ޖަލްސާތައް ހުއްޓުވުމަށްޓަކައި ސަރުކާރުން އަންގައިގެން ސްޓެލްކޯގެ އެމްޑީ ގިޔާސުއްދީން ސްކޫލު ހޯލަށް ކަރަންޓު ނުދީ ހިފަހައްޓައިފައިވާކަމަށެވެ. މަލީހު ވިދާޅުވީ ރޭ ކަރަންޓުދޭން އައި ކުއްޖާވެސް ހުއްޓުވައިފައި ވާކަމަށެވެ.
މަލީހު ވިދާޅުވީ މިރޭގެ ޕީއެންއެފް ޖަލްސާ ކަނު އަނދިރީގައި ބާއްވަން ޖެހުނު ނަމަވެސް ބާއްވާނެ ކަމަށެވެ. ޕީއެންއެފް އުފެއްދުމުގެ ޖަލްސާ ކެންސަލް ކުރުމަށް ފަހު މިރޭ ބައްދަލުވުން އޮންނާނެކަމަށް އަނެއްކާވެސް އެ ޕާޓީގެ ފަރާތުން ވަނީ އިއުލާނުކޮށްފައެވެ.
ޕީއެންއެފް ޖަލްސާ ހުއްޓުވަން ސަރުކާރުން ދަނީ މަރުފަލި ޖަހަމުން. ސަރުކާރުން އަންގައިގެން ސްޓެލްކޯ އެމްޑީ ޣިޔާސުއްދީން ސްކޯލް ހޯލަށް ކަރަންޓުނުދީ ހިފަހައްޓާފަ ވަނީ. ރޭގަ ކަރަންޓު ދޭން އައި ކުއްޖާވެސް ހުއްޓުވި. ކަނު އަނދިރީގަވެސް މިރޭ ޕީއެންއެފް ޖަލްސާ ބާއްވާނަން. @STELCOMALDIVES
— Mohamed Maleeh Jamal (@maleehjamal) April 9, 2024
ޕީއެންއެފް އުފެއްދެވުމުގެ މަސައްކަތް މި އަހަރުގެ ފަހުކޮޅު ފެށި ނަމަވެސް، 3000 މެމްބަރުންގެ ސޮއި ހަމަކޮށް ހުށަހެޅުން ލަސްވެ އެ ހުއްދަ ލިބުނީ މިދިޔަ ބުރާސްފަތި ދުވަހު އެވެ. ރައީސް ޔާމީން ތުހުމަތު ކުރައްވާ ގޮތުން ޕީއެންއެފްގެ ރެޖިސްޓްރޭޝަންގެ ހުއްދަ ލިބުން ލަސްވީ ސަރުކާރުން އެކަމަށް ހުރަސް އެޅުމުންނެވެ.
ޕާޓި އުފެއްދުމުގެ ޖަލްސާ މިމަހުގެ 08 ވަނަ ދުވަހު ބޭއްވުމަށް މަސައްކަތް ކުރިނަމަވެސް ފަސް ކުރަން ޖެހުނީ އިލެކްޝަންސް ކޮމިޝަނަށް ދޭން ޖެހޭ މުއްދަތު ނުދިނުމާއި ބައެއް އިންތިޒާމުތައް ހަމަނުޖެހުމުންނެވެ. އަދި ރައީސް ޔާމީން ޖަލްސާގައި ބައިވެރިވާނެކަމަށް ޕީއެންފްގެ އިސް ބޭފުޅުން ވިދާޅުވި ނަމަވެސް އެނގިފައިވާ ގޮތުން ކަރެކްޝަނުން އެ ހުއްދަ ދޫނުކުރެ އެވެ.
ސިޔާސީ ހަރަކާތެއްގައި ބައިވެރިވުމަށް ރައީސް ޔާމީނަށް އެއްވެސް ހުއްދައެއް ދޫކޮށްފައި ވޭތޯ، ސުވާލު ކުރުމުން ކަރެކްޝަނުން ބުނެފައި ވަނީ އެފަދަ އެއްވެސް ހުއްދައެއް ނުދޭ ކަމަށެވެ. ނޫސްވެރިން ގުރޫޕުގައި އެކަން ފާހަގަކުރުމުން، މަލީހު އަލުން އަނެއްކާވެސް ފޮނުވި މެސެޖުގައި ވިދާޅުވެފައި ވަނީ ރައީސް ޔާމީން ޖަލްސާގައި މާދަމާ ރޭ ބައިވެރިވާނެ ކަމަށެވެ.
މިރޭ ޖަލްސާ ބާއްވާނެ ކަމަށް މަލީހު ވިދާޅުވެފައިވާއިރު އެ ޖަލްސާގައި 300 މީހުން ހަމަ ނުވާ ނަމަ ޖަލްސާ ނުބޭއްވޭނެއެވެ.