ރާއްޖޭގައި މަސައްކަތް ކުރާ ބިދޭސީންނަށް ހާއްސަކޮށް ދީނީ ދަރުސް ދިނުމުގެ ޕްރޮގްރާމެއް ފަށައިފި އެވެ.
އިސްލާމިކް މިނިސްޓްރީން މީގެ ކުރިން ކުރި އިއުލާނާއި އެއްގޮތަށް، ދަރުސް ދިނުމުގެ ޕްރޮގްރާމެއް މިއަދު ކުރިޔަށް ގެންގޮސްފައި ވަނީ ބަންގްލަދޭޝްގެ ރައްޔިތުންނަށް ހާއްސަކޮށެވެ.
Religious lecture for Bangladesh nationals#MasjidDarusExpat pic.twitter.com/WdJ72UlZAS
— Ministry of Islamic Affairs (@MVIaffairs) May 3, 2024
ރާއްޖޭގައި ދިރިއުޅޭ ބަންގްލަދޭޝްގެ މުސްލިމުންނަށް ދީނީ ހޭލުންތެރިކަން އިތުރު ކުރުމުގެ ޕްރޮގްރާމްތައް ހިންގުމަށްޓަކައި ބެންގާލީ ބަހުން ދަރުސް ދޭނެ ދީނީ އިލްމުވެރިންގެ ޕޫލެއް އެކުލަވާލުމުގެ މަސައްކަތް އިސްލާމިކް މިނިސްޓްރީން ފެށީ މިދިޔަ މާޗު މަހުގެ ތެރޭގަ އެވެ. އެކަމާ ގުޅޭގޮތުން މިނިސްޓްރީން ކުރި އިއުލާނުގައި ވަނީ ރާއްޖޭގައި ދިރިއުޅޭ ބަންގްލަދޭޝްގެ މުސްލިމުންނަށް ދަރުސްތައް ދިނުމުގައި ދީނީ ހޭލުންތެރިކަން އިތުރުކުރުމުގެ ޕްރޮގްރާމްތައް ހިންގުމަށް ބެންގާލީ ބަހުން އެ މަސައްކަތް ކުރެވޭނެ އިލްމުވެރިންގެ ޕޫލެއް އެއް އަހަރު ދުވަހުގެ މުއްދަތަށް އެކުލަވައިލަން ބޭނުންވާ ކަމަށެވެ.
ބެންގާލީ ބަހުން ހިންގާ ދީނީ ހޭލުންތެރިކަމުގެ ސެޝަނަކަށް 500 ރުފިޔާ އަދި ދިވެހި ބަހުން ބެންގާލީ ބަހަށް ތަރުޖަމާކުރާ ކޮންމެ ދީނީ ދަރުސަކަށް 1،000 ރުފިޔާ ލިބޭނެކަމަށް އެ އިއުލާނުގައި ވެއެވެ.
މީގެއިތުރުން އެއިއުލާނުގައި ވަނީ މިކަމަށް ކުރިމަތިލާ މީހުންގެ ޝަރުތުތަކުގެ ތެރޭގައި، ސުންނީ މުސްލިމަކަށް ވުމާއި އިސްލާމިކް މިނިސްޓްރީން ގަބޫލުކުރާ ޔުނިވާސިޓީއަކުން ދީނީ އިލްމުން މަދުވެގެން ފުރަތަމަ ޑިގްރީ ހާސިލް ކޮށްފައިވުމުގެ އިތުރުން ދީނީ އެއްބައިވަންތަކަމުގެ ގާނޫނާ ހިލާފު ވެގެން ޝަރުއީ ކޯޓަކުން އެއްވެސް ހުކުމެއް ސާބިތުވެފައި އޮތް މީހަކަށް ވެގެން ނުވާނެ ކަމަށެވެ.