ފެނަކައިން ހިންގި ފެނާ ނަރުދަމާގެ މަޝްރޫއުތައް އެމްޑަބްލިއުއެސްސީއަށް

އިމާރާތްކުރުމާއި ބިނާރާ ބެހޭ ވުޒާރާއިން “އެކްސް” ގައި ޕޯސްޓެއް ހިއްސާކުރައްވާ ބުނެފައި ވަނީ ފެނަކައިން ރަށްރަށުގައި ހިންގަމުންދާ ފެނާއި ނަރުދަމާގެ މަސައްކަތްތައް އެމްޑަބްލިއުއެސްސީއާ ހަވާލުކުރުމަށް ފެނަކައާ އެކު މަޝްވަރާ ބައްދަލުވުމެއް ބާއްވާފައިވާ ކަމަށެވެ.

މި ވުޒާރަގެ މިނިސްޓަރ އޮފް ސްޓޭޓް އަދި ޓެކްނިކަލް ޓީމުން @MWSC_Official އަދި @TeamFenaka ގެ މެނޭޖިންގ ޑިރެކްޓަރުންނާއި ބައްދަލު ކުރައްވައި، ފެނަކައިން ހިންގަމުންދިޔަ ފެނާއި ނަރުދަމާ މަޝްރޫޢުތަށް MWSC އާ ހަވާލު ކުރުމުގެ މަސައްކަތާއި ގުޅޭގޮތުން މަޝްވަރާ ކުރައްވައިފި#mociwatsan pic.twitter.com/dHAlYZe6pn

— Ministry of Construction and Infrastructure (@MoCImv) May 2, 2024

އެ ވުޒާރާއިން ބުނެފައިވަނީ މި މަޝްވަރާ ބައްދަލުވުމަކީ ފެނަކައިން ހިންގަމުންދިޔަ ފެނާއި ނަރުދަމާގެ މަޝްރޫއުތައް ފެން ކުންފުންޏާއި ހަވާލުކޮށް ކުރިއަށް ގެންދިޔުމަށްޓަކައި ޓެކްނިކަލް ލެވަލްގެ މަޝްވަރާ ބައްދަލުވުމެއް ކަމަށެވެ. ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ވަނީ ރާއްޖޭގެ މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާ އެޅުމުގެ މަޝްރޫއުތައް ހިންގާ ނިންމަވާނެ ކަމަށް ވިދާޅުވެފައެވެ. އެހެން ނަމަވެސް 2020 ވަނަ އަހަރާއި 2021 ވަނަ އަހަރު ފެނަކަ އާއި ހަވާލުކުރި މިފަދަ މަޝްރޫއުތައް ނުނިމި ގިނަ ދުވަސްތަކެއް ވަނީ ވެފައެވެ.

ބައެއް ރަށްތަކުގައި މި މަޝްރޫއުތައް ފަށާގައި މެދުކަނޑާލާފައިވާއިރު އަނެއް ބައި ރަށްތަކުގައި މަޝްރޫއުގެ މަސައްކަތް އެއްގޮތަކަށްވެސް ނުފަށާކަމަށް މިސަރުކާރުން ވެސް ވަނީ ވިދާޅުވެފައެވެ. އެހެންކަމުން ފެނަކަ އިން ކުރިއަށް ގެންދިޔަ 16 ރަށެއްގެ ފެނާއި ނަރުދަމާގެ މަޝްރޫއު މިހާރު އެމްޑަބްލިއުއެސްސީ އާ ހަވާލުކުރުމަށް މި ބައްދަލުވުމުގައި ވަނީ މަޝްވަރާކޮށް ނިންމާފައެވެ.