އިތުރު ދައުރެއް ހޯއްދެވުމަށް ކެމްޕެއިން ކުރައްވަމުންދާ އެމެރިކާގެ ރައީސް ޖޯ ބައިޑެންއަށް ކޮވިޑް ޖެހިއްޖެއެވެ.
ލަސްވޭގަސްގައި ކެމްޕެއިން ކުރައްވަމުންދަނިކޮށް ބައިޑެންއަށް ކޮވިޑް ޖެހިފައިވާކަން އެމެރިކާގެ ރައީސް އޮފީސް ވައިޓްހައުސްއިންވަނީ ކަށަވަރުކޮށްދީފައެވެ. ވައިޓްހައުސްއިން ބުނެފައިވާގޮތުން ބައިޑެންއަކީ ދެ ފަހަރެއްގެ މަތިން ބޫސްޓާރ ޖައްސަވައިގެން ހުންނެވި މީހެކެވެ. އަދި އޭނާގެ ކިބައިން ބަލީގެ އަލާމާތްތައް ފެންނަނީ ދަށް މިންގަނޑަކަށް ކަމަށްވެސް މައުލޫމާތު ދީފައިވެއެވެ.
މިކަމާއި ގުޅިގެން ބައިޑެންވަނީ ސެލްފް އައިސަލޭޝަންއަށް ވަޑައިގެންފައެވެ. އެހެންކަމުން މި ދުވަސްކޮޅަށް ކުރިއަށް ގެންދިއުމަށް ހަމަޖެހިފައިވާ ހަރަކާތްތައްވެސް ކެންސަލްވެފައިވާކަމަށް ރިޕޯޓުތަކުގައިވެއެވެ.
ބައިޑެންއަށް މި ގޮންޖެހުންތައް ކުރިމަތިވެފައިވަނީ ވާދަވެރި ކެންޑިޑޭޓު ކުރީގެ ރައީސް ޑޮނަލްޑް ޓްރަމްޕުގެ ކެމްޕެއިން މަސައްކަތްތަކުގެ ފޯރި އިތުރުވެ އޭނާއަށް ތާއީދު އިތުރުވެފައިވާކަމަށް ފެނިގެންދާ ދުވަސްވަރެއްގައެވެ. ޓްްރަމްޕުގެ ފުރާނައަށް ހަމަލާއެއް އަމާޒުކޮށްފައިވެއެވެ.
ވައިޓް ހައުސްއިން ބުނެފައިވާގޮތުން ބައިޑެން ދުވަސްކޮޅެއް ވަންދެން ހުންނަވާނީ ޑެލަވެއަރގައި ހުންނަ ބީޗް ހައުސްއެއްގައިއެވެ. އެހެންނަމަވެސް މިކަމުގެ ސަބަބުން ކެމްޕެއިންއާއި ދުރުގައި ހުންނަވާނީ ކިތައް ދުވަސްކަމެއް ސާފުނުވާކަމަށްވެސް ބުނެފައިވެއެވެ.
