ހުޅުމާލެ ސެންޓްރަލް ޕާކު ކައިރުން ބާރު ސްޕީޑުގައި ދުއްވި ސްޕޯޓްސް ކާރަކުން ޖެހި ޒުވާނަކު މަރުވި މައްސަލައިގައި އެ ކާރު ދުއްވި މީހާގެ މައްޗަށް ދައުވާކޮށްދޭން އެދި ޕްރޮސެކިއުޓަރ ޖެނެރަލްގެ އޮފީހަށް ފުލުހުންނަށް ހުށަހަޅައިފި އެވެ.
މިދިޔަ މަހު ހިނގި އެކްސިޑެންޓުގައި ކާރު ދުއްވަން އިން މުހައްމަދު ވިސާމް ސިދުގީ ހައްޔަރުކޮށް އޭނާ ހުރީ ޝަރީއަތް ނިމެންދެން ބަންދުގަ އެވެ.
މައްސަލައިގައި ފުލުހުން ބުނީ ވިސާމްގެ މައްޗަށް ދައުވާކޮށްދޭން އެދި ޕީޖީއަށް ފޮނުވާފައި ވަނީ ހޮނިހިރު ދުވަހު ކަމަށެވެ.
އެކްސިޑެންޓު ހިނގުމާއި އެކު، ސައިކަލް ދުއްވަން އިން އުމުރުން 23 އަހަރުގެ ހަސަން ސަމާހު ނިޔާވެފައި ވަނީ ހުޅުމާލެ ހޮސްޕިޓަލަށް ގެންގޮސް ފަރުވާދެނިކޮށެވެ.
ސެންޓްރަލް ޕާކް ކައިރީގައި ހުންނަ އުރީދޫ އޮފީސް އިމާރާތާ ދިމާލުން ހިނގި އެ އެކްސިޑެންޓުގައި ޒުވާނާ މަރުވީ ބޮލަށް ލިބުނު އަނިޔާތަކުގެ ސަބަބުންނެވެ.
ހަފްތާ ބަންދުތަކުގައި ހުޅުމާލޭގައި ސްޕޯޓްސް ކާރުތައް ބާރަށް ދުއްވައި އާންމުންނަށް ނުރައްކާވާ ގޮތަށް ދުއްވާ ކަމުގެ ޝަކުވާ އަބަދުވެސް ބޮޑެވެ.
މައްސަލައިގައި ވިސާމް ބަންދު ކުރީ ހުޅުމާލެ މެޖިސްޓްރޭޓު ކޯޓުންކަމަށް ވާތީ އޭނާގެ ފަރާތުން އެ ނިންމުން ބާތިލުކޮށްދޭން އެދި ހައިކޯޓަށް ވެސް ހުށަހެޅި އެވެ. ކޯޓުތަކާއި ބެހޭ ގާނޫނުގެ ދަށުން މަރުގެ މައްސަލަތައް ބެލުމުގެ އިހުތިސާސް މެޖިސްޓްރޭޓު ކޯޓުތަކަށް ނޯންނާނެތީ، ހުޅުމާލޭގެ އެކްސިޑެންޓުގައި މީހަކު މަރުވުމުން ބަންދާއި މެދު ގޮތެއް ނިންމުމުގެ ބާރު ހުޅުމާލެ މެޖިސްޓްރޭޓު ކޯޓަށް ނޯންނާނެކަމަށް ބުނެ ހުށަހެޅި އެ މައްސަަލަ ނިމިފައި ވަނީ އޭނާއާއި ދެކޮޅަށެވެ.
ހައިކޯޓަށް ހުށަހެޅި އިސްތިއުނާފީ ނުކުތާގައި ވިސާމްގެ މައިގަނޑު ބަހުސަކީ މަރުގެ މައްސަލައެއްގައި ބަންދު އަމުރު މެޖިސްޓްރޭޓު ކޯޓަކަށް ނުނެރެވޭނެކަމަށެވެ. އެ ނުކުތާއަށް ހައިކޯޓުގެ ހުކުމުގައި ބުނެފައި ވަނީ ބަންދު އަމުރު ނެރުމަށް ގާނޫނީ ހުރަހެއް ހުޅުމާލެ ކޯޓަށް ނެތްކަމަށެވެ.ހުޅުމާލެ ކޯޓަކީ ހައްސަ ކޯޓެއްކަމަށް ސުޕްރީމް ކޯޓުން ވެސް ހުކުމްކޮށްފައިވާކަން ފާހަގަކޮށް، މައްސަލައިގައި ބުނެފައި ވަނީ ކްރިމިނަލް ކޯޓުގެ ޝަރީއަތްތައް މާލޭގެ ސަރަހައްދުގެ އެހެން ތަނެއްގައި ކުރިޔަށް ގެންދިއުމަކީ ހުޅުމާލެ ކޯޓުގެ އިހުތިސާސަށް އަސަރު ކުރާނެ ސަބަބެއް ނޫންކަމަށެވެ.
