ޒުވާނުންނަކީ ތަފާތު އެކި މައްސަލަތަކާއި އޭގެ ހައްލުތަކުގެ މައްޗަށް ފުންކޮށް ވިސްނައި ހިޔާލު ކުރާ ބަޔަކަށް ވާން ޖެހޭކަމަށް ޔޫތު މިނިސްޓަރ އިބްރާހިމް ވަހީދު (އަސްވާޑް) ވިދާޅުވެއްޖެއެވެ.
މިއަދު ފާހަގަކުރަމުން ދާ ޒުވާނުންގެ ދުވަހާއި ގުޅުވައި މިނިސްޓަރ ދެއްވި ހިތާބުގައި ވިދާޅުވީ ޒުވާނުންގެ ހަށިހެޔޮކަމާއި ނަފުސާނީ ދުޅަހެޔޮކަން އިސްކުރުން މުހިންމު ކަމަށެވެ. އަދި މިއަދު ހަނދާނަށް އަންނަ އެންމެ ބޮޑު ޒިންމާއަކީ ވެސް މިނިސްޓަރ ވިދާޅުވި ގޮތުގައި ސަރުކާރުން ތަންފީޒު ކުރަމުން ގެންދާ ސިޔާސަތުތަކެވެ. މި ކަންތަކުން މަންފާ ލިބޭ ބައެއްކަމުގައި ޒުވާނުން ވާން ޖެހޭކަމަށް ފާހަގަކުރައްވައި އަސްވާޑު ވިދާޅުވީ ސަރުކާރުން އަބަދުވެސް ނަތީޖާ ނެރެދޭނެ ކަމަށެވެ.
ޒުވާނުންގެ ނަފްސާނީ ދުޅަހެޔިކަމާއި އެކު މިނިސްޓަރ ފާހަގަކުރެއްވީ ޝައުގުވެރިކަމާއި ޒިންމާދާރުކަން އަދި މުރާލިކަމާއި ހުނަރުވެރިކަމެވެ. މި ހުރިހާ ކަމެއް ގުޅުވައިގެން ނަތީޖާ ނެރެދޭ ތައުލީމާއި ފުނަށް ވާސިލްވެވޭހެން ތަރުތީބު ކުރެވޭ ސުލޫކީ ވިސްނުންތަކާއި މެދުވެސް ހަނދާން އައު ކުރުމަށް މިނިސްޓަރ އެދިވަޑައިގަތެވެ.
އެހެންކަމުން ކުރިމަގުގެ މަންފާ ލިބިގަތުމަށްޓަކައި ޒުވާނުންގެ ވިސްނުން އެ ދިމާއަށް މިސްރާބުކުރުމަކީ މުހިންމުކަމެއްކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ރަނގަޅު މުސްތަގުބަލަކަށްޓަކައި، ރާއްޖޭގެ އިސްލާމީ ޝަހުސިއްޔަތަކީ ޒުވާނުންގެ ދިރިއުޅުމުގެ އެއްބައިކަމުގައި ހަދަންޖެހޭ ކަމަށެވެ. އަދުގެ މައްސަލަތަކާއި އޭގެ ހައްލުތަކަށް ރިއާޔަތްކޮށް ފުންކޮށް ވިސްނައި ޚިޔާލުކުރާ ބަޔަކަށް ޒުވާނުން ވާންޖެހޭ ކަމަށާއި އިގުތިސާދީ ކުރިއެރުމަށް ފަހިވާގޮތުން އުފެއްދުންތެރި ބަޔަކަށް ވާންޖެހޭ ކަމަށްވެސް ވިދާޅުވިއެވެ.
އަސްވާޑު ވިދާޅުވީ ޒުވާނުންނަކީ ދުނިޔޭގެ ވެއްޓާއި މޫސުމަށް އަންނަ ބަދަލުތަކާ ގުޅިގެން އަޅަންޖެހޭ ފިޔަވަޅުތަކަށް ހޭލުންތެރިވެ ނަތީޖާނެރޭ ބަޔަކަށް ވާންޖެހޭ ކަމަށެވެ. އަދި ގައުމުގެ ސިޔާދަތާއި އިސްތިގުލާލު ރައްކާތެރިކޮށް މުސްތަގުބަލުގައި ދަމަހައްޓައިދޭނޭ ތޫނު ވިސްނުމާއި، މޮޅު ހިކުމަތުގެ އަހުލުވެރި ބަޔަކަށްވުމަށް އިލްތިމާސްކުރެއްވި އެވެ.
މި ސަރުކާރުގެ ސިޔާސަތުތައް އެކުލެވިފައިވަނީ މި ހުރިހައި ކަމަކާއި އެއާ ގުޅިފައިވާ ކަންކަން ޒުވާނުންނަށް ހާސިލްކޮށްދިނުމަށް ކަމަށް މިނިސްޓަރ ވިދާޅުވިއެވެ. އަދި ހަގީގީ މާނައިގައި ޒުވާނުންގެ ދައުރު ޒުވާނުންނަށް ލިބިދިނުމަށް ކަމަށް ވިދާޅުވިއެވެ. މިނިސްޓަރ ވިދާޅުވީ އަތުގައި މިއަދު އޮތް ގައުމީ އަމާނާތާ މާދަމާ ހަވާލުވެވޭނެ ނުހަނު ގާބިލް ޒުވާނުން އުފެއްދުމަށް ކަމަށެވެ.
މިނިސްޓަރ ވިދާޅުވީ މި ގައުމުގެ ހުރިހައިކަމެއް މާދަމާ އޮންނާނީ ޒުވާނުންގެ އަތްމަތީގައި ކަމަށާއި އަދި މާދަމާގެ ދިވެހި ގައުމު އޮންނާނީ ޒުވާނުންގެ ކިބައިގައި މިއަދު ހަރުލާ ސިފަތަކުގެ ސޫރައިގައި ކަމަށެވެ. އެހެންކަމުން ދިވެހީންގެ ގައުމު ދިވެހިގޮތުގައި މުސްތަގުބަލުގެ ދުނިޔެއާ ފައިހަމަކުރުމަށް ބޭނުންވާ ހުރިހައިކަމެއް މިއަދު ހާސިލްކުރުމަށް މިނިސްޓަރ ވަނީ އިލްތިމާސް ކުރައްވާފައެވެ.
