ރައްޔިތުންގެ އަތުން ނަގާ ޓެކުހާއި، ފީތައް ހޭދަ ކުރަނީ ކޮން މަސައްކަތަކެއްގެ ތެރެއަށްކަން އެނގެން ޖެހޭކަމަށް އެމްޑީޕީގެ ޕާލިމަންޓު ގުރޫޕުގެ ލީޑަރު، ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެއެވެ.
ސަރުކާރުގެ ފަރާތުން ހުށަހަޅާފައިވާ މި ބިލު ނާޒިލް ސިފަކުރެއްވީ ދައުލަތަށް މަންފާ ހޯދުމުގެ ނިޔަތުގައި ގެންނަ އިސްލާހުތަކެއްގެ ގޮތުގަ އެވެ. އެމްޑީޕީގެ އެހެން މެމްބަރުން ވެސް ތަޅުމުގައި ފާހަގަކުރެއްވި ގޮތަށް، ނާޒިލް ބިލުގެ މާއްދާތަކުން ސުވާލު އުފެއްދެވީ ރޯޔަލްޓީގެ ގޮތުގައި ނެގޭ ފީތައް މައާފުކޮށް ދިނުމުގެ މާއްދާއަށެވެ.
ރައްޔިތުންގެ އަތުން ފީ ނަގައި، ދައުލަތުގެ އާމްދަނީ އިތުރު ކުރުމަށް ފަހު އެ ފައިސާ ނަހަމަ ގޮތުގައި ބޭނުން ކުރަމުންދާއިރު މިއީ ކަންބޮޑުވުން ހުރި ވާހަކަތަކެއްކަމަށް ނާޒިލް ވިދާޅުވި އެވެ. ބިލާއި ބަންކަރިންގެ ހިދުމަތް ދިނުމުގެ ކުންފުނި ވިޓޯލްއާއި ގުޅުވައި ނާޒިލް ވިދާޅުވީ ދުނިޔޭގެ ފަސް ބައްރެއްގައި އެ ކުންފުނިން މެރިޓައިލް ފިއުލް ސަޕްލައި ކުރާކަމަށެވެ. އަދި ރާއްޖެއަކީ އެ ކުންފުނީގެ ސްޓޯރޭޖްކަމަށް ހަދައި، ހިލޭ ސާބަހަކަށް ރީ އެކްސްޕޯޓު ކުރަމުންދާއިރު މަންފާ ލިބޭ ބައެއް ތިބޭނެކަމަށް ނާޒިލް ވިދާޅުވި އެވެ.
މި ބާރު ރައީސުލްޖުމްހޫރިއްޔާ މުތުލަގަށް ނަންގަވާފައި.. އެއް އަތުން، ރައްޔިތުންގެ އަތުގައި ހުރި އެތިކޮޅު މި ކަހާލަނީ.. އެއްވެސް މެމްބަރެއް މިވާހަކައެއް ނުދައްކަވާ.. މި ބިލުގެ ތެރޭގައި އެކްސްޕޯޓު އިމްޕޯޓު ގާނޫނަށް ގެނެވޭ އިސްލާހު، އަދި ދުންފަތް މަނާ ކުރުމުން ގެނެވޭ އިސްލާހު.. ދެ އިސްލާހު ވެސް އެބައޮތް.. އަޅުގަމޑުމެން ބޮޑުތަނުން ދައްކަން ޖެހޭ ވާހަކައެއް މިއީ.. ރައްޔިތުން ކުރަމުން އައި، ރާއްޖޭގައި ކުރެވޭ ހުއްދަ ވިޔަފާރިއެއް މިއީ.. ކީއްވެތޯ އެ މީހުންނަށް ބަދަލުދޭނެ ވާހަކަ މީގައި ލިޔެފަ ނެތީ، 80، 90 މިލިއަން ފައިދާ ވާހަކަ އެބައޮތް.. 1 ބިލިއަން ދެ ބިލިއަންގެ ފައިދާވާ ވާހަކަވެސް އެބައޮތް..
ނާޒިލް ވިދާޅުވީ އަމިއްލަ މަންފާތަކެއް ލިބޭނެ ގަވައިދުތަކެއްގެ ސަބަބުން ދިވެހި ރައްޔިތުންނަށް އޭގެއިން ލިބޭނެ އެއްވެސް ހެވެއް ނެތްކަމަށެވެ. މިއީ ރައްޔިތުންގެ އަތުން ނަގާ ފައިސާތަކެއް، އަނެއްކާވެސް އިތުރަށް ބާރުކޮށްލައި އެހެން ދާއިރާއެއްގެ ތެރެއިން ވެސް ވަކި ނަމެއްގައި ނަގާ ފީތަކެއްކަމަށް ނާޒިލް ވިދާޅުވި އެވެ.
ނާޒިލް ވިދާޅުވީ ރައްޔިތުންގެ އަތުން ނަގާ ޓެކުހާއި، ފީތައް ހޭދަ ކުރަނީ ކޮން މަސައްކަތަކެއްގެ ތެރެއަށްކަން ރައްޔިތުންނަށް އެނގެން ޖެހޭކަމަށެވެ. އެހެން ނަމަވެސް މިހާރު ވެސް ހުށަހަޅާފައިވާ ތިން ޓެކުހާއި ބެހޭ ބިލާއި ވޭޕާއި ސިނގިރޭޓުގެ މައްސަލައިގައި ވެސް ލިބޭ އާމްދަނީ ބޭނުން ކުރާނީ ކޮން ކަމަކަށްކަން ނޭނގޭކަމަށް އޭނާ ވިދާޅުވި އެވެ.
މީގެއިތުރުން ނާޒިލް ވިދާޅުވީ ސަރުކާރުން ފީތައް ނަގައި، ހުއްޓުވަން މަސައްކަތް ކުރަނީ ރައްޔިތުން ކުރަމުން އައީ ހުއްދަ ވިޔަފާރިއެއް ކަމަށެވެ.
