ރައްޔިތުންގެ މަޖިލީހުގެ ޖަލްސާގައި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ފައިސަލް ވިދާޅުވީ، ޝަންގްރިއްލާގެ މައްސަލައަކީ އައްޑޫގެ ފަތުރުވެރިކަމަށް ދިމާވެފައިވާ އެންމެ ބޮޑު ގޮންޖެހުން ކަމަށެވެ.
”ވަޒީރުކަމާ ހަވާލުވުމަށްފަހު، ފުރަތަމަ މަސް ތެރޭގައި ޝަންގްރިއްލާގެ މެނޭޖްމަންޓާ ބައްދަލުކޮށް، ރިސޯޓު އަލުން ހުޅުވުމާ ގުޅޭގޮތުން މަޝްވަރާކުރެވިފައިވާނެ,“ މިނިސްޓަރު ފައިސަލް ވިދާޅުވިއެވެ.
”ބަޔަކު ރިސޯޓެއް ހިންގުމަށްފަހު، އެތަން ބަންދުކޮށްފައި ބޭއްވި ނަމަވެސް، އެ ތަނަކަށް ދައްކަންޖެހޭ ކުލި ދައްކަމުންދާ ނަމަ، ރިސޯޓު އެމީހުންގެ އަތުން ނެގޭނެ ގޮތެއް ނޯވޭ. އެހެންކަމުން ޤާނޫނަށް ބަދަލެއް ގެންނަން ޖެހުނަސް، އެކަން ކޮށްގެން ވެސް ޝަންގްރިއްލާ އޮޕަރޭޝަނަށް ގެންނާނަން,“ މިނިސްޓަރު ފައިސަލް ވިދާޅުވިއެވެ.
ރައީސް މުޢިއްޒުގެ ވައުދަކީ ވެރިކަމަށް އައުމަށްފަހު 6 މަސް ދުވަހުގެ ތެރޭގައި ޝަންގްރިއްލާ ހުޅުވުން ކަމަށްވާއިރު، މިހާރު ސަރުކާރަށް 11 މަސް ފުރިފައިވާކަން ފާހަގަކުރެވެއެވެ. ނަމަވެސް، މިނިސްޓަރު ފައިސަލްގެ ބަސްފުޅުން އެނގެނީ ސަރުކާރުން މި މަސައްކަތަށް އިސްކަންދީގެން ކުރިއަށް ގެންދާ ކަމެވެ.
މި މައްސަލައާ ގުޅޭގޮތުން އައްޑޫ ސިޓީ ކައުންސިލުން ބުނީ، ޝަންގްރިއްލާ އަލުން ހުޅުވުމަކީ އައްޑޫގެ ރައްޔިތުން ވަރަށް ބޮޑަށް އެދޭ ކަމެއް ކަމަށެވެ. އަދި މިކަމުގެ ސަބަބުން އައްޑޫގެ ފަތުރުވެރިކަމަށާއި އިޤްތިޞާދަށޞާދަށް ވަރަށް ބޮޑު ކުރިއެރުމެއް ލިބިގެންދާނެ ކަމަށް ކައުންސިލުން ޔަޤީންކުރެއެވެ.
