ރައީސް ޑރ މުހައްމަދު މުއިއްޒު ކަނޑިތީމު ދާއިރާއަށް ވެވަޑައިގެންފައިވާ ވައުދުތައް ފުއްދުމުގައި އަދި އުންމީދެއް ފެނިވަަޑައިނުގަންނަވާކަމަށާއި ހިނގަމުންދަނީ އެންމެ ޕްރޮޖެކްޓެއްކަމަށް ރައްޔިތުންގެ މަޖިލީހުގެ ކަނޑިތީމު ދާއިރާގެ މެމްބަރު އަމީން ފައިސަލް ވިދާޅުވެއްޖެއެވެ.
އަމީން އިތުރަށް ފާހަގަކުރެއްވި ގޮތުގައި، ބަޖެޓުގެ ބޮޑުމިނާއި ދަރަނީގެ އަދަދުތައް އިތުރުވަމުންދިއުމާ މެދު އެމަނިކުފާނުގެ އިއުތިރާޒެއް ނެތެވެ. ނަމަވެސް، އެމަނިކުފާނު ތަމްސީލުކުރައްވާ ދާއިރާގެ ރައްޔިތުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުތައް ފުއްދުމުގައި އެކަށީގެންވާ ކުރިއެރުމެއް ފެންނަން ނެތްކަމާމެދު ކަންބޮޑުވުން ފާޅުކުރެއްވިއެވެ.
އަމީން ވިދާޅުވީ، ރައްޔިތުން ވޯޓުދެއްވާފައިވަނީ ރައީސްގެ ވަޢުދުތަކުގެ މައްޗަށް ބިނާކޮށް ކަމަށާއި، ރައްޔިތުން އަދިވެސް ތިބީ އުއްމީދުގެ މަތީގައި ކަމަށެވެ. އެހެންނަމަވެސް، ރަސްމާލެ ޕްރޮޖެކްޓު ފިޔަވައި އެހެނިހެން ވަޢުދުތަކާއި މަޝްރޫޢުތަކުގެ ޙާލަތާމެދު ސުވާލު އުފެދޭ ކަމަށް ފާހަގަކުރެއްވިއެވެ.
މީގެއިތުރުން، އަމީން ފާހަގަކުރެއްވި ގޮތުގައި މި އަހަރުގެ ޖޫން މަހުން ފެށިގެން ކުރީގެ ސަރުކާރުން ޢާންމުކުރަމުން ގެންދިޔަ ހަފްތާވަރީ ފިސްކަލް ރިޕޯޓު ފަދަ މާލީ ތަފާސްހިސާބުތައް ޝާއިޢުކުރުން ހުއްޓާލާފައިވާ ކަމަށެވެ. އަދި 19 ވަނަ މަޖިލީހުން ކަނޑިތީމު ދާއިރާގެ ތަރައްޤީއަށް ކަނޑައަޅާފައިވާ ބަޖެޓުގެ ތަފްޞީލުތަކަށް ވެފައިވާ ގޮތާމެދު ސުވާލު އުފެއްދެވިއެވެ.
އަމީން އިތުރަށް ވިދާޅުވީ، މި ބަހުސްތަކުގައި ދެކެވެމުންދަނީ ރައްޔިތުންގެ ފައިސާއާ ބެހޭ ވާހަކަ ކަމަށާއި، ރައްޔިތުންގެ ޓެކްސް ފައިސާ ޚަރަދުކުރެވިފައިވާ ގޮތާ ގުޅޭގޮތުން ސުވާލުތައް އުފެދެމުންދާ ކަމަށެވެ. އެމަނިކުފާނު ވިދާޅުވީ، ރައްޔިތުންގެ ފައިސާ ކަމަށްވާތީ، އެ ފައިސާ ޚަރަދުކުރެވުނު ގޮތުގެ ތަފްޞީލު ރައްޔިތުންނަށް އެނގެން ޖެހޭނެ ކަމަށެވެ.
ނިންމާލަމުން، އަމީން ފާހަގަކުރެއްވީ ނިމިދިޔަ އަހަރުގެ ނޮވެމްބަރު މަހުން ފެށިގެން މިހާތަނަށް ކަނޑިތީމު ދާއިރާގައި ކުރިން ފަށާފައިވާ ގިނަ މަޝްރޫޢުތައް ހުއްޓިފައިވާ ކަމަށެވެ. އަދި މިހާރު ކުރިއަށްދާ އެންމެ މަޝްރޫޢެއްގެ މަސައްކަތްވެސް އެކަށީގެންވާ ގޮތެއްގައި ކުރިއަށް ނުދާކަން ފާހަގަކުރެއްވިއެވެ. އެމަނިކުފާނު ވިދާޅުވީ، މި މަޝްރޫޢުގެ މަސައްކަތްވެސް އެއް ހަފްތާ ކުރިއަށްދާ ނަމަ، ދެން އަންނަ ހަފްތާގައި ތެލުގެ ދަތިކަމާ ހެދި މެދުކެނޑޭ ކަމަށެވެ.
