ހުޅުމާލޭގައި ތަރައްގީކުރަމުން އަންނަ ކޭ-ޕާކް ފްލެޓްތަކުގެ މައްސަލާގައި އުފުލާފައިވާ ދައުވާތަކުގެ އިބްތިދާއީ މަރުޙަލާ ނިންމާލައިފިއެވެ.
މި މައްސަލައިގައި ދައުވާ އުފުލާފައިވަނީ ޙަސަން މަމްދޫހުގެ އިތުރުން ޖައިޝާން ސައީދުގެ މައްޗަށެވެ. މަމްދޫޙުގެ މައްޗަށް 104 ދައުވާއެއް ކުރުމަށް ކޯޓަށް ހުށަހަޅާފައިވެއެވެ. އަދި ޖައިޝާން ސައީދުގެ މައްޗަށް 97 ދައުވާއެއް ކުރުމަށް ކޯޓަށް ހުށަހަޅާފައިވެއެވެ.
އެ މައްސަލައިގައި ދައުވާ އިއްވުން 6 ނޮވެމްބަރުގައި ބޭއްވި އަޑުއެހުމުގައި ކުރިއަށް ގެންގޮސްފައިވާއިރު، ބާކީ ހުރި ދައުވާތައް ބުރާސްފަތި ދުވަހުގެ އަޑުއެހުމުގައި ވަނީ އިއްވާފައެވެ.
އެ ހުރިހާ ދައުވާތަަކަށްވެސް މަމްދޫޙު އަދި ޖައިޝާން ވަނީ އިންކާރުކޮށްފައެވެ.
ނޮވެމްބަރު 6 ވަނަ ދުވަހުން ފެށިގެން 15 ދުވަހުގެ މުއްދަތެއް ގާޒީ ވަނީ ދެއްވާފައެވެ. އަދި ޝަރީއަތުގެ ކުރީގެ ހުށަހެޅުންތައް ހުށަހެޅުމަށް ދައުލަތާއި ދިފާއަށްވެސް 25 ދުވަހުގެ މުއްދަތެއް ދެއްވާނެކަމަށް ގާޒީ ވިދާޅުވިއެވެ.
އެހެންކަމުން ދެން މި މައްސަލައިގައި އޮންނާނީ ޝަރީއަތުގެ ކުރީގެ ހުށަހެޅުމެއް ހުށަހަޅައިފިނަމަ އެކަމާ ގުޅޭގޮތުން ވާހަކަ ދެެއްކުމާއި ގޮޮތް ނިންމުމެވެ. އަދި ޝަރީއަތުގެ ކުރީގެ ހުށަހެޅުމެއް ނެތް ނަމަ ޖެނުއަރީ މަހު މައްސަލައިގެ ޝަރީއަތުގެ މަރުޙަލާ ފައްޓަވާނެކަމަށް ގާޒީ ވިދާޅުވިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.
