2028 ގެ ރިޔާސީ އިންތިހާބުގައި އިދިކޮޅު އެމްޑީޕީގެ ރިޔާސީ ޓިކެޓުގައި ވާދަކުރުމަށް، ޕާޓީގެ އެތެރޭގެ ޕްރައިމެރީއަށް ކުރިމަތިލާނެކަމަށް ޕާޓީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެ އެވެ.
އެމްޑީޕީގައި މިވަގުތު ހުންނެވި އެންމެ ނުފޫޒު ގަދަ، އަދި ޕާޓީގެ އެންމެ އިސް އެއް ލީޑަރު ފައްޔާޒު މިދިޔަ ސަރުކާރުގައި ހުންނެވީ އިކޮނޮމިކް މިނިސްޓަރުގެ މަގާމުގަ އެވެ. އަދި ޕާޓީއެއްގެ އެތެރޭގެ އެންމެ ވާދަވެރި އިންތިހާބާއި އެކު، ޕާޓީގެ ޗެއާޕާސަންގެ މަގާމަށް ފައްޔާޒް ވަޑައިގަތުމަށް ފަހު ފަސް އަހަރު ފަހުން ބާއްވާ ރިޔާސީ އިންތިހާބުގައި ވާދަކުރައްވާނެކަމުގެ އަޑުތައް ގަދަވި އެވެ.
ވެރިކަމަށް ވަޑައިގަތުމުގެ ޝައުގު ހުރިތޯ ކުރާ ސުވާލަށް ފައްޔާޒް މިހާތަނަށް ވެސް ހާމަކަން ބޮޑުކޮށް ވާހަކައެއް ނުދައްކަވަ އެވެ. އެމްޑީޕީގައި ރިޔާސީ ޕްރައިމެރީގައި ވާދަކުރައްވާނެކަމަށް ބެލެވޭ ދެން ތިއްބެވީ ކުރީގެ ރައީސް އިބްރާހިމް މުހައްމަދު ސޯލިހާއި، އެމްޑީޕީގެ ރައީސް އަދި ކުރީގެ ފޮރިން މިނިސްޓަރ އަބްދުﷲ ޝާހިދުގެ އިތުރުން މާލެ ސިޓީގެ މޭޔަރ އާދަމް އާޒިމެވެ. މި ތިން ބޭފުޅުން ވެސް އިންތިހާބުގައި ވާދަކުރައްވާނެކަން ނުވަތަ ނޫންކަން ވެސް ވިދާޅުވެފައި ނުވެއެވެ.
ސަރުކާރަށް އަމާޒުވާ ފާޑުކިއުންތަކާއި އެކު މިވަގުތު، އެމްޑީޕީގެ އެންމެ އިސް ސަފުން ފެންނަނީ ފައްޔާޒެވެ. އަދި ފައްޔާޒް ރިޔާސީ އިންތިހާބުގައި ވާދަކުރައްވާކަމަށް ވިދާޅުވީ، އެމްޑީޕީގެ ޓްވިޓަރ ހޭންޑްލްގެ ޕޯސްޓެއް އެމްޑީޕީގެ ގައުމީ މަޖިލީހަށް ހިއްސާ ކުރައްވައި ޕާޓީގެ ކަންކަން ރައީސަށް ނާންގަވަނީތޯ ޝާހިދު ސުވާލު އުފައްދައި ފޮނުވި މެސެޖަކަށް ދެކެވުނު ވާހަކައަކަށެވެ. ޝާހިދު ސުވާލު އުފެއްދެވީ ޕާޓީގެ ރައީސަށް ނޭނގި ފައްޔާޒް ހަރަކާތްތައް ކުރިޔަށް ގެންދާ ސަބަބާއި މެދުއެވެ.
މި ވާހަކައިގެ ތެރެއިން ފައްޔާޒް ފޮނުވި މެސެޖުގައި ވިދާޅުވީ ރިޔާސީ ޕްރައިމެރީގައި ވާދަކުރައްވާނެކަމަށާއި، އެކަމުގައި އެންމެހާ މެމްބަރުންގެ ތާއީދާއި އެއްބާރުލުމަށް އެދިވަޑައިގަންނަވާކަމަށެވެ.
އެމްޑީޕީގެ އެތެރޭގެ އިންތިހާބުތައް ފާހަގަކުރެވެނީ، ސިޔާސީ ޕާޓީއެއްގެ އެންމެ ފޯރިގަދަ އަދި ވާދަވެރި އިންތިހާބަށެވެ.
އެމްޑީޕީން މިހާތަނަށް ރިޔާސީ ޕްރައިމެރީ ބާއްވާނެ ދުވަހެއް އިއުލާނުކޮށްފައި ނުވެއެވެ.
