ސަރުކާރުން ގާނޫނުއަސާސީއަށް ގެނެސްފައިވާ ބަދަލުތައް ބާތިލުކުރުމަށް 4 ވަނަ މާއްދާގެ ދަށުން ބާރުވެރިކަން ލިބިތިބި ރައްޔިތުންގެ ހައިސިއްޔަތުން ރައްޔިތުންގެ ވެރިކަން ހިންގުމަށްޓަކައި ޒިންމާތައް މަތިކޮށްފައިވާ ހާދިމް ރައީސް ޑރ މުހައްމަދު މުއިއްޒުއަށް އަންގައި އަމުރުކުރާކަމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެެވެ.
މާރިޔާ އަޙްމަދު ދީދީ ފާހަގަކުރެއްވި ގޮތުގައި، ދިވެހި ދައުލަތުގެ އެންމެހާ ބާރުތައް ފެށި، ދެމިއޮންނަނީ ރައްޔިތުންގެ ކިބައިންކަން ޤާނޫނުއަސާސީގައި ބަޔާންކޮށްފައިވެއެވެ. އަދި ދައުލަތް ހިންގުމުގެ އިޖުރާއާތުގައި ބައިވެރިވުމަކީ ޤާނޫނުއަސާސީގެ 26 އަދި 70 ވަނަ މާއްދާގެ ދަށުން ރައްޔިތުންނަށް ލިބިގެންވާ ޙައްޤެކެވެ.
މާރިޔާ އިތުރަށް ވިދާޅުވި ގޮތުގައި، ދިވެހިރާއްޖޭގެ ވެރިކަން ހިންގުމަށް ރައްޔިތުން އެއްބަސްވެފައިވަނީ ރިޔާސީ ނިޒާމެއްގެ ދަށުންނެވެ. އެހެންކަމުން، ރައްޔިތުންގެ ޚިޔާލު ހޯދުމަކާ ނުލައި ޤާނޫނުއަސާސީއަށް ގެނެވުނު ބަދަލަކީ ވެރިކަމުގެ ނިޒާމު މަސްހުނިވެ، ރައްޔިތުންގެ ނިންމުން ނިގުޅައިގަނެވޭފަދަ ބަދަލެކެވެ.
މާރިޔާ ފާހަގަކުރެއްވި ގޮތުގައި، ރައްޔިތުންގެ މަޖިލީހުގެ މެންބަރުން އެމީހުންގެ މަސައްކަތް ބިނާކުރަންވާނީ މުޅި ޤައުމުގެ މަޞްލަޙަތަށް ރިޢާޔަތްކޮށްގެންނެވެ. އަދި މެންބަރުން ނިސްބަތްވާ ސިޔާސީ ޕާޓީގެ އެދުމަށް ޢަމަލުކުރުމަށް މަޖުބޫރުކުރުމަކީ ޤާނޫނުއަސާސީއާ ޚިލާފު ކަމެކެވެ.
މާރިޔާ ދީދީ ގޮވާލެއްވީ ރާއްޖޭގެ ހުރިހާ ކަންކޮޅުތަކުން ރައްޔިތުން މި ޕެޓިޝަނަށް ތާއީދުކޮށްދެއްވުމަށެވެ. އަދި ރައްޔިތުންނަކީ ރާއްޖޭގެ ވެރިންކަން ޤަބޫލުކުރައްވައި، މިގޮތުގެމަތިން ސަރުކާރަށް އަންގައި އަމުރުކޮށްދެއްވުމަށް އެދިވަޑައިގަތެވެ.
