ކަސްޓަމްސްގެ ސައުތު ރީޖަނަލް ހެޑް އޮފީސް އިމާރާތް އައްޑޫ ސިޓީ މަރަދޫގައި ރަސްމީކޮށް ހުޅުއްވައިދެއްވައިފިއެވެ.
މި އިމާރާތް ހުޅުއްވައިދެއްވީ ކަސްޓަމްސް ސައުތު ރީޖަނަލް ހެޑް އޮފީސް އިމާރާތުގައި ބޭއްވި ޚާއްސަ ރަސްމިއްޔާތެއްގައި ކަސްޓަމްސްގެ މިނިސްޓަރ، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ ޢަލީ އިޙްސާން އަދި ކޮމިޝަނަރ ޖެނެރަލް އޮފް ކަސްޓަމްސް ފާޠިމަތު ދިޔާނާ އެވެ.
މި ރަސްމިއްޔާތުގައި މިނިސްޓަރ އިޙްސާން ދެއްކެވި ވާހަކަފުޅުގައި، އައްޑޫ ސިޓީގެ ވިޔަފާރިތައް ފުޅާވެ، އެކްސްޕޯޓް އިމްޕޯޓް ކުރާ މިންވަރު އިތުރުވެގެންދާއިރު، އައްޑޫ ސިޓީގައި މިޤާއިމްކުރެވުނު ކަސްޓަމްސް ސައުތު ރީޖަނަލް ހެޑް އޮފީހުގެ ސަބަބުން، ކަސްޓަމްސްއިން ފޯރުކޮށްދޭންޖެހޭ ޚިދްމަތްތައް އިތުރަށް ތަރައްޤީވެގެންދާނެކަމުގައި ވިދާޅުވިއެވެ. އަދި މި ރީޖަނަލް އޮފީހުގެ ސަބަބުން އައްޑޫ ސިޓީގެ ވިޔަފާރި ބަނދަރުތައް ބެލެހެއްޓުން އިތުރަށް ހަރުދަނާ ވެގެންދާނެކަންވެސް މިނިސްޓަރ ފާހަގަކުރެއްވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ކޮމިޝަނަރ ޖެނެރަލް އޮފް ކަސްޓަމްސް ފާޠިމަތު ދިޔާނާ ދެއްކެވި ވާހަކަފުޅުގައި އަލަށް މި ހުޅުވުނު ކަސްޓަމްސް ސައުތު ރީޖަނަލް ހެޑް އޮފީސް އިމާރާތުގެ ސަބަބުން އައްޑޫ ސިޓީގައި ކަސްޓަމްސްގެ ޚިދުމަތްތައް އިތުރަށް ހަރުދަނާވެ، ޚިދުމަތްތައް އަވަސްވެގެންދިޔުމާއިއެކު، މި ސަރަހައްދުގައި ޤާއިމްކޮށްފައިވާ ބަނދަރުތައް ބެލެހެއްޓުން އިތުރަށް ވަރުގަދަކުރެވިގެންދާނެ ކަމަށް ކޮމިޝަނަރ ފާހަގަކުރެއްވިއެވެ.
ކަސްޓަމްސް ސައުތު ރީޖަނަލް ހެޑް އޮފީސް އިމާރާތުގެ މަސައްކަތް 2021 ގައި އެސްޖޭ ޓްރޭޑް ޕްރައިވެޓް ލިމިޓެޑްއާ ހަވާލުކޮށްގެން ފެށިފައިވާއިރު، މި އިމާރާތް ޤާއިމްކުރުމަށް 22.3 މިލިއަން ރުފިޔާ ދައުލަތުގެ ބަޖެޓުން ޚަރަދުކުރެވިފައިވެއެވެ. މި 3 ބުރީގެ އިމާރާތުގައި އިދާރީ އޮފީހަކާއި، ސްޓާފް އެކޮމޮޑޭޝަން ބައެއްގެ އިތުރުން ރީޖަނަލް ޓްރޭނިން ސެންޓަރެއް ޤާއިމް ކުރެވިފައިވެއެވެ.
