ރިސޯޓުތަކަށް އަންނަ ކޮންމެ ފަތުރުވެރިއެއްގެ ބޮލަކަށް 500 ޑޮލަރު މާރު ކުރަން ޖެހޭ ގޮތަށް، އެކުލަވާލި ބޭރު ފައިސާގެ ބިލުގެ ދިރާސާ ކުރާ ކޮމިޓީގެ ބައްދަލުވުން ސިއްރުކޮށްފި އެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީއަށް މިއަދު ތާވަލުކޮށްފައި ވަނީ، ބިލުގެ މަސައްކަތް ފެށުމުގެ ފުރަތަމަ ބައްދަލުވުމެވެ. އަދި ކޮމިޓީގެ އެޖެންޑާގައިވާ ގޮތުން މިއަދު ހަމަޖެހިފައި އޮތީ ބިލުގެ ސުންގަޑި ކަނޑައެޅުމާއި، ބިލާއި ބެހޭ ގޮތުން މޯލްޑިވްސް އެސޯސިއޭޝަން ފޯ ޓޫރިޒަމް އިންޑަސްޓްރީ (މަޓީ) ގެ އިސް ފަރާތްތަކާއި ބައްދަލު ކުރުމެވެ.
ބައްދަލުވުން ފައްޓަވައި ކޮމިޓީގެ މުގައްރިރު އަދި އޭދަފުށި ދާއިރާގެ މެމްބަރު އަހުމަދު ސަލީމް ވިދާޅުވީ، ބައްދަލުވުން ސިއްރު ކުރަން އެދުނީ މަޓީކަމަށެވެ. އެހެންވެ ކޮމިޓީގައި އެކަމަށް ވޯޓަށް އަހާފައި ވަނީ ބާރަށު ދާއިރާގެ މެމްބަރު އިބްރާހިމް ޝުޖައު ހުށަހަޅުއްވައި ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ތާއީދު ކުރެއްވުމުންނެވެ.
މަޓީގެ ބައި ފެށުމުގެ ކުރިޔަށް ކޮމިޓީން ވަނީ ބިލުގެ މަސައްކަތް މިއަދު ކޮމިޓީން ނިންމަން ފާސްކޮށްފަ އެވެ. އަދި މިއަދުގެ އިރުއޮއްސި 18:00 އާއި ހަމައަށް ކޮމިޓީ ކުރިޔަށް ގެންދިއުމަށް ވަނީ ނިންމާފަ އެވެ.
މިދިޔަ އޮކްޓޯބަރު މަހު އަމަލު ކުރަން ފެށި އައު ގަވައިދާއި މޯލްޑިވްސް މަނިތަރީ އޮތޯރިޓީ (އެމްއެމްއޭ) އާންމުންގެ ހިޔާލަށް ހުޅުވާލި ގާނޫނީ އޮނިގަނޑަށް ލިބުނު ހުށަހެޅުންތަކަށް ބަލައި ޑޮލަރު މާރު ކުރުމަށް ދެ އިހުތިޔާރެއް ދީފައިވެއެވެ.
ބިލުގައި ދީފައިވާ އިހުުތިޔާރަށް ބަލާއިރު، ބޭރު ފައިސާއިން ލިބޭ އާމްދަނީން ބައެއް މާރުކުރުމުގައި ”ކެޓެގަރީ އޭ ޓޫރިޒަމް އެސްޓެބްލިޝްމަންޓް“ ތަކުން މީލާދީ މަހެއްގެ ތެރޭގައި އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން އެ މަހެއްގެ ތެރޭގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު، ނުވަތަ މީލާދީ މަހެއްގެ ތެރޭގައި އެ ފަރާތަށް ލިބޭ ބޭރު ފައިސާގެ އާމްދަނީގެ (ގްރޮސް ސޭލްސް ޕްރޮސީޑްސްގެ) %20 މާރުކުރުމުގެ އިޚްތިޔާރު ވަނީ ދީފައެވެ.
ހަމައެއާއެކު، ”ކެޓެގަރީ ބީ ޓޫރިޒަމް އެސްޓެބްލިޝްމަންޓް“ ތަކުން މީލާދީ މަހެއްގެ ތެރޭގައި އަންނަ ކޮންމެ ޓޫރިސްޓަކަށް 25 އެމެރިކާ ޑޮލަރުގެ ރޭޓުން، އެ މަހެއްގެ ތެރޭގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު، ނުވަތަ މީލާދީ މަހެއްގެ ތެރޭގައި އެ ފަރާތަށް ލިބޭ ބޭރު ފައިސާގެ އާމްދަނީގެ (ގްރޮސް ސޭލްސް ޕްރޮސީޑްސްގެ) 20 އިންސައްތަ މާރުކުރުމުގެ އިޚްތިޔާރު ދީފައިވެއެވެ.
ބޭރު ފައިސާއައި ބެހޭ ގާނޫނުގެ ނަމުގައި ޑްރާފްޓުކޮށްފައިވާ މި ބިލުގެ ބޭނުމަކީ ބޭންކު އެކައުންޓުން ކުރެވޭ މުއާމަލާތްތައް ހިމެނޭ ގޮތުން ރާއްޖޭގައި ބޭރު ފައިސާއިން ކުރެވޭ މުއާމަލާތްތަކާއި ބެހޭ އުސޫލުތަކާއި ސިޔާސަތުތައް ކަނޑައެޅުމެވެ. އަދި ބޭރު ފައިސާ ގެންގުޅުމާއި، ގަނެވިއްކުން ހުއްދަ ކުރުމާއި ބެހޭ އުސޫލުތައް ސިޔާސަތުތައް ބިލު ގަނޫނަކަށްވުމުން ކަނޑައެޅިގެން ދާނެ އެވެ.
