2021 ވަނަ އަހަރުގެ ފެބްރުއަރީ މަހު ގއ. މާމެންދޫގައި މާރާމާރީ ހިންގައި އެ ރަށު ލިލީ އޮފް ދަ ވެލީ، އަހްމަދު އުދައްޔު މަރާލި މައްސަލައިގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
އުދައްޔުގެ މަރުގެ މައްސަލައިގައި ދައުލަތުން ދައުވާ އުފުލާފައި ވަނީ، ގއ. މާމެންދޫ ރިހިފަރުދާގެ، އަހްމަދު ޝަމީމާއި، އެރަށު ބިލަތްމާގެ، ޝަރަފް ރަޝީދު އަދި ގުލްފާމުގެ، މުހައްމަދު މާޒިންގެ މައްޗަށެވެ. އަދި އުމުރުން 18 އަހަރު ނުވާ ކުއްޖެއްގެ މައްޗަށްވެސް ދައުވާ އުފުލިއެވެ.
މި އަޑުއެހުމުގައި ހެއްކާ ގުޅޭގޮތުން ވާހަކަ ދެއްކުމަށް ގާޒީ ވަނީ ފުރުސަތު ދެއްވާފައެވެ.
ހެއްކާ ގުޅޭގޮތުން ވާހަކަ ދައްކަވަމުން ދައުލަތުގެ ވަކީލު ވިދާޅުވީ، މި މައްސަލައިގެ ޝަރީއަތުގެ މަރުޙަލާގައިވެސް އަދި ތަހުގީގީ މަރުޙަލާގައިވެސް ހެކި ލިބިފައިވަނީ ޙާދިސާ ހިނގި އިރު އެކި ވަގުތުތަކުގައި ހިނގި އެކި ކަންކަމާ ގުޅިގެން ކަމަށާއި، ނަމަވެސް ހެކިންގެ ހެކިބަސް އެއްގޮތްވާ ކަމަށެވެ.
މި މައްސަލައިގައި ޙާދިސާ ހިނގި ދުވަހު ދެ މާރާމާރީއެއް ހިނގާފައިވާއިރު، ދައުލަތުގެ ހެކިންގެ ތެރޭގައި އެ ދެ ޙާދިސާއާ ގުޅޭ ހެކިންވެސް ހިމެނެއެވެ.
ދައުލަތުގެ ވަކީލު ވިދާޅުވީ، މިއީ ގިނަ ބަޔަކު އަމަލީ ގޮތުން ބައިވެރިވެގެން ހިންގި މާރާމާރީއެއް ކަމަށާއި، އެހެންކަމުން މީހަކު މެރުމުގައި އަމަލީ ގޮތުން ބައިވެރިވާ މީހުން ކުށްވެރިވާނެކަމަށް ބަޔާންކުރާ އުސޫލު މި މައްސަލައަށް ފެތޭނެކަމަށެވެ.
މައްސަލަ ބައްލަވާ ގާޒީ ވަނީ އަމަލީ ގޮތުން ބައިވެރިވުމާ ގުޅޭގޮތުންނާއި މިފަދަ ޙާލަތްތަކުގައި ޤާނޫނަށް ގެނެސްފައިވާ އިސްލާޙު ގެނައުމުގައި މަޖިލީހުން ވިސްނާފައިވާ ވިސްނުން އިތުރަށް ދިރާސާ ކުރުމަށްފަހު ދެން އޮންނަ އަޑުއެހުމެއްގައި ކިޔާދެއްވުމަށް ދަންނަވާފައެވެ.
މި އަޑުއެހުމުގައި ދިފާއުން ވަނީ ޚުލާސާ ބަޔާން ހުށަހަޅާއިރު، ހެއްކާ ގުޅޭގޮތުން ފާހަގަކުރަން ބޭނުންވާ ކަންކަން ފާހަގަ ކުރައްވާނެކަމަށް ވިދާޅުވެފައެވެ.
އޭގެ އިތުރުން، ޖިނާއީ އިޖުރާއަތުގެ ޤާނޫނުގެ 87 ވަނަ މާއްދާގެ ދަށުން ހުށަހެޅުމެއް ހުށަހަޅަން ބޭނުންވާކަންވެސް މި އަޑުއެހުމުގައި ދައުލަތުން ފާހަގަކޮށްފައިވެއެވެ. އެ މާއްދާއަކީ މީހެއްގެ މައްޗަށް ދަޢުވާ އުފުލިފައިވާ ކުށުގެ ޝަރީޢަތުގައި ހާމަވާ ހެކީގެ ސަބަބުން އޭނާ އެހެން ކުށެއްގެ ޢަމަލު ހިންގިކަން ސާބިތުވާ ޙާލަތުގައި، އޭނާގެ މައްޗަށް އެ ދެވަނަ ކުށުގެ ދަޢުވާ އުފުލިފައިނުވި ނަމަވެސް، އެ ކުށް ސާބިތުވާކަމަށް ކަނޑައެޅިދާނެކަމަށް ބަޔާންކުރާ މާއްދާއެވެ.
މި މައްސަލައިގައި ދެން އަޑުއެހުމެއް އޮންނާނީ ކްރިމިނަލް ކޯޓުގެ ރިސެސަށްފަހު ޖެނުއަރީ މަހުގައެވެ. އެ އަޑުއެހުމުގައި އޮންނާނީ ހެއްކާ ގުޅޭގޮތުން ވާހަކަ ދެއްކުމާއި ޚުލާސާ ބަޔާން އިއްވުމެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.
މި މައްސަލައިގައި ނަގާފައިވާ ހެކިބަސްތަކަށް ބަލާއިރު، އުދައްޔުގެ ހަށިގަނޑު ބަލައި ފާސް ކުރި އޮފިސަރު ވިދާޅުވީ އޭނާގެ ބުރަކަށީގައި ތިން އިންޗީގެ ބޮޑު ޒަހަމެއް ހުރި ކަމަށެވެ. އަދި އުދައްޔުގެ ކަރުގައި ވަކި އެޅިފައި ހުރިކަމަށާއި، އޭނާގެ މޫނާ ދެ އަތާއި ފައިތިލައިގައި ޒަހަމްތަކެއް ހުރިކަމަށް އޮފިސަރު ވަނީ ވިދާޅުވެފަ އެވެ.
