ހައުސިން މިނިސްޓްރީއާއި ކޮންސްޓްރަކްޝަން މިނިސްޓްރީ ހިންގަމުން އައި އިމާރާތުގައި ރޯވެ ހިނގައި ދިޔަ އަލިފާނުގެ ހާދިސާއާއި ގުޅިގެން، މި ހާދިސާގައި އަސަރުކުރި މިނިސްޓްރީތަކުގެ މަސައްކަތް ވަގުތީ ގޮތުން ދަރުބާރުގެއަށް ބަދަލުކޮށް ހިދުމަތް ދިނުމަށް ވަމުންދާ ތައްޔާރީތައް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްލަވާލައްވައިފިއެވެ.
މި އަލިފާނުގެ ހާދިސާގައި 3 މިނިސްޓްރީއަކަށް ގެއްލުން ލިބުނެވެ. އޭގެ ތެރޭގައި،
ހައުސިންގ، ލޭންޑް އެންޑް އަރބަން ޑިވެލޮޕްމަންޓް މިނިސްޓްރީ
ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓްރީ
ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ މިނިސްޓްރީ
މި މިނިސްޓްރީތަކުގެ ހިންގުން ވަގުތީ ގޮތުން ބަދަލު ކުރުމަށް ހަމަޖެހިފައިވަނީ ދަރުބާރުގެއަށެވެ. އެ ސަރަހައްދު ބައްލަވާލެއްވުމަށް ރައީސް މުއިއްޒު ވަޑައިގެންނެވީ ރޭގެ ވަގުތެއްގައެވެ.
ހައުސިން މިނިސްޓަރު ޑރ އަލީ ހައިދަރު ވިދާޅުވެފައިވާ ގޮތުގައި، އާދިއްތަ ދުވަހު މަސައްކަތްތައް ފަށާގަނެވޭނެއެވެ.
ބުރާސްފަތި ދުވަހުގެ ހެނދުނު 06:30 ހާއިރު އެންމެ ފުރަތަމަ ރިޕޯޓު ކުރީ ހައުސިން މިނިސްޓްރީގައި އަލިފާން ރޯވެފައިވާކަމަށެވެ. އޭގެ ފަހުން އެ އަލިފާންގަނޑު ވަރަށް ބޮޑަށް ފަތުރި ކޮންސްޓްރަކްޝަން މިނިސްޓްރީއާއި އެންވައިރޮމެންޓް މިނިސްޓްރީގެ ބްލޮކުގައި ވެސް ރޯވީއެވެ.
މުޅި އަލިފާންގަނޑު އެއްކޮށް ނިއްވާލުމަށް ހަތަރު ގަޑިއިރު ހޭދަވީއިރު، ރޯވުމަށް މެދުވެރިވި ސަބަބެއް އަދިވެސް ސާފެއް ނޫނެވެ. އެހެން ނަމަވެސް ލިބުނު ބައެއް މައުލޫމާތުތަކުން އެނގޭ ގޮތުގައި ބޮޑަށް ބެލެވެނީ ކަރަންޓު ސޯޓެއްވީކަމަށެވެ.
އަލިފާނުގެ ހާދިސާ ހިނގި އިމާރާތުގެ ބޮޑުބައެއްގައި ލަކުޑިއާއި، ޓިނު ބޭނުންކޮށްފައި ވެއެވެ. އަދި ޑެގު އަޅައި ފްލޯތައް ނަގާފައި ހުރިއިރު އަލިފާންގަނޑު ކޮންޓްރޯލް ނުކުރެވި ފެތުރުގެން ދިޔައީ އެ ސަބަބާއި ހުރެކަމަށް ބެލެވެ އެވެ.
މި އިމާރާތަކީ 2008 ވަނަ އަހަރު ހައުސިން މިނިސްޓްރީގެ މަސައްކަތްތަކަށް ވަގުތީ ގޮތުން އެޅި އިމާރާތެކެވެ.
އިމާރާތުގައި ހުރި މުހިންމު ލިޔެކިއުންތައް ހޯދައި ނެރުނުމުގެ މަސައްކަތްތައް ކުރިޔަށް ދާއިރު އިއްޔެ ވެސް ގިނަ އަދަދެއްގެ ފައިލުތައް ނެރެފައި ވެއެވެ.
މިނިސްޓްރީތަކުގެ ހިދުމަތް ވީހާވެސް އަވަހަށް ފެށުމުގެ ގޮތުން މިހާރު ދަރުބާރުގެ އެކަމަށް ހާއްސަކޮށް ސްޓޭޝަންތައް ގާއިމު ކުރުމުގެ މަސައްކަތް ދަނީ ކުރަމުންނެވެ. އެގޮތުން މިނިސްޓްރީތަކުގެ މަސައްކަތް ބަދަލު ކުރުމުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ސްޓެލްކޯ ދަނީ އެހީތެރިކަން ފޯރުކޮށްދެމުންނެވެ.
ރޯވި އިމާރާތުގައި ހިދުމަތް ދެމުން އައި މާލެ ސިޓީ ކައުންސިލްގެ ސެކްޝަން ވަނީ ހުޅިމާލެއަށް ބަދަލުކޮށްފަ އެވެ. އަދި އެންވައިރޮމެންޓަލް ޕްރޮޓެކްޝަން އޭޖެންސީ (އީޕީއޭ) ބެލެވޭ ގޮތުގައި ބަދަލުވާނީ އެންވައިރޮމެންޓް މިނިސްޓްރީއާއި އެއްތަނަކަށެވެ.
