އިމާމުން ތާޒާކޮށް ތަމްރީން ކުރުމަށް ވުޒާރާއިން ފަށާފައިވާ މަޝްރޫޢުގެ ދަށުން 8 އަތޮޅެއްގެ އިމާމުންނަށް ކުރިއަށް ގެންދިޔަ ޕްރޮގުރާމް ނިންމުމުގެ ރަސްމިއްޔާތު ބާއްވައިފިއެވެ.
މިފަހަރުގެ ޕްރޮގުރާމް ކުރިއަށް ގެންގޮސްފައިވަނީ އުތުރާއި، މެދުރާއްޖެ ތެރޭގެ 7 އަތޮޅެއްގެ އިމާމުންނަށެވެ.
މިއީ އޮންލައިންކޮށް ކުރިއަށް ގެންދިޔަ ޕްރޮގުރާމެކެވެ. މި 8 އަތޮޅުން 321 އިމާމުން މި ޕްރޮގުރާމް ފުރިހަމަކޮށްފައިވާއިރު މިއަހަރުގެ މިހާތަނަށް މާލެ ސިޓީ ފިޔަވާ ހުރިހާ އަތޮޅެއްގެ އިމާމުންނަށް މި ޕްރޮގުރާމް ކުރިއަށް ގެންގޮސްފައިވާއިރު 714 އިމާމުން ވަނީ ޕްރޮގުރާމުގައި ބައިވެރިވެފައެވެ.
މި މަޝްރޫއުގެ ދަށުން މާލެ ސިޓީގެ އިމާމުން ތަމްރީން ކުރުމަށް ކުރިއަށް ގެންދާ ޕްރޮގުރާމް ހުކުރު ދުވަހުގެ ރޭ ފަށާ ގޮތަށް ވަނީ ހަމަޖެހިފައެވެ.
މީގެއިތުރުން މިނިސްޓްރީން ވަނީ ކުރިއަށް އޮތް ރޯދަ މަހު ރާއްޖޭގެ މިސްކިތްތަކުގައި ހިފްޒުކޮށް، އިމާމުވެ ތަރާވީހް ނަމާދު ކުރާނެ ދިވެހި ހާފިޒުން ހޯދަން އިސްލާމިކް މިނިސްޓްރީން ވަނީ އިއުލާނުކޮށްފަ އެވެ.
މިނިސްޓްރީގެ އިޢުލާނުގައި ބުނެފައި ވަނީ ހިފްޒުކޮށް، މާލޭގެ މިސްކިތްތަކުގައި އިމާމުވެ ތަރާވީހް ނަމާދު ކުރަން ބޭނުންވާ ދިވެހި ހާފިޒުންގެ ފޯމު ފުރިހަމަކޮށް ލިޔުންތަކާ އެކު އަންނަ މަހު 20 ވަނަ ދުވަހުގެ މެންދުރު 2:00 ގެ ކުރިން ހުށަހަޅަން އެދޭ ކަމަށެވެ.
ރަށްރަށުގެ މިސްކިތްތަކުގައި ހިފްޒުކޮށް ތަރާވީހް ނަމާދުކުރަން އެދޭ ދިވެހި ހާފިޒުން އަންނަ އަހަރުގެ ފެބްރުއަރީ މަހުގެ ހަ ވަނަ ދުވަހުގެ މެންދުރު 2:00 ގެ ކުރިން ފޯމު ހުށަހަޅަން ޖެހޭނެ އެވެ.
މާލޭގެ މިސްކިތްތަކުގައި ތަރާވީހް ކުރަން ފޯމު ހުށަހަޅަން ޖެހޭނީ ވުޒާރާގެ ކައުންޓަރަށެވެ. އަދި ރަށްރަށުގައި ނަމަ ފޯމު ހުށަހަޅަން ޖެހޭނީ އެ ރަށެއްގެ ނުވަތަ ސިޓީއެއްގެ ކައުންސިލަށެވެ. ރަށު ކައުންސިލާއި ސިޓީ ކައުންސިލްތަކަށް ހުށަހަޅާ ފޯމުތައް އަންނަ އަހަރުގެ ފެބްރުއަރީ މަހުގެ 16 ވަނަ ދުވަހުގެ ކުރިން ވުޒާރާއަށް ހުށަހަޅަން ޖެހޭނެ އެވެ.
