އަލިފާނުގެ ހާދިސާގައި ބޭނުން ނުކުރެވޭ ވަރަށް އެއްކޮށް އަނދައި ހުލުވި ތިން މިނިސްޓްރީގެ މަސައްކަތްތައް ދަރުބާރުގެއަށް ބަދަލުކޮށް އާންމު ހިދުމަތްތައް މާދަމާ ދޭން ފަށާނެކަމަށް ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބު ވިދާޅުވެއްޖެ އެވެ.
ބުރާސްފަތި ދުވަހުގެ ހެނދުނު 06:30 ހާއިރު ހިނގި ހާދިސާގައި އަލިފާންގަނޑު އެއްކޮށް ނިއްވާލުމަށް ހަތަރު ގަޑިއިރު ހޭދަވީއިރު، ރޯވުމަށް މެދުވެރިވި ސަބަބެއް އަދިވެސް ސާފެއް ނޫނެވެ. އެހެން ނަމަވެސް ލިބުނު ބައެއް މައުލޫމާތުތަކުން އެނގޭ ގޮތުގައި ބޮޑަށް ބެލެވެނީ ކަރަންޓު ސޯޓެއްވީކަމަށެވެ.
އަލިފާނުގެ ހާދިސާ ހިނގި އިމާރާތުގެ ބޮޑުބައެއްގައި ލަކުޑިއާއި، ޓިނު ބޭނުންކޮށްފައި ވެއެވެ. އަދި ޑެގު އަޅައި ފްލޯތައް ނަގާފައި ހުރިއިރު އަލިފާންގަނޑު ކޮންޓްރޯލް ނުކުރެވި ފެތުރުގެން ދިޔައީ އެ ސަބަބާއި ހުރެކަމަށް ބެލެވެ އެވެ.
މި އިމާރާތަކީ 2008 ވަނަ އަހަރު ހައުސިން މިނިސްޓްރީގެ މަސައްކަތްތަކަށް ވަގުތީ ގޮތުން އެޅި އިމާރާތެކެވެ.
އިމާރާތުގައި ހުރި މުހިންމު ލިޔެކިއުންތައް ހޯދައި ނެރުނުމުގެ މަސައްކަތްތައް ކުރިޔަށް ދާއިރު އިއްޔެ ވެސް ގިނަ އަދަދެއްގެ ފައިލުތައް ނެރެފައި ވެއެވެ.
މިނިސްޓްރީތަކުގެ ހިދުމަތް ވީހާވެސް އަވަހަށް ފެށުމުގެ ގޮތުން މިހާރު ދަރުބާރުގެ އެކަމަށް ހާއްސަކޮށް ސްޓޭޝަންތައް ގާއިމު ކުރުމުގެ މަސައްކަތް ދަނީ ކުރަމުންނެވެ.
މިނިސްޓްރީތަކުގެ މަސައްކަތްތައް ބަދަލު ކުރި ދަރުބާރުގޭގައި ސަރުކާރުގެ ފަރާތުން ބޭއްވި ނޫސްވެރިންގެ ބައްދަލުވުމުގައި މުއްތަލިބު ވިދާޅުވީ ރޯވި އިމާރާތުގައި ހިންގަމުން އައި ތިން މިނިސްޓްރީގެ ހިދުމަތް ވެސް އާދީއްތަ ދުވަހުން ފެށިގެން ލިބޭނެ ކަމަށެވެ.
މިނިސްޓަރ ވިދާޅުވި ގޮތުގައި ތިން ވުޒާރާގެ މަސައްކަތްތައް ރާވާފައި ވަނީ، އެތަނުގެ ތިން ހޯލުގައެވެ.
ދަރުބާރުގޭގައި ޖާގައިގެ ދަތިކަމެއް ނެތް ނަމަވެސް، ބޭނުންވާ ހުރިހާ އިންތިޒާމުތައް ހަމަޖެހުމާއި ހަމައަށް ބައެއް މުވައްޒަފުން ގޭގައި ތިބެ މަސައްކަތް ކުރަމުންދާނެކަމަށް މުއްތަލިބު ވިދާޅުވި އެވެ. އަދި މިނިސްޓްރީތަކުން ދޭން ޖެހޭ އެއްވެސް ހިދުމަތަކަށް ހުއްޓުމެއް ނުވަތަ ބުރުލެއް ނައިސް ދެވޭނެކަމުގެ ޔަގީންކަން އެބައޮތްކަމަށް ވިދާޅުވި އެވެ.
މިނިސްޓަރ ވިދާޅުވި ގޮތުގައި މި ދެ ދުވަހު ދަރުބާރުގޭގައި 24 ގަޑިއިރު ހުއްޓުމެއް ނެތި ބުރަ މަސައްކަތެއް ކުރަން ޖެހުނެވެ. އެގޮތުން މިނިސްޓްރީތަކުގެ ސްޓޭޝަންތައް ގާއިމު ކުރުމާއި ނެޓްވޯކާއި ކޭބަލްތައް ގުޅައި ސިސްޓަމްތަކާއި އެކު ފޯނު ނެޓްވޯކް އެޅުން ހިމެނޭކަން ފާހަގަކުރި އެވެ. އަދި ދަރުބާރުގޭގައި ވެސް ސާވަރ ސިސްޓަމެއް ބަހައްޓައި، މުވައްޒަފުންނަށް ވެސް ދަތި ނުވާނެހެން ޕާޓްޝަން ޖަހާފައިވާނެކަމަށް މުއްތަލިބު ވިދާޅުވި އެވެ.
މިހާތަނަށް އައިއިރު ޔަގީން މާދަމާ އޮފީސް ހުޅުވާއިރު ތިން އޮފީހުގެ މަސައްކަތްތައް ވެސް، އަދި ދެމުންދާ އާންމު ހިދުމަތްތައް ވެސް އާންމު ހާލަތުގައި ދޭން ފެށޭނެކަން..
ހާދިސާ ހިނގުމަށް ފަހު ދައުލަތުގެ މީޑިއާއަށް ދެއްވި އިންޓަވިއުއެއްގައި ހައުސިން މިނިސްޓަރ އަލީ ހައިދަރު ވިދާޅުވި ގޮތުގައި ތަނުގެ ސާވާތައް ވެސް އެއްކޮށް ހަލާކުވެފައިވާތީ ރިކަވަރ ކުރެވޭނެކަމަށް ނުބެލެވެ އެވެ. އަދި މިނިސްޓްރީގެ މުވައްޒަފުންނާއި ގުޅުން ހުރި މައުލޫމާތުތަކާއި، ޑާޓާތައް ވެސް ހޯދޭނެކަމަށް ނުބެލެވޭކަމަށް ވިދާޅުވި އެވެ.
ހައިދަރު ވިދާޅުވީ ސާވައަށް އެކްސެސް ނުލިބޭ ނަމަ މުވައްޒަފުންގެ މައުލޫމާތުތަކުގެ އިތުރަށް، މިނިސްޓްރީން ކުރަމުން އައި މަޝްރޫއުތަކުގެ ތަފްސީލެއް ވެސް ނުލިބޭނެ ކަމަށެވެ. އެކަމަކު މިއަދު އޮތް ބައްދަލުވުމުގައި މުއްތަލިބު ވިދާޅުވީ ހާދިސާގައި ގިނަ ލިޔެކިއުންތަކެއް ގެއްލިފައިވާކަމަށް ވާހަކަތައް ދެކެވެމުން ދިޔަ ނަމަވެސް އިދާރާތަކުގެ ޑޭޓާ ހުރީ ސްޓޯކޮށް ބެކަޕް ލިބޭ ގޮތަށެވެ.
މީގެއިތުރުން މިނިސްޓްރީތަކުން ގެއްލިފައި ވަނީ ކޮން ލިޔެކިއުންތަކެއްތޯ ބެލުމުގެ މަސައްކަތް ކުރަމުންދާކަމަށް މުއްތަލިބު ވިދާޅުވި އެވެ.
