މިދިޔަ ބުރާސްފަތި ދުވަހު ހިނގައިދިޔަ އަލިފާނުގެ ހާދިސާއާއި ގުޅިގެން ތަހުގީގުތަކެއް ހިނގައިދިނުމަށް އެދި ފުލުހުންނާއި އިންޓެގްރިޓީ ކޮމިޝަނުގައި އެމްޑީޕީ އިން ހުށަހަަޅަން ނިންމައިފިއެވެ.
މިކަން ހާމަކުރީ މިއަދު އެމްޑީޕީއިން ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ލީގަލް ޑައިރެކްޓަރު މަހްފޫޒް ސައީދުއެވެ.
އޭނާ ވިދާޅުވީ މި މައްސަލަ، ޖިނާއީ މައްސަލައެއް ގޮތުގައި އެ މައްސަލަ ތަހުގީގުކޮށް އެކަން ހިނގި ގޮތް ދެނެ ގަންނަން ސިފައިންގެ އެހީތެރިކަން ހޯދުމަށް ފުލުހުންގެ އިދާރާގައި އެދި ސިޓީއެއް ފޮނުވާނެ ކަމަށެވެ.
ހާދިސާގެ މިނިވަން ތަހުގީގެއް ހިންގުމަކީ މުހިންމުކަމެއްކަމަށް އޭނާ ވިދާޅުވިއެވެ. އަލިފާނުގެ ހާދިސާގައި އިހުމާލުގެ އަމަލުތަކެއް ފާހަގަކުރެވޭކަމަށް އޭނާ ވިދާޅުވިއެވެ.
މީގެ އިތުރުން އަލިފާނުގައި މިނިސްޓްރީތަކުން ގެއްލުނު ލިޔުންތަކަކީ އަރުޝީފުގެ ގާނޫނުގެ ދަށުން އަރުޝީފު ކުރެވިފައި ހުރި ތަކެތިތޯ ބެލުމަށް އަރުޝީފުގެ ޑިރެކްޓަރުގެ އަރިހުން ވެސް އެދޭނެކަމަށް އޭނާ ވިދާޅުވިއެވެ.
މަޝްރޫއުތަކުގެ ލިޔެކިޔުންތައް ގެއްލިގެން ގޮސްފައިވާކަމަށް ބުނެފައިވާއިރު، އެއީ އަރުޝީފު ކުރެވިފައި ހުންނަންޖެހޭ އެއްޗެއްކަމަށް ގާނޫނުގައި އޮންނަކަމަށްވެސް އޭނާ ވިދާޅުވިއެވެ.
މިކަންކަން ދެނެގަތުމަށް ކުރާ މަސައްކަތުގައި ސަރުކާރުން ބޭރުގެ ތަޖުރިބާކާރުންގެ އެހީ ހޯދާއިރު، ހާދިސާ ހިނގި ސީން ރޫޅާލައި އެތަން ސާފު ކުރަން ފެށުމަކީ ސުވާލުއުފެދޭކަމެއްކަމަށް އޭނާ ވިދާޅުވިއެވެ. މި ހާދިސާއަކީ ބަޔަކު ގަސްތުގައި ހިންގިކަމެއްކަމަށްވާނަމަ އެއީ ހެކި ނައްތާލުންކަމަށް އޭނާ ވިދާޅުވިއެވެ.
