އަލިފާނުގެ ހާދިސާގައި ސުވާލު އުފެދޭ އެތައް ކަމެއް އެބަހުރި، ވާހަކަތައް ދެކޮޅެއް ނުޖެހޭކަމަށް ކެންދޫ ދާއިރާގެ މެންބަރު މައުރޫފް ޒާކިރު (މަޓޭ) މިއަދު ވިދާޅުވެއްޖެއެވެ.
އެމްޑީޕީއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މައުރޫފް ވިދާޅުވީ، އަލިފާނުގެ ހާދިސާ ހިނގައި ދިޔުމާއިއެކު މާލެ ސިޓީ ޑެޕިއުޓީ މޭޔަރު އަހުމަދު ނަރީޝް ވަނީ އެއްވެސް ލިޔެކިޔުމެއް ސަލާމަތް ނުވިކަމަށް ވިދާޅުވެފައިވާކަމަށެވެ. އަދި އެއަށްފަހު ސާވާ ސަލާމަތް ނުކުރެވުނުކަމަށް ހައުސިން މިނިސްޓަރު ވިދާޅުވިކަން އޭނާ ފާހަގަކުރެއްވިއެވެ.
މި ހާދިސާއާއި ގުޅިގެން ސަރުކާރުގެ ކަމާއި ބެހޭ ފަރާތްތަކުން ދައްކާފައިވަނީ ދެކޮޅު ނުޖެހޭ ވާހަކަތަކެއްކަމަށްވެސް އޭނާ ވިދާޅުވިއެވެ.
މިއަދާ ހަމައަށް މިހާ ހިސާބަށް އައިއިރުގައިވެސް، މި އަލިފާނުގެ ހާދިސާ އެހާ ގިނަ ވަގުތު ނަގައިގެން ނިއްވާލެވުނު އިރު، ހިނގަން ދިމާވި ސަބަބު ހަމަ އެއްވެސް ވަރަކަށް ސާފެއް ނޫން.
މައުރޫފް ވިދާޅުވިއެވެ.
މިފަދަ ބޮޑު ހާދިސާއެއް ހިނގައިދިއުމުން މީގެ ކުރީގައި އަބަދުވެސް އެކަމުގެ ސަބަބުތަކާއި ގުޅޭ ގޮތުން ވާހަކަތައް ފެތުރޭކަމަށް ފާހަގަކޮށް މައުރޫފް ވިދާޅުވީ ނަމަވެސް ހާދިސާ ހިނގާ އެތައް ދުވަހެއް ފާއިތުވެގެން ދިޔައިރު އަދިވެސް ކަން ހިނގަން މެދުވެރިވީ ސަބަބު ނޭގޭކަމަށެވެ.
މިއީ މީހަކަށް ގެއްލުވާނެހެން ހިނގައިދިޔަ ހާދިސާއެއް ނޫންކަމަށާއި، ނަމަވެސް އެ ހާދިސާ ހިނގައިދިޔައިރު އެންމެ ސަމާލުކަން ދިނީ ފުރާނަތައް ސަލާމަތް ކުރުމަށްކަމަށް މައުލޫމާތު ދެއްވިއިރު، އެއީވެސް ދެކޮޅުޖެހޭ ވާހަކައެއް ނޫންކަމަށެވެ.
މިހާދިސާގައި ގެއްލުން ލިބުނު މިނިސްޓްރީތައް ހިންގުމަށް ދަރުބާރުގޭގައި އާ ސެޓަޕެއް ހެދިއިރު އެތައް ހަރަދެއް ކުރިކަމަށާއި، މިކަމުގެ ވާނުވާވެސް ސާފު ނޫންކަމަށް މައުރޫފް ވިދާޅުވިއެވެ. މިކަމުގައިވެސް ރައްޔިތުންގެ ކަންބޮޑުވުންތައް އެބަހުރިކަމަށް ވިދާޅުވިއެވެ. ނަމަވެސް ހާދިސާއާއި ގުޅިގެން ސަރުކާރުގެ ފަރާތުން އެއްވެސް ކަންބޮޑުވުމެއް ފާހަގަނުވާކަމަށް އޭނާ ވިދާޅުވިއެވެ.
މީގެ އިތުރުން މި ހާދިސާގައި ގެއްލުންވީ ކިހާ މިންވަރަކަށްކަން ސާފުނުވާކަމަށްވެސް މައުރޫފް ވިދާޅުވިއެވެ.
