އާސަންދައާއި ސަބްސިޑީއަށް މި އަހަރު ކުރި ހޭދަ 2023 ވަނަ އަހަރާއި އަޅާބަލައި ދަށްވެފައިވާކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފި އެވެ.
ފިނޭންސް މިނިސްޓްރީގެ ބައެއް ތަފާސްހިސާބުތައް ދައްކާ ގޮތުގައި، ޑިސެމްބަރު މަހުގެ ފުރަތަމަ ހަފްތާގެ ނިޔަލަށް ހިންގުމުގެ ހަރަދުގެ ތެރޭގައި ހިމެނޭ އާސަންދައާއި ސަބްސިޑީ ހޭދަވަނީ ކުރީ އަހަރާއި އަޅާބަލައި ދަށްވެފައެވެ.
ވީކްލީ ފިކްސަލް ރިޕޯޓުގައިވާ ގޮތުން ޑިސެމްބަރު 05 ގެ ނިޔަލަށް އާސަންދައަށްކޮށްފައި ވަނީ 1.8 ބިލިއަން ރުފިޔާ އެވެ. މިދިޔަ އަހަރުގެ މި މުއްދަތުގައި އާސަންދައަށް ކުރި ހޭދައަކީ 1.98 ބިލިއަން ރުފިޔާ އެވެ.
މިދިޔަ އަހަރާއި އަޅާބަލައި އެންމެ ބޮޑަށް ދަށްވެފައިވާކަމަށް ރިޕޯޓުން ދައްކަނީ ކައުންސިލްތަކުގެ ގްރާންޓެވެ. އެގޮތުން ޑިސެމްބަރު މަހުގެ 05 ގެ ނިޔަލަށް ކައުންސިލްތަކަށް ގްރާންޓުގެ ގޮތުގައި 2 ބިލިއަން ރުފިޔާ ދޫކުރިއިރު މިދިޔަ އަހަރު އެ އަދަދު ހުރީ 1.77 ބިލިއަން ރުފިޔާ ގަ އެވެ.
މީގެއިތުރުން ސަބްސިޑީއަށް ކުރި ހޭދައަކީ 3.4 ބިލިއަން ނަމަވެސް، މިދިޔަ އަހަރު ކުރި ހޭދައިގެ އަދަދަކީ 3.6 ބިލިއަން ރުފިޔާ އެވެ.
ތަފާސްހިސާބުތައް ދައްކާ ގޮތުގައި މިދިޔަ އަހަރާއި އަޅާބަލައި، އެންމެ ބޮޑު ހޭދައެއްކޮށްފައި ވަނީ މުސާރައަށެވެ. އެގޮތުން 5.5 ބިލިއަން މި އަހަރު ހޭދަކުރިއިރު މިދިޔަ އަހަރުގެ ހޭދައަކީ 4.8 ބިލިއަން ރުފިޔާ އެވެ. މުސާރައިގެ މިހާ ބޮޑު އިތުރުވުމެއް އައިސްފައި ވަނީ ޕޭ ހާމަނައިޒޭޝަންއަށް ފަހު އެވެ.
މީގެއިތުރުން ޕެންޝަނަށް 1.8 ބިލިއަން އަދި ރިޓަޔަމަންޓް ބެނިފިޓްގެ ގޮތުގައި 598 މިލިއަން ރުފިޔާ ވަނީ ހޭދަކޮށްފަ އެވެ. ބޭސިކް ޕެންޝަނަށް ކުރި ހޭދައަކީ 1.2 ބިލިއަން ރުފިޔާ އެވެ.
ތަފާސްހިސާބުތަކުން އެންމެ ބޮޑު ބަދަލެއް ފާހަގަކުރެވިފައި ވަނީ އާސަންދައިންނެވެ.
އަންނަ އަހަރަށް ލަފާކޮށް ފާސްކުރި 56.6 ބިލިއަން ރުފިޔާގެ ބަޖެޓުގައި ހިމަނާފައި ހުރި ރިފޯމްތަކުގެ ތެރޭގައި އާސަންދައާއި، ސަބްސީޑީ އަދި ޕެންޝަން ސީކީމަށް ގެންނަ ބަދަލުތައް ފާހަގަކުރެވެ އެވެ.
ރައްޔިތުންނަށް ލިބެމުންދާ ބައެއް ހިދުމަތްތަކަށް ބަދަލު ގެނެސް، މެދުކަނޑާލަން އުޅޭކަމަށް ވާހަކަ ދެކެވޭއިރު ސަރުކާރުން އެކަން ދޮގު ކުރެ އެވެ. އަދި އާސަންދައިގެ ހިދުމަތް ރައްޔިތުންނަށް ފުރިހަމަ ގޮތުގައި ލިބޭނެކަމަށް ވަނީ ބުނެފަ އެވެ.
ދާދިފަހުން އަތޮޅުތެރެއަށް ކުރެއްވި ދަތުރުފުޅެއްގެ ތެރެއިން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ ދައުލަތުގެ ބޭކާރު ބޮޑެތި ހަރަދުތައް ހިނގާ ބާތައް ފޫބައްދައި، ނާޖާއިޒް ގޮތުގައި ކުރަމުންދާ ހަރަދުތައް ވެސް އުނި ކުރައްވާނެ ކަމަށެވެ. މިސާލެއް ނަންގަވައި ރައީސް ފާހަގަކުރެއްވީ އާސަންދައިގެ ދަށުން އަގުބޮޑުކޮށް ބޭސް ވިއްކަމުން ދާ މައްސަލަ އެވެ. އާސަންދައިގެ ނާޖާއިޒް ފައިސާ ނަގައި 100 އިންސައްތައަށް ވުރެ ވެސް ބޮޑު މާޖިންއެއްގެ ޕްރޮފިޓެއް ބައެއް މީހުން ނަގައި އޭގެއިން މަންފާ ނަގަމުންދާކަމަށް ރައީސް ވިދާޅުވި އެވެ. އެހެންކަމުން މިފަދަ މައްސަލަތައް މިއީ، ކޮންމެހެން ހައްލު ކުރެވެން ޖެހޭ މައްސަލަތަކަށް ވާތީ ނިޒާމަށް ހެޔޮ ބަދަލުތަކެއް ގެނެވި ރީފޯމް ކުރެވިގެން ދާނެކަމަށް ރައީސް ވިދާޅުވި އެވެ.
