ދައުލަތުގެ ތިން މިނިސްޓްރީއެއް ހިންގަމުން ދިޔަ އިމާރާތުގައި އަލިފާން ރޯވެ، ތަންއެއްކޮށް ބޭނުން ނުކުރެވޭ ވަރަށް އަނދައި ހުލިވި މައްސަލައިގައި މައުލޫމާތުތައް ސާފު ކުރުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާއި ބެހޭ ކޮމިޓީން ނިންމައިފި އެވެ.
ބުރާސްފަތި ދުވަހުގެ ހެނދުނު 06:30 ހާއިރު ހިނގި ހާދިސާގައި އަލިފާންގަނޑު އެއްކޮށް ނިއްވާލުމަށް ހަތަރު ގަޑިއިރު ހޭދަވީއިރު، ރޯވުމަށް މެދުވެރިވި ސަބަބެއް އަދިވެސް ސާފެއް ނޫނެވެ. އެހެން ނަމަވެސް ލިބުނު ބައެއް މައުލޫމާތުތަކުން އެނގޭ ގޮތުގައި ބޮޑަށް ބެލެވެނީ ކަރަންޓު ސޯޓެއްވީކަމަށެވެ.
އަލިފާނުގެ ހާދިސާ ހިނގި އިމާރާތުގެ ބޮޑުބައެއްގައި ލަކުޑިއާއި، ޓިނު ބޭނުންކޮށްފައި ވެއެވެ. އަދި ޑެގު އަޅައި ފްލޯތައް ނަގާފައި ހުރިއިރު އަލިފާންގަނޑު ކޮންޓްރޯލް ނުކުރެވި ފެތުރުގެން ދިޔައީ އެ ސަބަބާއި ހުރެކަމަށް ބެލެވެ އެވެ.
އަލިފާނުގެ ހާދިސާއާއި ގުޅުވައި، މައުލޫމާތު އޮޅޭ ގޮތަށް ތަފާތު އެކި ވާހަކަތައް ދެކެވެމުންދާއިރު ހާދިސާގެ ތަހުގީގެއް ހިންގުމަށް ވެސް ފުލުހުން ވަނީ ނިންމާފަ އެވެ. އަލިފާން ރޯވީ އިހުމާލުންކަމަށް ނުވަތަ ހާދިސާގެ ފަހަތުގައި ސިއްރުތަކެއްވާކަމަށް ބުނެ އިދިކޮޅު އެމްޑީޕީ ބޮޑެތި ތުހުމަތުތަކެއް ކުރެ އެވެ. އަދި މައްސަލަ ސަލާމަތީ ހިދުމަތްތަކުގެ ކޮމިޓި ހިމެނޭހެން ފުލުހުންނާއި، ނެޝަނަލް އިންޓެގްރިޓީ ކޮމިޝަނަށް ހުށަހެޅި އެވެ.
ރައްޔިތުންގެ މަޖިލިސް މިވަގުތު އޮތީ ޗުއްޓީގައި ނަމަވެސް، ކޮމިޓީ ބުރާސްފަތި ދުވަހުގެ ހެނދުނަށް ތާވަލު ކުރަނީ އޭދަފުށި ދާއިރާގެ މެމްބަރު ހުށަހެޅުއްވުމުންނެވެ. ކޮމިޓީގެ މުގައްރިރުކަން ވެސް ކުރައްވާ ސަލީމް ހުށަހަޅާފައި ވަނީ ޑިފެންސް މިނިސްޓްރީއާއި ފުލުހުންގެ އިތުރުން ކަމާއި ގުޅުން ހުރި ފަރާތްތައް ހާޒިރު ކުރުމަށެވެ.
ހާދިސާ ހިނގުމަށް ފަހު ދައުލަތުގެ މީޑިއާއަށް ދެއްވި އިންޓަވިއުއެއްގައި ހައުސިން މިނިސްޓަރ އަލީ ހައިދަރު ވިދާޅުވި ގޮތުގައި ތަނުގެ ސާވާތައް ވެސް އެއްކޮށް ހަލާކުވެފައިވާތީ ރިކަވަރ ކުރެވޭނެކަމަށް ނުބެލެވެ އެވެ. އަދި މިނިސްޓްރީގެ މުވައްޒަފުންނާއި ގުޅުން ހުރި މައުލޫމާތުތަކާއި، ޑާޓާތައް ވެސް ހޯދޭނެކަމަށް ނުބެލެވޭކަމަށް ވިދާޅުވި އެވެ.
ހައިދަރު ވިދާޅުވީ ސާވައަށް އެކްސެސް ނުލިބޭ ނަމަ މުވައްޒަފުންގެ މައުލޫމާތުތަކުގެ އިތުރަށް، މިނިސްޓްރީން ކުރަމުން އައި މަޝްރޫއުތަކުގެ ތަފްސީލެއް ވެސް ނުލިބޭނެ ކަމަށެވެ. އެކަމަކު މައްސަލައިގައި މިފަހުން އޮތް ނޫސްވެރިންގެ ބައްދަލުވުމުއި ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބު ވިދާޅުވީ ހާދިސާގައި ގިނަ ލިޔެކިއުންތަކެއް ގެއްލިފައިވާކަމަށް ވާހަކަތައް ދެކެވެމުން ދިޔަ ނަމަވެސް އިދާރާތަކުގެ ޑޭޓާ ހުރީ ސްޓޯކޮށް ބެކަޕް ލިބޭ ގޮތަށެވެ.
މީގެއިތުރުން މިނިސްޓްރީތަކުން ގެއްލިފައި ވަނީ ކޮން ލިޔެކިއުންތަކެއްތޯ ބެލުމުގެ މަސައްކަތް ކުރަމުންދާކަމަށް މުއްތަލިބު ވިދާޅުވި އެވެ.
