ރޯދަ މަހަށް ރައްޔިތުންގެ މަޖިލީސް ޗުއްޓީއަށް ދާން އެމްޑީޕީގެ މެންބަރުން ދެކޮޅުކަމަށް އެ ޕާޓީގެ ޕާލިމެންޓަރީ ގްރޫޕްގެ ލީޑަރު އިބްރާހިމް ނާޒިލް ވިދާޅުވެއްޖެއެވެ.
މިކަމާއި ގުޅޭ ގޮތުން ނާޒިލް ވިދާޅުވީ ކަމުގެ މަގްސަދު ސާފެއް ނޫންކަމަށެވެ. ސަރުކާރާއި، ޕްރައިވެޓް ސެކްޓަރވެސް ރޯދަ މަހު މަސައްކަތް ކުރާކަމަށާއި، އެހެންކަމުން މަޖިލިސް ބަންދު ކުރަން ޖެހޭ ސަބަބެއް ނެތްކަމަށް އޭނާ ވިދާޅުވިއެވެ.
އެމްޑީޕީގެ ފަރާތުން ރޯދަ މަހަށް މަޖިލީސް ބަންދު ކުރުމަށް އެއްބަސް ނުވާނެކަމަށާއި، އެކަމާ އެމްޑީޕީގެ ޕާލިމެންޓަރީ ގްރޫޕްގެ ހުރިހާ މެމްބަރުން ވެސް ދެކޮޅު ހަދާކަމަށް ފާހަގަކޮށްފައިވެއެވެ. ދުވާލަކު 2 ގަނޑިއިރު މަޖިލީހުގެ މަސައްކަތަށް ރޯދަ މަހު ލިބޭއިރު، އެ ވަގުތުގެ ތެރޭގައި މަސައްކަތް ނުކުރެވެންވީ ސަބަބެއް ނެތްކަމަށް މެންބަރުން ފާހަގަކޮށްފައިވެއެވެ.
ކުރިއަށް އޮތް ރޯދަ މަހަށް ރައްޔިތުންގެ މަޖިލީސް ބަންދުކޮށް، މަޖިލީހުގެ ފުރަތަމަ ދައުރު ކުރުކުރުމަށް މަޖިލީހުގެ އާންމު ކޮމިޓީއިން ވަނީ އެންމެ ފަހުން ބޭއްވި ޖަލްސާގައި ފާސްކޮށްފައެވެ.
ދައުރު ކުރުކޮށްލުމަށްފަހު، ރޯދަ މަހަށް މަޖިލީސް ޗުއްޓީއަށް ދާން މަޖިލީހުގެ ގަވާއިދަށް އިސްލާހު ހުށައެޅުއްވީ މާފަންނު ދެކުނު ދާއިރާގެ މެންބަރު އަބްދުﷲ ރިފާއު (ބޮޗޭ) އެވެ.
ގަވާއިދުގައި މިހާރު އޮންނަ ގޮތުންނަމަ ފުރަތަމަ ދައުރު ހިނގާނީ ފެބުރުއަރީ މަހުގެ 1 އިން ފެށިގެން މޭ މަހުގެ 15 ވަނަ ދުވަހުގެ ނިޔަލަށެވެ. ރިފާއު އެ މާއްދާއަށް ހުށަހެޅި އިސްލާހަކީ ފުރަތަމަ ދައުރު އަވަސްކޮށް، ދައުރު ހިނގާނީ ޖެނުއަރީ މަަހުގެ ފުރަތަމަ ދުވަހުން ފެށިގެން ޖެނުއަރީ މަހުގެ ނިޔަލަށް ކަމަށް ކަނޑައަޅައި ދިނުމަށެވެ. އަދި ދެވަނަ ދައުރު، ޖޫން މަހުގެ ފުރަތަމަ ދުވަހުން ފެށިގެން އޮގަސްޓު މަހުގެ 15 ވަނަ ދުވަހުގެ ނިޔަލަށް އޮންނަ އޮތުން އޭޕްރީލު މަހުން ފެށިގެން ޖުލައި މަހުގެ ނިޔަލަށް ބަދަލުކުރުމަށް ހުށަހެޅިއެވެ.
މިހާރު އޮންނަ ގޮތުންނަމަ 3 ވަނަ ދައުރު ހިނގާނީ އޮކްޓޫބަރު މަހުގެ ފުރަތަމަ ދުވަހުން ފެށިގެން ނޮވެމްބަރު މަހުގެ ނިޔަލަށެވެ. ރިފާއުގެ ހުށަހެޅުމަކީ 3 ވަނަ ދައުރު ސެޕްޓެމްބަރު މަހުގެ ފުރަތަމަ ދުވަހުން ފެށިގެން ނޮވެމްބަރު މަހުގެ ނިޔަލަށް ބަދަލުކުރުމެވެ. ގަވާއިދުގެ 24 ވަނަ މާއްދާގެ އަކުރެެއް އިތުރުކުރަންވެސް މެންބަރު ހުށަހެޅި އެވެ.
މިކަމުގެ ސަބަބެއްކަމަށް ވިދާޅުވީ ރޯދަ މަހު މަސައްކަތް ކުރަން ލިބޭ ވަގުތު ކުޑަވާނެތީ، އުފެންދުންތެރިކަން ރަނގަޅު މަސައްކަތްތަކެއް ނުކުރެވޭނެތީއެވެ.
