ކޯޓުތަކަށް ހުށަހެޅޭ ޖިނާއީ މައްސަލަތަކުގެ އިބްތިދާއީ މަރުޙަލާ ކުރުކުރުމަށް މަޝްވަރާކޮށްފިއެވެ.
މި މަޝްވަރާތައް ކުރިއަށް ގެންގޮސްފައިވަނީ ޕްރޮސެކިއުޓަރ ޖެނެރަލް އޮފީހުން ޖުޑީޝަރީގެ ބޭފުޅުންނާއެކު ބޭއްވި ”ބަންދު ފޯރަމް“ ގައެވެ.
މި ފޯރަމްގައި މަޝްވަރާކުރެވުނު މުހިންމު ކަންތައްތަކުގެ ތެރޭގައި ކޯޓުތަކުގައި ތާވަލުކުރެވޭ އަޑުއެހުންތައް ކެންސަލްކުރުން މަދުކުރުމަށްޓަކައި ސެންޓްރަލައިޒްޑް ޝެޑިއުލިންގ ނިޒާމެއް ޤާއިމުކުރުމާއި، މައްސަލަތަކުގެ ޢިބްތިދާއީ އަޑުއެހުންތައް މަދުކުރުމަށްޓަކައި ޝަރީޢަތުގެ ބޭރުން އިދާރީ ގޮތުން ކުރެވެންހުރި ކަންކަން ކުރިއަށްގެންދިއުން ހިމެނެއެވެ.
މީގެ އިތުރުން، ހެކިން ކޯޓަށް ޙާޟިރުކުރުމުގައި ދިމާވާ މައްސަލަތަކަށް ޙައްލު ހޯދުމާއި، ޝަރީޢަތް ނިމެންދެން ބަންދުކުރެވިފައިވާ މީހުންގެ ތެރެއިން ޝަރުޠުހަމަވާ މީހުން މޮނިޓަރ ކުރެވޭނެ ނިޒާމެއްގެ ތެރެއިން ބަންދުން ދޫކޮށްލުމާ ގުޅޭ ޤާނޫނީ މަޝްވަރާ ކުރެވުނެވެ.
އެކަމާ ގުޅޭގޮތުން ”ސަންގު“ އަށް މައުލޫމާތު ދެއްވަމުން ޕީޖީ އޮފީހުގެ އޮފިޝަލަކު ވިދާޅުވީ، ޖުޑީޝަރީއާއެކު ބޭއްވުނު ފޯރަމްގައި އެއްބަސްވެވުނު އެންމެ މުހިއްމު ކަމަކީ ޖިނާއީ މައްސަލަތަކުގެ އިބްތިދާއީ މަރުޙަލާ ކުރު ކުރުމެވެ. އެގޮތުން މިހާރު ކޯޓަށް ހުށަހެޅޭ މައްސަލަތަކުގައި ލިއެކިއުންތައް ލިބިފައިވޭތޯ ބެލުމާއި، ވަކީލެއްގެ ފުރުސަތު ދިނުމާއި، ދައުވާ އިއްވުމާއި، އެއަށްފަހު ދައުވާއަށް ޖަވާބުދާރީވެ ހެކި ހުށަހެޅުން ފަދަ ކޮންމެ ކަމަކަށް ވަކިވަކި އިބްތިދާއީ އަޑުއެހުންތައް ބޭއްވުމުގެ ނަތީޖާއެއްގެ ގޮތުން ގިނަ ދުވަސްތަކެއް އިބްތިދާއީ މަރުޙަލާގައި ހޭދަވާކަމަށް އޭނާ ވިދާޅުވިއެވެ.
އެހެންކަމުން މިހާރު މަޝްވަރާ ކުރެވިފައިވަނީ ޖިނާއީ މައްސަލައެއް ކޯޓަށް ހުށަހެޅުމުން ލިއެކިއުންތައް ލިބިފައިވޭތޯ ކަށަވަރު ކުރުމާއި، ވަކީލެއްގެ ފުރުސަތު އަދި ދިފާއީ ހެކި ހުށަހަޅަން އޮތްނަމަ އެ ފުރުސަތުވެސް އިދާރީ ގޮތުން ފޯރުކޮށްދީ އެއަށްފަހު އިބްތިދާއީ މަރުޙަލާ ކުރިއަށް ގެންދިއުމަށެވެ.
އެ ބަދަލު ގެނައުމަށް ގެންނަންޖެހޭ ބަދަލުތައް ގެނައުމަށް ކަމާ ގުޅުންހުރި އިދާރާތަކުގައި އެދުމަށް މި ފޯރަމްގައި ވަނީ މަޝްވަރާ ކުރެވިފައެވެ. އަދި މި ބަދަލަކީ ފަނޑިޔާރުންވެސް ތާއީދު ކުރައްވާ ބަދަލެއްކަމަށް ޕީޖީ އޮފީހުގެ އޮފިޝަލު ވިދާޅުވިއެވެ.
މީގެ އިތުރުން، ހެކިން ހާޒިރު ކުރުމުގައި ދައުލަތުންވެސް މިހާރަށްވުރެ ބޮޑަށް ފަރުވާތެރިވެ، ހެކި ހާޒިރު ކުރުމަށްވެސް ވަކި މިންވަރަކަށް ފުރުސަތު ދިނުމަށް މަޝްވަރާ ކުރެވިފައިވެއެވެ.
ފަނޑިޔާރުންގެ ފަރާތުން މައްސަލަތަކުގެ ޝަރީޢަތް ކުރިއަށްގެންދިއުމުގައި ހުރި ގޮންޖެހުންތައް ފާހަގަކުރެވުނެވެ. އެގޮތުން އެކަށީގެންވާ އިންސާނީ ވަޞީލަތް ނުލިބުމާއި، ކޯޓުތަކަށް ބޭނުންވާ ޢިމާރާތާއި ވަސީލަތްތައް ނުލިބޭ މައްސަލަ ތަކުރާރުކޮށް ފާހަގަކުރެވުނެވެ.
ފޯރަމްގައި އިތުރަށް މަޝްވަރާކުރެވުނު ކަންތައްތަކުގެ ތެރޭގައި ކަފާލާތުގެ ދަށުން ބަންދުން ދޫކޮށްލުމުގެ ނިޒާމު ފުޅާކުރުމާއި، މައްސަލަތަކުގެ ލިޔުންތައް ޙިއްޞާކުރުމަށް އިލެކްޓްރޯނިކް ނިޒާމެއް ޤާއިމުކުރުން ހިމެނެއެވެ. މީގެ އިތުރުން، މައްސަލަތަކުގެ ޝަރީޢަތްތައް މިހާރަށްވުރެ އަވަސްކުރުމަށް ނިޒާމަށް ގެނެވެންހުރި ބަދަލުތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނެވެ.
މި ފޯރަމަކީ ޖުޑީޝަރީގެ މަސައްކަތްތައް އަވަސްކޮށް، ހަރުދަނާކުރުމަށް އެޅޭ މުހިންމު ފިޔަވަޅެއްގެ ގޮތުގައި ބެލެވެއެވެ. ޚާއްޞަކޮށް ޝަރީޢަތް ނިމެންދެން ބަންދުގައި ތިބޭ މީހުންގެ މައްސަލަތައް އަވަސްކުރުމަށާއި، ކޯޓުތަކުގެ މަސައްކަތްތައް ހަލުވިކުރުމަށް މި ފޯރަމުން ލިބުނު މަޢުލޫމާތާއި ޚިޔާލުތައް މުހިންމު ދައުރެއް އަދާކުރާނެ ކަމަށް އުންމީދުކުރެވެއެވެ.
މި ފޯރަމްގައި ފަނޑިޔާރުންގެ އިތުރުން ޖުޑީޝަލް ސަރވިސް ކޮމިޝަންގެ ރައީސް އަލްއުސްތާޛު ޙުސައިން ރިޟާ އާދަމާއި އެ ކޮމިޝަންގެ މެންބަރުންނާއި، ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަންގެ މަންދޫބުން ބައިވެރިވެވަޑައިގެންނެވިއެވެ.
މި ފޯރަމްގެ ފުރަތަމަ ސިލްސިލާ ކުރިއަށް ގެންގޮސްފައިވަނީ ޖުޑީޝަރީ ފިޔަވައި މި ދާއިރާގެ ބާކީ ހުރި އިދާރާތަކާ އެކުގައެވެ.
