ސަލްޓަން ޕާކު މަރާމާތު ކޮށްދޭނެ ބަޔަކު ހޯދަން އިއުލާނުކޮށްފި އެވެ.
މާލޭ ސިޓީ ކައުންސިލުން މި އިއުލާނުކޮށްފައި މިވަނީ އެ ދެތަނުގެ ހާލަތު ފެނި ހިތާމަކުރައްވާކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާ ދަނޑިވަޅެއްގައެވެ. އެގޮތުން އާއިލީ ވަގުތުތަކެއް ހޭދަކުރެއްވުމަށްޓަކައި ސަލްޓަންޕާކު އަދި ރަސްފަންނަށް ޒިޔާރަތް ކުރެއްވުމަށްފަހު ސޯޝަލްމީޑިއާގައި ކުރެއްވި ޕޯސްޓެއްގައި ރައީސް ވިދާޅުވީ، އެ ދެތަންވެސް ވީރާނާ ވަމުންދާކަމަށާއި އެ ދެ ސަރަހައްދަކީވެސް މާލޭގެ ތޮއްޖެހުމުގެ ތެރެއިން ރައްޔިތުންނަށް ބޮޑެތި ހިތްހަމަޖެހުންތަކާއި އުފާ ލިއްބައިދޭ ތަންތަން ކަމަށެވެ.
އެހެންކަމުން އެ ދެތަނުގެ ރީތިކަމާއި އާރޯކަން އަނބުރާ ގެނެސްދެއްވާނެކަމަށާއި ކުރިއަށްވުރެވެސް ފުރިހަމަ ކޮށްދިނުމަށްޓަކައި މި ސަރުކާރުން ހާއްސަ މަސައްކަތްތަކެއް ކުރައްވާނެކަމުގެ ޔަގީންކަން ދެއްވާކަމަށް އެމަނިކުފާނު ވިދާޅުވި އެވެ.
ރައީސް އެ ޕޯސްޓު ކުރައްވާފައިވާއިރު، މާލޭ ސިޓީ ކައުންސިލުން ގެޒެޓްކުރި އިއުލާނެއްގައި ވަނީ އެ މަސައްކަތަށް ޝައުގުވެރިވާ ފަރާތްތަކުން މައުލޫމާތު ސާފުކުރުމަށް ހުޅުވާލާފައެވެ. އެގޮތުން މައުލޫމާތު ސާފުކުރުން އޮންނަނީ 18 ފެބްރުއަރީ 2025ވާ އަންގާރަ ދުވަހުގެ ހެނދުނު 09:00 ގައެވެ.
މީގެ އިތުރުން، ސަލްޓަން ޕާކު މަރާމާތު ކުރުމަށް ބިޑު ހުށަހެޅުމުގައި ބައިވެރިވެވޭނީ ދިވެހި ކުންފުނި، ޕާޓްނާޝިޕް، ލޯކަލް އިންވެސްޓްމެންޓް ، އަދި ވިޔަފާރިކުރުމުގެ ހުއްދަ ލިބިފައިވާ ފަރާތްތަކަށްކަމަށް އެ އިއުލާނުގައި ފާހަގަކޮށްފައިވެއެވެ.
ރަސްފަންނާއި ސަލްޓަންޕާކު ތަރައްގީކުރުމުގެ މަސައްކަތްތަކުގައިވެސް ރައީސް މުއިއްޒުގެ އިސް ދައުރެއް އޮވެއެވެ. އެގޮތުން ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ވެރިކަމުގެ ދައުރުގައި ހައުސިންގް މިނިސްޓަރުކަމުގައި ހުންނެވިއިރު އެތަންތަން ތަރައްގީކުރެވިގެންދިޔައީ އެމަނިކުފާނުގެ ބެއްލެވުމުގެ ދަށުންކަން ފާހަގަކުރެވެއެވެ.
