މި ސަރުކާރާއި ރައީސް ޑރ. މުހައްމަދު މުއިއްޒުގެ އެންމެ ކާމިޔާބު އެއް މަސައްކަތެއްގެ ގޮތުގައި ފާހަގަކުރަން ޖެހެނީ ގައުމު އިތުރަށް ދަރަނިވެރިނުކޮށް ބޮއްސުންލާފައި އޮތް މާލީ ނިޒާމަކުން ގައުމު ސަލާމަތް ކުރުންކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.
ވަޒީރުންނާއި ސުވާލު ކުރެވޭ ގޮތަށް އާންމުކޮށް ހުޅުވާލައިގެން ކުރިޔަށް ގެންދާ އަހާ ފޯރަމްގެ މިރޭގެ ބައްދަލުވުމުގައި ސައީދު ފާހަގަކުރެއްވީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމަށް ފަހު ގަޑުބަޑުވެފައިވާ ގައުމުގެ މާލީ ނިޒާމު ހަރުދަނާ ކުރުމަށް ކުރެއްވި މަސައްކަތްތަކެވެ. ސައީދު ވިދާޅުވީ މި ސަރުކާރުގެ ކާމިޔާބީއާއި، ނިކުންނަމުންދާ ނަތީޖާގެ ވާހަކަ ފައްޓަން ޖެހޭ އެންމެ މުހިންމު އެއް ހިސާބަކީ ގައުމުގެ އިގްތިސާދު ހަމަޔަކަށް އެޅުވުމަށް އެމަނިކުފާނު ކުރެއްވި އެ މަސައްކަތް ކަމަށެވެ.
ސައީދު ވިދާޅުވީ ވެރިކަމާއި ހަވާލުވެ ރައީސް މުއިއްޒު އެންމެ ފުރަތަމަ ވެސް ހައްލު ކުރަން ޖެހިވަޑައިގަތީ ދަރަނީގެ މައްސަލަތައް ކަމަށެވެ. ސަރުކާރަށް ވާރުތަވެގެން އައި ބޮޑެތި ދަރަނިތައް އަނބުރާ ދެއްކުމުގައި ބޮޑެތި ގޮންޖެހުންތައް ހުރުމުގެ ސަބަބުން އެމަނިކުފާނު ނިންމެވީ ހާލަތުން އަރައިގަތުމަށް ބޮއްސުންލާފައި އޮތް ނިޒާމެއް ނިމުމަކަށް ގެނައުމަށްކަމަށް ސައީދު ވިދަޅުވި އެވެ.
ސައީދު ވިދާޅުވީ އެއް ރިޔާސީ ބަޔާނުން، އަނެއް ރިޔާސީ ބަޔާނަށް ދިޔައިރު ފެނިގެން ދިޔައީ ފިޔަވަޅުތަކުގެ ނަތީޖާއާއި ސަރުކާރުގެ އިހުލާސްތެރި މަސައްކަތް ކަމަށެވެ.
ދެއްވައިފި ދެ ރިޔާސީ ބަޔާނެއް.. އޭގެ ތެރޭގައި ފުރަތަމަ ރިޔާސީ ބަޔާން އެއީ 2024 ވަނަ އަހަރު.. އަދި އެންމެ ފަހުން ދާދި އިހަށް ދުވަހު އެ ހުށަހަޅައިދެއްވި.. ރައްޔިތުންގެ މަޖިލީހަށް ރިޔާސީ ބަޔާން 2025.. ފުރަތަމަ ބަޔާނުގައި ވާހަކަ ދެއްކެވީ އެމަނިކުފާނަށް ވާރުތަވި ބޮޑެތި ގޮންޖެހުންތަކުގެ މައްޗަށް.. އަދި ބޮއްސުންލާފައި އޮތް މާލީ ނިޒާމެއް.. އޮނިގަނޑު ހިންގުމުގެ ނިޒާމަށް އައިސްފައި އޮތް ބަނަކަން އެހެން ނޫނީ ގޮންޖެހުން..
ސައީދު ވިދާޅުވީ މީގެ އެއް އަހަރު ކުރިން ރައީސް މުއިއްޒު ދެއްވި ރިޔާސީ ބަޔާނުގައި ވަނީ، ގޮންޖެހުންތަކުން އަރައިގަތުމަށް ކުރަމުންދާ މަސައްކަތުގެ ވާހަކަ ކަމަށެވެ. އެއަށް ފަހު އަނެއްކާވެސް ޖެހިގެން އައި ރިޔާސީ ބަޔާނުން ފެނިގެން ދިޔައީ އެ ދުވަހު އެމަނިކުފާނު ދެއްވި ޔަގީންކަމުގެ ފޮނި ނަތީޖާކަމަށް ސައީދު ވިދާޅުވިއެވެ.
މިހާތަނަށް ސަރުކާރުގެ އެންމެ ފާހަގަކުރެވޭ ކާމިޔާބެއްކަމަށް ސައީދު ވިދާޅުވީ، ރާއްޖެ އިތުރަށް ދަރަނިވެރިނުކޮށް ލޯނު ނުނަގައި ރައްޔިތުންނަށް ހިދުމަތް ކުރުމެވެ. ސައީދު ސިފަ ކުރެއްވި ގޮތުގައި މިއީ އަންނަން އޮތް ޖީލުތައް ދަރަނީގެ ބުރަތަކުން ސަލާމަތް ކުރުމަށް ރައީސް އެޅުއްވި އެންމެ މުހިންމު ފިޔަވަޅެވެ.
