ރަމަޟާން މަހު ތަކެތީގެ އަގު އުފުލޭ މައްސަލައަށް ހައްލު ގެނައުމަށް، ތަކެތީގެ އަގުތަކާއި ބެހޭ ސިޔާސަތެއް އެކުލަވާލާފައިވާއިރު މާކެޓުގައި އެއްވެސް ބާވަތެއްގެ އަގު އުފުލޭނަމަ އެކަމުގެ ތެރެއަށް ވަދެ މައްސަލަ ހައްލު ކުރާނެކަމަށް އިކޮނިމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.
ރަމަޟާން މަހު ތަކެތީގެ އަގު އިންތިހާއަށް އުފުލި، އަތް ނުފޯރާ ފަށަށް ދިއުމަކީ ކޮންމެ އަހަރަކު ވެސް ދިމާވާ އެންމެ ބޮޑު މައްސަލައެވެ. އަދި ރައްޔިތުން އެކަމާ ކަންބޮޑުވުންފާޅު ކުރާއިރު، އެކަން ހައްލު ކުރުމަށް ސަރުކާރުން ވެސް ތަފާތު އެކި ފިޔަވަޅުތައް އަޅައެވެ.
ކުރިޔަށް އޮތީ ރަމަޟާން މަސްކަމަށްވުމާއި އެކު ތަކެތީގެ އަގަށް އަތުވެދާނެ ބަދަލުތަކާއި ގުޅޭގޮތުން އާންމުންގެ މީހަކު ކުރި ސުވާލަކަށް ޖަވާބު ދެއްވަމުން ”އަހާ ފޯރަމް“ ގައި ސައީދު ވިދާޅުވީ 2024 ވަނަ އަހަރުގެ ރަމަޟާން މަހަކީ ރައްޔިތުން އާންމުކޮށް ބޭނުން ކުރާ ކާބޯތަކެތީގެ އަގުތައް އުފުލިޔަ ނުދީ އެއްވަރެއްގައި ހިފެހެއްޓުނު ހަމައެކަނި ފަހަރަށް ވާނެކަމަށެވެ.
ސައީދު ވިދާޅުވީ ކާބޯތަކެތީގެ އަގުތައް އެއްވަރެއްގައި ހިފަހައްޓައި، މެނޭޖު ކުރެވުނު ހަމައެކަނި ވެރިއަކަށް ރައީސް ޑރ. މުހައްމަދު މުއިއްޒު ވަނީ އެޅުއްވި ހަރުދަނާ ފިޔަވަޅުތަކުގެ ނަތީޖާއެއްގެ ގޮތުން ކަމަށެވެ. އެގޮތުން ރައީސް އޮފީހުގައި އެކަމަށް ވަކި ކޮމިޓީއެއް ނަގައި މިނިސްޓްރީއާއި ކަމާއި ގުޅުން ހުރި އެކި އިދާރާތައް ކެނޑިނޭޅި ކުރި މަސައްކަތް ހިމެނޭކަމަށް ސައީދު ވިދާޅުވި އެވެ.
ފުރަތަމަ ފަހަރަށް އިރާދަކުރެއްވިއްޔާ ތާރީހުގައި، އެންމެ ރަނގަޅަށް ކާބޯތަކެތީގެ އަގުތައް މެނޭޖު ކުރެވިގެން.. ދިޔަ މިދިޔަ ރަމަޟާން މަހު.. އެއީ އެކިއެކި އައިޓަމްތައް ލިބުމުގައި ވެސް އަދި އަގުތަކަށް ބެލިކަމުގައި ވިޔަސް.. މިއީ ހަމަ ޕަބްލިޝްޑް ޑޭޓާ އެއަށް ބެއްލެވީމަ ހަމަ އެނގޭނެ..
އަހަރެއް ފަހުން ދެވަނަ ރަމަޟާން މަސް ކުރިމަތިލާއިރު، ވޯލްޑް ބޭންކުތައް ފަދަ ބައިނަލްއަޤުވާމީ މާލީ އިދާރާތަކުން ރާއްޖޭގެ މާލީ ހާލަތާއި އިންފްލޭޝަނަށް ކުރާނެކަމަށް ލަފާކުރި އަސަރުތައް ގޯސްވިޔަ ނުދީ ހިފެހެއްޓިކަމަށް ސައީދު ވިދާޅުވިއެވެ. މިސާލެއްގެ ގޮތުން ސައީދު ފާހަގަކުރެއްވީ 2024 ވަނަ އަހަރު ވޯލްޑްބޭންކުން މި އަހަރަށް ލަފާކޮށް ނެރުނު ރިޕޯޓުގައި ރާއްޖޭގެ އިންފްލޭޝަން ރޭޓު 7 އިންސައްތައަށް އަރައިގެންދާނެކަމަށް ބުނެފައިވުމެވެ. އެހެން ނަމަވެސް ސަރުކާރުން އެޅި ފިޔަވަޅުތަކުން އެ އަދަދު 3 އިންސައްތައަށް ވުރެ މައްޗަށް ގޮސްފައި ނުވާނެކަމަށް ސައީދު ވިދާޅުވިއެވެ.
އެ އަމާޒަށް ވަސީލުވެވުނީ ސައީދު ވިދާޅުވި ގޮތުގައި ކެބިނެޓު ބައްދަލުވުމުގައި މަޝްވަރާ ކުރެވުނު ގޮތަށް ތަކެތީގެ އަގުތަކާއި ބެހޭ ސިޔާސަތެއް އެކުލަވާލުމަށް ރައީސް މުއިއްޒު އެންގެވުމެވެ. އެހެންވެ އެ ސިޔާސަތު އެކުލަވާލައި، 100 އާންމު ގެއެއްގައި ނުވަތަ ގޭބިސީގައި ބޭނުން ކުރާނެ މުދަލާއި އަސާސީ މުދަލުގެ ބާވަތްތައް ދެނެގަނެ އެ ބޭނުން ކުރާނެ ގޮތް ލިޔެވިފައިވާނެކަމަށް ސައީދު ވިދާޅުވި އެވެ.
ބާޒާރުގައި ތަކެތީގެ އަގު އުފުލިއްޖެ ނަމަ އަމަލު ކުރާނެ ގޮތުގެ ސިޔާސަތެއް އެކުލަވާލެވިފައިވާއިރު ސައީދު ވިދާޅުވީ އެއީ 183 އައިޓަމްކަމަށެވެ. އޭގެ ތެރެއިން 54 ބާވަތް ރަމަޟާން މަހަށް ހާއްސަކޮށް ކްރިޓިކަލް އައިޓަމްތަކުގެ ގޮތުގައި ކަނޑައަޅާފައިވާނެކަމަށް ސައީދު ވިދާޅުވިއެވެ.
މާކެޓުގެ އެއްވެސް ބާވަތެއްގައި އަގުތައް އުފުލިގެން ދާނަމަ އެއަށް އަޅުގަނޑުމެން އިންޓަވީން ކުރާނަން.. އެއީ ޗޮއިސްއެއް ނޫން.. ކުރާނެ އެކަން..
ސައީދު ވިދާޅުވީ މިއީ އިކޮނޮމިކް މިނިސްޓްރީއާއި، އެސްޓީއޯ އަދި ފަންނީ ބޭފުޅުން ހިމެނޭ ގޮތަށް މަޝްވަރާކޮށްގެން އެކުލަވާލި ސިޔާސަތެއް ކަމަށެވެ. އަދި މާކެޓުގައި އެއްވެސް ބާވަތެއްގެ އަގުތައް އުފުލިގެން ދާނަމަ އެކަމަކަށް ވަގުތުން ފިޔަވަޅު އަޅާނެކަމަށް ވިދާޅުވިއެވެ.
މީގެއިތުރުން ރައީސް މުއިއްޒު އަބަދުވެސް މަސައްކަތް ކުރައްވަނީ ރައްޔިތުންގެ ހައްގުގައިކަމަށާއި، ރައްޔިތުންނަށް ދިމާވާ ކޮންމެ ދަތިކަމެއް ހައްލު ކުރުމުގައި ސަރުކާރު ދެމި އޮންނާނެކަމަށް ސައީދު ވިދާޅުވިއެވެ.
