އެންވައިރޮމެންޓް މިނިސްޓްރީއާއި، ޓުއިރިޒަމް އެއްކުރުމުން ނަތީޖާ ނެރެން މާ ފަސޭހަވާނެކަމަށާއި ރާއްޖެއަށް ގިނަ ފަތުރުވެރިން އަންނަ ސަބަބަކީ ތިމާވެށީގެ މުއްސަނދިކަންކަމަށް މިނިސްޓަރ އިބްރާހިމް ތޯރިގު ވިދާޅުވެއްޖެއެވެ.
ޓޫރިޒަމާއި އެންވައިރޮމެންޓް މިނިސްޓްރީ އެއްކޮއްލެއްވުމަށް ރައީސް ޑރ. މުހައްމަދު މުއިއްޒު ނިންމެވީ އިބްރާހިމް ފައިސަލް މަގާމުން ވަކިކޮށެވެ. އަދި މިނިސްޓްރީ ހިންގެވުން ތޯރިގާއި ހަވާލު ކުރެއްވުމުން ދެ މިނިސްޓްރީ އެއްކުރި ސަބަބާއި މެދު ގިނަ ބަޔަކު ސުވާލު އުފެއްދިއެވެ.
އަހާ ފޯރަމްގައި އާންމުގެ މީހަކު އެކަން ފާހަގަކޮށް ކުރި ސުވާލުގެ ޖަވާބުގައި ތޯރިގު ވިދާޅުވީ، ރާއްޖެއަށް އަންނަ ފަތުރުވެރިންގެ ނިސްބަތުން 60 އިންސައްތައަކީ ގުދުރަތީ ރީތިކަމާއި ސާފު ވެށި ދެކިލުމަށް އަންނަ މީހުން ކަމަށެވެ. ތޯރިގު ވިދާޅުވީ ރާއްޖޭގެ ތިމާވެށީގެ މުއްސަނދިކަމާއި މެދު އެތައް ބަޔަކު ގަޔާވާކަމަށާއި، މި ވެށި ދަމަހައްޓައި ހިމާޔަތް ކުރުމަށް ހަރުދަނާ ފިޔަވަޅުތައް ކޮންމެހެން ވެސް އަޅާފައި ހުރުން މުހިންމުކަމަށެވެ.
ގައުމުގެ ފަތުރުވެރިކަން ކުރިއަރާފައިވާ ސަބަބުތަކުގެ ތެރޭގައި ތިމަވެށި އިސްރޯލެއް އަދާކުރާކަން ފާހަގަކުރައްވައި ތޯރިގު ވިދާޅުވީ ކުރިޔަށް އޮތް ތަނުގައި ވެސް ރާއްޖެއަށް އަންނަ ފަތުރުވެރިންގެ އަދަދުތައް އިތުރު ކުރެވޭނީ ތިމާވެށީގެ މުއްސަނިދކަން އިތުރުކޮށް ހިމާޔަތްކޮށްގެން ކަމަށެވެ.
އެހެންވީމަ ތިމާވެށި ދެމެހެއްޓުމަކީ ވަރަށް މުހިންމުކަމެއް، ރާއްޖެއަށް އެ އަންނަ ފަތުރުވެރިން ރާއްޖެއަށް އައުމަށް.. ރާއްޖެއަށް އިތުރު ފަތުރުވެރިން ގެންނަކަމަށްވަންޏާ ވެސް ރާއްޖޭގެ ތިމާވެށި މުއްސަނދިކަން އިތުރަށް ރަނގަޅުކޮށް ދެމެހެއްޓި ދެމެހެއްޓުން މުހިންމު، އެހެންވީމަ އެކަން ކުރެވިއްޖެ ނަމަ ކުރިޔަށް އޮތް ތަނުގައި ވެސް ފަތުރުވެރިކަން އާލާވަމުންދާއިރު ތިމާވެށި ރައްކާތެރިކޮށް ބެލެހެއްޓިގެން ދާނެ..
ދުނިޔޭގައި ވެސް ފަތުރުވެރިކަން މިހާރު އެންމެ ބޮޑަށް ކުރިއަރަމުން އަންނަނީ ސަސްޓެއިނަބަލް ޓުއަރިޒަމްކަމަށެވެ. އަދި ދެމެހެއްޓެނިވި ގޮތެއްގައި ފަތުރުވެރިކަން ކުރިއަރުވާއިރު ރާއްޖޭގެ ކޮންމެ ރިސޯޓަކީ ވެސް ތިމާވެއްޓާއި ރައްޓެހި ގޮތަކަށް މަސައްކަތްކޮށް އޮޕަރޭޓު ކުރާ ރިސޯޓުތައްކަމަށް ތޯރިގު ވިދާޅުވިއެވެ. އެގޮތުން ކޮންމެ ރިސޯޓެއްގައި ވެސް ޖަނަރޭޓުތައް އަމިއްލައަށް ބަހައްޓައި ކަރަންޓު ފޯރުކޮށްދިނުމާއި، ރިސޯޓެއްގައި އަމިއްލަ ޕްލާންޓު ބަހައްޓައި ފެން އުފެއްދުމާއި، އަމިއްލައަށް ކުނި މެނޭޖު ކުރަމުން ދިއުން ފާހަގަކުރެއްވި އެވެ.
ތޯރިގު ވިދާޅުވީ ޖަނަރޭޓަރުގެ ބަދަލުގައި އިޔާދަކުރަނިވި ހަކަތަ ބޭނުންކޮށްގެން ކަރަންޓު ނުވަތަ ފެން އުފައްދައި ފޯރުކޮށްދެވޭނަމަ، އެވެސް އެޅިގެންދާ މުހިންމު ފިޔަވަޅެއްކަމަށެވެ. ކުނި މެނޭޖު ކުރުމާއި ގުޅޭގޮތުން މިނިސްޓަރ ވިދާޅުވީ އެ ރިސޯޓެއްގައި ސެގްރިގޭޓުކޮށް ދެން ހުންނަ ކުންޏަކީ ރައްކާތެރި ގޮތުގައި ނައްތާލެވޭ ކުނީގެ ގޮތުގައި ހެދުމުން އެއީ ސަސްޓެއިނެބިލިޓީއަށް އެޅިގެންދާ ފިޔަވަޅެއްކަމަށެވެ.
ޓޫރިޒަމާއި އެންވައިރޮމެންޓް މިނިސްޓްރީ އެއްކުރުމުގެ ސަބަބުން މުޅި ދާއިރާއާއި ތިމާވެށީގެ ތެރެއިން ވެސް މަސައްކަތްކޮށް ނަތީޖާ ނެރެން ފަސޭހަ ވެގެންދާނެކަމަށް ތޯރިގު ވިދާޅުވިއެވެ. އަދި މި ދެ ދާއިރާއަށް ވެސް އޭގެ ސަބަބުން ވެސް އަންނާނީ ކުރިއެރުންތައްކަމަށް ވިދާޅުވިއެވެ.
