ރާއްޖޭގެ ރިސޯޓުތަކުން ވަކި އިންސައްތައެއް ރާއްޖޭގެ ބޭންކުތަކަށް ޑޮލަރު މާރު ކުރަން ޖެހޭ ގޮތަށް ބަދަލު ގެނައުމުން އޭގެ ހެޔޮ އަސަރު ރައްޔިތުންނަށް ކުރަމުންދާކަމަށް ޓޫރިޒަމް އެންޑް އެންވައިރޮމެންޓް މިނިސްޓަރ ތޯރިގް އިބްރާހިމް ވިދާޅުވެއްޖެއެވެ.
ރާއްޖޭގެ އިގްތިސާދަށް ދިމާވި ދަތިތަކާއި އެކު އުފެދުނު އެންމެ ބޮޑު މައްސަލައަކީ ޑޮލަރުގެ ތާށިކަމެވެ. އަދި ޑޮލަރުގެ ކަޅު ބާޒާރެއް އުފެދިގެން ދިޔައިރު، މައްސަލަ ހައްލު ކުރުމަށް ޖުމްލަ ގޮތެއްގައި ސަރުކާރުން ގިނަ ފިޔަވަޅުތައް އަޅަން ޖެހުނުއިރު ގާނޫނުތައް ވުޖޫދު ކުރުން ހިމެނެ އެވެ.
ޑޮލަރުގެ އަގުގެ އަދިވެސް ކަޅު ބާޒާރެއް އެބައޮތްކަމަށާއި، އެކަން ހައްލުކޮށް އަގު ދަށްކުރުމަށް ކުރެވޭ މަސައްކަތަކީ ކޮބައިތޯ ”އަހާ ފޯރަމް“ ގައި އާންމުގެ މީހަކު ކުރި ސުވާލަށް ތޯރިގު ވިދާޅުވީ ފަތުރުވެރިންނަށް ހިދުމަތް ދޭ ރިސޯޓުތަކުން ލިބޭ އާމްދަނީން ވަކި އިންސައްތައެއް ރާއްޖޭގެ ބޭންކުތަކަށް މާރުކުރުމަށް ލާޒިމްވާ ގަވައިދު އެކުލަވާލުމާއި އެކު ހައްލު ފެންނަން ފެށިކަމަށެވެ. އަދި އޭގެ ފަހުން ޑޮލަރުގެ ކަޅު ބަޒާރުގައި އަގުތައް ދިޔައީ ދަށަށްކަން ފާހަގަކުރައްވައި، ސަރުކާރުން ގެންގުޅުއްވާ ބައެއް ސިޔާސަތުތައް ހާމަކުރެއްވިއެވެ.
މިނިސްޓަރ ވިދާޅުވި ގޮތުގައި، ސަރުކާރުގެ ފިޔަވަޅުތަކުގެ އެއް ނަތީޖާއެއްގެ ގޮތުން އަންނަ ސެޕްޓެމްބަރު މަހުން ފެށިގެން ސަރުކާރު ހިއްސާވާ ކުންފުނިތަކަށް ރަސްމީ ރޭޓުގައި ޑޮލަރު ލިބޭނެ އިންތިޒާމު ހަމަޖެހޭނެ ކަމަށެވެ. އަދި ކުރިޔަށް އޮތީ ރަމަޟާން މަސްކަމަށްވުމާއި އެކު އުމްރާވެރިންނަށް ހާއްސަކޮށް އިތުރު 1،500 ޑޮލަރު ހަމަޖައްސައިދޭން ސަރުކާރުން ނިންމާފައިވާކަމަށް ވިދާޅުވިއެވެ. މި ސިޔާސަތުތައް ސަރުކާރަށް ތަންފީޒު ކުރެވެނީ މިނިސްޓަރ ވިދަޅުވި ގޮތުގައި ރިސޯޓުތަކަށް ލިބޭ އާމްދަނީން ވަކި އަދަދެއް ބޭންކުތަކަށް މާރުކުރުމަށް ލާޒިމް ކުރުމެވެ.
އެހެންވީމަ މިހާރު އެދަނީ މައްސަލަތައް ހައްލުވަމުން… މި އަންނަ ބަދަލުތަކަކީ ރާއްޖޭގައި ޑޮލަރު ސާކިއުލޭޓު ކުރަން ފެށުމުން ރައްޔިތުންނަށް ލިބޭ ފައިދާތައް..
މީގެއިތުރުން ތޯރިގު ވަނީ ސަރުކާރުން މިހާރު އަޅާފައިވާ ފިޔަވަޅުތަކުން ފެންނާނެ އެންމެ ބޮޑު ހެޔޮ ބަދަލަކީ ރާއްޖެއިން ބޭރަށް ދަތުރު ކުރާ ދިވެހިންނަށް ވިއްކާ 500 ޑޮލަރު 1000 ޑޮލަރަށް އަންނަ އަހަރުގެ ފުރަތަމަ ކުއާޓާގައި ލިބެން ފެށުމެވެ. އަދި މިއީ ސީދާ ރައްޔިތު މީހާއަށް ލިބިގެންދާނެ މަންފާތައްކަމަށް މިނިސްޓަރ ވިދާޅުވިއެވެ.
ބޭރު ފައިސާގެ ގާނޫނެއް އެކުލަވާލައި އަމަލު ކުރަން ފަށާފައިވާއިރު އަހަރެއްގެ ތެރޭގައި ކާޑު ލިމިޓު ބޮޑުކޮށް، ޑޮލަރުގެ ކަޅު ބާޒާރު އެއްކޮށް ނައްތާލެވޭނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް ވަނީ ވިދާޅުވެފައެވެ.
ރައީސް ވިދާޅުވީ ގާނޫނު ތަންފީޒު ކުރުމަށް ފެށުމާއި އެކު ޑޮލަރުގެ ކަޅު ބާޒާރު ވެސް ނައްތާލެވޭނެ ކަމަށެވެ. އަދި ގާނޫނަށް އަހަރެއް ވެގެންދާއިރު، ސަރުކާރުގެ އަމާޒަށް ވަސިލުވޭނެކަމަށް ވިދާޅުވި އެވެ.
ރައީސް ވިދާޅުވީ ހުރިހާ ވިޔަފާރިއަކުން ވެސް ގާނޫނާއި އެއްގޮތަށް ޑޮލަރު މާރު ކުރަން ފެށުމުން އެތައް މައްސަލައަކަށް ހައްލު ލިބިގެންދާނެކަމަށެވެ.
ފަތުރުވެރިކަމުގެ ކަމާއި ގުޅުން ހުރި ފަރާތްތަކާއި ބައްދަލުކޮށް ހުށަހެޅި ހިޔާލާއި މަޝްވަރާތަކަށް އެގޮތަށް ގާނޫނު ފާސްކޮށްފައި ވަނީ ޑޮލަރު މާރުކުރުމުން އިސްތިސްނާވާ އުމުރު 10 އަހަރުން 12 އަހަރަށް މަތިކުރުމަށް ފަހު އެވެ. އަދި ރިސޯޓަކުގައި މާލީ ދަތިކަމެއް ހުރިނަމަ، އާމްދަނީގެ 20 ޕަސެންޓަށް ވުރެ މަދުން ދައްކަން އެދުމުގެ އިޚުތިޔާރު ދީފައި ވެއެވެ. ނަމަވެސް އެ ލުއި ދެވޭނީ އެކަން އެމްއެމްއޭއަށް ސާބިތުކޮށްދިނުމުން ކަމަށް ގާނޫނު ބުނެއެވެ.
