ހައްޖުގެ ނިޒާމު ހަރުދަނާ ކުރުމަށް ސަރުކާރުންވެފައިވާ ވައުދުގެ ދަށުން ކުރެވޭ މަސައްކަތުން، މި ދައުރުގެ ތެރޭގައި ހައްޖަށް ދިއުމުގެ ހަރަދުތައް ކުޑަ ކުރެވޭނެކަމަށް އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މޯލްޑިވްސް ހައްޖު ކޯޕަރޭޝަން ހިމެނޭހެން ރާއްޖޭގައި ހައްޖާއި އުމްރާގެ ހިދުމަތް ދިނުމުގެ ކުންފުނިތައް ހުރިއިރު އެންމެ ބޮޑު ޝަކުވާއަކީ އަގުގައި ހުރި ބޮޑެތި ފަރަގުތަކެވެ. އަދި ހައްޖު ކޯޕަރޭޝަނުގައި ބޮޑު ބެކްލޮގެއް އޮތުމުގެ ސަބަބުން، ސަރުކާރުން ވަނީ އެކަން ހައްލު ކުރުމުގެ މަސައްކަތް ކުރާނެކަމަށް ހާމަކޮށްފަ އެވެ.
ރިޔާސީ އިންތިހާބު ކާމިޔާބު ކުރެވިއްޖެ ނަމަ، ދިވެހި ރާއްޖެއިން ހައްޖަށް ދިއުމަށް ލިބޭ ކޯޓާގެ އަދަދު ދެހާހަށް އިތުރުކޮށް ހައްޖު ކޯޕަރޭޝަނުގައި އޮތް ބެކްލޮގުތައް ސާފު ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.
ހައްޖު ކޯޓާ އިތުރު ކުރުމާއި އެކު، އަގުތައް ދަށް ކުރުމަށް ސަރުކާރުން ކުރަމުންދާ މަސައްކަތްތަކާއި ގުޅޭގޮތުން އާންމުންގެ މީހަކު ކުރި ސުވާލަށް ”އަހާ ފޯރަމް“ ގައި ޝަހީމް ވިދަޅުވީ ހައްޖުގެ ނިޒާމު ހަރުދަނާ ކުރުމަށް ރައީސް މުއިއްޒު ހާއްސަ ސަމާލުކަމެއް އަބަދުވެސް ދެއްވާކަމަށެވެ. އަދި އެމަނިކުފާނުގެ އިރުޝާދުގެ ދަށުން ހައްޖަށް މީހުން ގެންދިއުމުގެ އަގު ކުޑަ ކުރުމަށް ހައްޖު ކޯޕަރޭޝަނާއި އެކު މަސައްކަތް ކުރަމުންދާކަން ފާހަގަކުރެއްވި އެވެ.
މިނިސްޓަރ ވިދާޅުވު ގޮތުގައި އެކަމަށް ސަރުކާރުން ކުރާ މަސައްކަތުގެ ހެޔޮ ނަތީޖާ ވަރަށް އަވަހަށް ފެންނަން ފަށާނެއެވެ.
ހައްޖަށް މީހުން ގެންދިއުމުގެ އަގު ކުޑަކުރުމަށް ހައްޖު ކޯޕަރޭޝަނުން ތައްވުރެއް ކަނޑައަޅައިގެން އޭގެ ދަށުން ދަނީ މަސައްކަތް ކުރަމުން.. މިވެނި ދުވަހެއްގައި ހާސިލުވޭވެނެ އޭ ބުނަން ދަތި.. އެހެން ނަމަވެސް މި ދައުރުގައި އެއަށް ހަރުދަނާ ހައްލެއް އަންނާނެ..
ރާއްޖޭގައި ހައްޖަށް މީހުން ގެންދިއުމުގެ އިންތިޒާމުތަކާއި ހަވާލުވެ އޮތް ހައްޖު ކޯޕަރޭޝަނުގެ ކިއުގައި 9000 އެއްހާ މީހުން އެބަތިއްބެވެ. އަދި މިރޭ ސުވާލު ކުރި އިތުރު މީހަކު ވެސް ވަނީ އޭނާ 2024 ގައި ހައްޖަށް ދިއުމަށް ފައިސާ ދެއްކިއިރު ހައްޖުގެ އަޅުކަމަށް ދެވޭނެކަމަށް ކޯޕަރޭޝަނުގެ ކިއުގައި ދައްކަނީ 2030 ވަނަ އަހަރެވެ.
މައްސަލަ ހައްލު ކުރުމަށް ސަރުކާރުން އަޅާފައިވާ ފިޔަވަޅުތަކުގެ ތެރޭގައި އަލަށް ހައްޖަށް ދާ މީހުންނަށް މި އަހަރުން ފެށިގެން އިސްކަންދޭ ގޮތަށް އުސޫލު ބަދަލުކުރުން ހިމެނެއެވެ. ކެބިނެޓުގައި މަޝްވަރާ ކުރެވުނު ގޮތުގެ މަތީން ރައީސް މުއިއްޒު ވަނީ ހައްޖަށް މީހުން ގެންދިއުމާއި ބެހޭ އުސޫލަށް ހަތަރު ބަދަލެއް ގެނައުމަށް ކަނޑައަޅުއްވާފަ އެވެ. އޭގެ ތެރޭގައި ހިމެނެނީ އަލަށް ހައްޖުގެ އަޅުކަން އަދާކުރާ މީހުންނަށް އިސްކަންދިނުމާއި، ހައްޖުގެ އަޅުކަން އަދާ ނުކުރާ މީހުންގެ ތެރެއިން 65 އަހަރުން ފެށިގެން މީހުންނަށް ހައްޖު ކޯޕަރޭޝަނުން ކޮންމެ އަހަރަކު، ހައްޖު ކޯޓާއިން ވަކި އަދަދެއް ކަނޑައެޅުން އަދި ހައްޖުގެ އަޅުކަން އަދާކޮށްފައި ނުވާ 75 އަހަރުން މަތީގެ މީހުންގެ ތެރެއިން ސިއްހީ ހާލަތަށް ބަލައި އެހީތެރިއަކު ގެންދަންޖެހޭ މީހުންނަށް އެހީތެރިއަކު ހަމަޖައްސަން ފުރުސަތު ދިނުމެވެ.
މީގެއިތުރުން އެހީތެރިއެއްގެ ގޮތުގައި ގެންދެވޭނީ ހައްޖުގެ އަޅުކަން އަދާކޮށްފައި ނުވާ މީހެއް އަދި ހައްޖުގެ އަޅުކަން އަދާކޮށްފައިވާ މީހަކު އެހީތެރިއެއްގެ ގޮތުގައި ގެންދެވޭނީ، ހައްޖަށް ނުދާ މީހަކު ލިބެން ނެތް ހާލަތުގައި ކަމަށް ކަނޑައެޅުމުގެ އިތުރުން ހައްޖުގެ އަޅުކަން ކުރިން އަދާކޮށްފައިވާ މީހަކަށް އިތުރު ފުރުސަތެއް ދެވޭނީ، އެންމެ ފަހުން އެ އަޅުކަން އަދާކުރިތާ ފަސް އަހަރު ވުމުން ކަމަށް ކަނޑައެޅުން ބަދަލުތަކުގެ ތެރޭގައި ހިމެނެއެވެ.
