އެމް-7 ގުރޫޕުން އެ ކުންފުނީގެ އެންމެ ފަހުގެ ޝޯރޫމް އެމް-7 ބުކްސްޓޯރ ހުޅުވައިފި އެވެ.
ޕްރިންޓިންއާއި، ސްޓޭޝަނަރީގެ އިތުރުން އޮފީސް ސާމާނު ފޯރުކޮށްދިނުމުގައި ރާއްޖޭގެ މަޝްހޫރު އެމް-7 ގެ އެންމެ ފަހުގެ ފިހާރަ ހުޅުވާފައި ބަނީ ނިކަގަސް ހިނގުމުގައި ހުންނަ މ. މަނަސްގަ އެވެ.
ފިހާރަ ހުޅުވުމަށް މިއަދުގެ ހެނދުނު ބޭއްވި ހާއްސަ ރަސްމިއްޔާތު ޝަރަފުވެރިކޮށް ދެއްވާފައި ވަނީ ވިލާ ކޮލެޖުގެ ރެކްޓަރ ޑރ. އަހުމަދު އަންވަރެވެ. އަދި ފިހާރަ ހުޅުވައިދެއްވުމަށް ފަހު އަންވަރު ވިދާޅުވީ ދިވެހިރާއްޖޭގެ ތައުލީމު ކުރިއެރުވުމުގައި ކުންފުނިން އަދާކުރަމުން ދަނީ ތައުރީފު ހައްގު މަސައްކަތެއް ކަމަށެވެ. ޑރ. އަންވަރު ވިދާޅުވީ އެމް-7 މިއަދާއި ހަމައަށް ވެސް ދެމެހެއްޓި އިހުލާސްތެރިކަން އަބަދުވެސް ފާހަގަކުރެވޭކަމަށާއި މިފަދަ އުފެއްދުންތެރިކމެއް އަންނަން އޮތް އައު ޖީލުތަކަށް ވަރަށް މުހިންމު ކަމަށެވެ.
ޑރ. އަންވަރު ވިދާޅުވީ ވިޔަފާރިއެއްގައި ގޮންޖެހުންތައް އަންނާނެކަމަށާއި އެހެން ނަމަވެސް ވިޔަފާރިއެއްގައި ގެންގުޅެން ޖެހޭ މައިގަނޑު އުސޫލުތައް ދަމަހައްޓައި މަސައްކަތުގައި ތެދުވެރިވެ، ހިދުމަތުގެ ފެންވަރު ރަނގަޅު ކުރުމަށް އަބަދުވެސް މަސައްކަތް ކުރަން ޖެހޭކަމަށެވެ. އަދި އެ ހިތްވަރު ކުންފުނީގެ ވެރިންނާއި މުވައްޒަފުންނަށް ދެއްވިއެވެ.
މިއަދު ހުޅުވި އެމް-7 ގެ ފިހާރައިން ލިބެން ހުންނާނެ ސްޓޭޝަނަރީތަކުގެ ތެރޭގައި ތައުލީމީ މުވައްސަސާތަކާއި ވިޔަފާރިތަކަށް ބޭނުންވާ ތަކެތި ހިމެނެއެވެ. އެގޮތުން އެންމެ ހަގު އުމުރުގެ ކިޔަވާ ކުދިންނަށް ބޭނުންވާ ސާމާނުން ފެށިގެން ކޮލެޖު ޔުނިވާސިޓީގެ ދަރިވަރުންނަށް ބޭނުންވާނެ ސާމާނާއި ކޯޕަރޭޓް އޮފީސްތަކުގެ ސްޓޭޝަނަރީ ހިމެނެއެވެ.
މީގެއިތުރުން މިއަދުގެ ރަސްމިއްޔާތުގައި އެމް-7 ގެ މެނޭޖިން ޑިރެކްޓަރ މުހައްމަދު އަބްދުއްސައްތާރު ވިދާޅުވީ ކުންފުނީގެ އަމާޒަކީ ދަރިވަރުން ކިޔެވުމަށާއި އޮފީސްތަކުގެ މާހައުލަށް ބޭނުންވާނެ ސާމާނުތައް އެއީ އެންމެ ފެންވަރު ރަނގަޅު ކޮލިޓީހުރި ތަކެއްޗަށް ވުންކަމަށެވެ. އެކަން ފާހަގަކޮށް ސައްތާރު ވަނީ، ކަސްޓަމަރުންގެ ފާރާތުން ލިބޭ އިތުބާރަށް ޝުކުރު އަދާކުރައްވައި ފިހާރައިގެ ތަކަތީގެ ކޮލިޓީ ދަމަހައްޓަވާނެކަމުގެ ޔަގީންކަން ދެއްވާފައެވެ.
އަޅުގަނޑުމެން މައިގަނޑު ހަތަރު ކަމަކަށް އިސްކަން ދެން… ފެންވަރު ރަނގަޅު ތަކެތި، އިތުބާރާއި ޔަގީންކަން.. ފަސޭހަވާނެ ގޮތަށް އަވަސް ހިދުމަތް އޯގާތެރި ހިނިތުންވުމަކާއި އެކު ހިދުމަތް ދިނުން..
އެމް-7 ގެ ޝިއާރަކީ ސިމްޕްލިފައިން ސޮލިއުޝަންކަމަށާއި، އޭގެއިން ދޭހަކޮށް ދެނީ ކަސްޓަމަރުންގެ ހާއްސަކަންކަމަށް ސައްތާރު ވިދާޅުވިއެވެ.
އައު ފިހާރަ ހުޅުވުން ފާހަގަކުރުމުގެ ގޮތުން އަންނަ ދިރާސީ އަހަރަށް ޕްރޮމޯޝަންތަކާއި ލަކީޑްރޯތައް ކުރިޔަށް ގެންދިއުމަށް ވަނީ ހަމަޖެހިފަ އެވެ.
