ދިރާގާއި މަމްސް އެއިޑް ގުޅިގެން މި އަހަރުވެސް ’ރަމަޟާން އެއިޑް‘ ކެމްޕެއިންގެ ދަށުން، އެހީއަށް ބޭނުންވެފައިވާ 100 އާއިލާއަކަށް އެހީތެރިކަން ފޯރުކޮށްދިނުމަށް ނިންމާފައިވާކަން ދިރާގުން ހާސަކޮށްފިއެވެ.
މަމްސް އެއިޑަކީ އަންހެނުން، ޚާއްސަކޮށް މަންމައިން، ބާރުވެރިކުރުވައި އެފަރާތްތަކަށް އެހީތެރިކަން ފޯރުކޮށްދިނުމުގެ މަޤްސަދުގައި މަސައްކަތްކުރާ ޖަމިއްޔާއެކެވެ. އެގޮތުން ’ރަމަޟާން އެއިޑް‘ އަކީ ރާއްޖޭގެ އެކި ކަންކޮޅުތަކުގައި އެހީއަށް ބޭނުންވެފައިވާ އާއިލާތަކަށް އެހީތެރިކަން ފޯރުކޮށްދިނުމަށް ކުރިއަށްގެންދާ މުހިންމު ޕްރޮގްރާމެކެވެ. މި ޕްރޮގްރާމްތަކަށް އެހީތެރިކަން ފޯރުކޮށްދިނުމުގެ ފުރުޞަތު ދިރާގުން ވަނީ އާންމުންނަށްވެސް ހުޅުވާލެވިފައެވެ.
މި ރަމަޟާން މަހު މަމްސް އެއިޑްއިން ކުރިއަށް ގެންދާ މި ޕްރޮގްރާމްގެ މަގްސަދަކީ، މަމްސް އެއިޑްގެ ކެއަރ ލިސްޓުގައި ހިމެނޭ އެކަނިވެރި މައިންނާއި ޚާއްސަ އެހީއަށް ބޭނުންވާ މައިންނާއި ޚާއްސަ އެހީއަށް ބޭނުންވާ ކުދިންނަށް އަޅާލާ މައިންނަށް މި ބަރަކާތްތެރި ރަމަޟާން މަހަށް ބޭނުންވާ ޒަރޫރީ ކާބޯތަކެތި ހިމެނޭ ކެއަރ ޕެކޭޖްތައް ފޯރުކޮށްދިނުންކަމަށް ދިރާގުން ބުންޏެވެ.
ދިރާގުން އަބަދުވެސް ދަނީ މުޖުތަމައުއަށް ބޭނުންވާ އެހީތެރިކަން ފޯރުކޮށްދިނުމަށާއި އަންހެނުން ބާރުވެރިކުރުމުގެ މަގުސަދުގައި މި ފަދަ ހަރަކާތްތަކަށް އެއްބާރުލުން ދެމުންނެވެ.
